Read Buka Helaga (Hiri Motu) 1993 ESEKIELA 3 Bible Online

ESEKIELA 3 - Buka Helaga (Hiri Motu) 1993 bible

ESEKIELA 3

¹Vadaeni Dirava ese lau ia hamaoroa, ia gwau, “Tanobada tauna e, inai buka do oi ania. Unai murinai oi lao, Israela taudia dekenai do oi hereva.”

²Vadaeni egu uduna lau kehoa, bona buka lau dekenai ia henia, lau ania totona.

³Dirava ia gwau, “Tanobada tauna e, inai oi lau henia buka oi ania, oiemu bogana ia dekena amo do oi hahonua.” Vadaeni buka lau ania, bona iena mamina be namo herea, hani bamona.

⁴Dirava ma ia gwau, “Tanobada tauna e, Israela taudia dekenai do oi lao, bona oi dekenai lau hamaoroa hereva, be idia dekenai do oi gwauraia.

⁵Badina be idau taudia, bona idau gado taudia dekenai oi lau siaia lasi, to Israela taudia sibona dekenai.

⁶Bema lau ese tanobada badadia dekenai oi lau siaia, gado idauidau momo, oi diba lasi gaudia idia hereva gabudia dekenai, unai taudia ese oiemu hereva do idia kamonai.

⁷“To Israela bese taudia ese oi do idia kamonai henia lasi. Idia ese lau dekenai idia kamonai henia lasi, badina idia ibounai be dagedage, bona edia lalona be auka momokani.

⁸“To hari lau ese oiemu lalona do lau ha-aukaia, idia edia lalona auka hegeregerena. Idia edia goada ese oiemu goada do ia hereaia lasi.

⁹Oiemu goada be do lau habadaia, oi be do nadi auka herea bamona, daiamono bamona. Unai dainai unai dagedage taudia dainai do oi gari lasi.”

¹⁰Ma Dirava ia hereva, ia gwau, “Tanobada tauna e, lauegu hereva ibounai dekenai do oi kamonai namonamo, bona laloaboio lasi.

¹¹Bona oi lao, oiemu bese taudia, tuari taudia ese Babulonia dekenai idia abia lao vadaeni taudia be do oi hamaoroa, oi gwau, ‘Kamonai, Lohiabada Dirava ese inai bamona umui ia hereva henia noho.’ Oibe, bema idia kamonai, o bema idia kamonai lasi neganai, lauegu hereva do oi hadibaia idia dekenai.”

¹²Unai neganai Dirava ena Lauma ese lau ia abia isi, bona lauegu murina dekenai gado badana momokani lau kamonai, ia gwau, “Lohiabada ena hairaina be bada herea guba dekenai. Iena ladana do oi hanamoa bada!”

¹³Unai mauri gaudia edia hanina idia hamarerea noho, bona uili ese regena idia karaia, tano mareremarere badana ena regena bamona.

¹⁴Lohiabada ena siahu ese lauegu latanai ia mai, mai goada bada danu, bona Dirava ena Lauma ese lau ia abia isi, bona lau ia abia lao. To egu lalona be ia dika bona mai badu danu.

¹⁵Vadaeni Dirava ena Lauma ese lau ia abia lao, bona Israela taudia, Babulonia dekenai noho taudia, dekenai lau ginidae. Unai gabu be Telabibi dekenai, Kebara Sinavai ena ranu isena kahirakahira ia noho. Dina 7 lalonai unai Israela taudia danu lau noho, bona edia sivarai lau dekenai ese egu lalona ia hisihisi henia bada, ela bona egu goada ia ore.

¹⁶Unai dina 7 idia ore neganai, Lohiabada ese lau Esekiela dekenai ia hereva, ia gwau,

¹⁷“Tanobada tauna e, lau ese Israela bese ena naria tauna be oi do lau halaoa. Oi dekenai lau henia sisiba be idia dekenai do oi hamaoroa.

¹⁸Bema lau gwau dika tauna ta be do ia mase, vadaeni oi ese ia do oi sisiba henia. Do oi hamaoroa iena kara dika do ia rakatania, vadaeni do ia mase lasi. Bema oi ese ia dekenai oi sisiba henia lasi, unai tau be iena kara dika dainai do ia mase. Bona lau be do lau gwau unai tau ena mase be oiemu kerere dainai.

¹⁹“To bema dika tauna be oi ese oi sisiba henia, bona iena dika ia rakatania lasi, vadaeni unai tau be iena kara dika dainai do ia mase. To oi be mai emu kerere lasi dainai, oi be do oi mase lasi.

²⁰“Bona bema kara maoromaoro tauna ta ese iena kara maoromaoro ia rakatania, kara dika ia karaia, bona ia hamorua dalana lau karaia neganai, oi ese unai tau do oi sisiba henia, iena dika do ia rakatania. Bema oi sisiba henia lasi, ia be iena kara dika dainai do ia mase. Lau ese iena kara maoromaoro gunana be do lau laloa lasi. Lasi, bona lau be do lau gwau unai tau ena mase be oiemu kerere dainai.

²¹“To bema kara maoromaoro tauna oi sisiba henia do ia kara dika lasi, bona oiemu hereva ia kamonai henia dainai ia kara dika lasi, unai tau do ia mase lasi. Bona oiemu mauri danu be do ia noho, do lau utua lasi.”

²²Lau Esekiela be unai gabu dekenai lau do noho, vadaeni mamina lau abia, Lohiabada ena siahu bada be egu latanai ia mai. Bona Lohiabada ese lau ia hereva henia, ia gwau, “Oi toreisi, koura dekenai do oi lao. Unuseni oi ginidae neganai lau ese oi do lau hereva henia.”

²³Unai dainai koura dekenai lau lao, bona unuseni Lohiabada ena hairaina lau itaia, Kebara Sinavai dekenai iena hairaina lau itaia bamona. Tano dekenai lau tui diho, egu vairana be tano dekenai lau atoa.

²⁴To Dirava ena Lauma be lau dekenai ia vareai, bona ia ese lau ia abia isi, vadaeni lau gini. Lohiabada ese lau ia hamaoroa, ia gwau, “Tanobada tauna e, oiemu ruma dekenai do oi lao, oi raka vareai, bona iduara do oi koua.

²⁵Vadaeni gabeai tau haida ese varo do idia abia, oi do idia guia. Bona oi be emu ruma do oi rakatania diba lasi, taunimanima edia huanai do oi raka diba lasi.

²⁶“Bona lau ese oiemu malana do lau hamasea, vadaeni do oi hereva diba lasi. Unai dainai oi ese inai dagedage taudia do oi sisiba henidia diba lasi.

²⁷“To nega ta ta lau ese oi dekenai egu hereva do lau henia, bona do lau ura oi ese inai hereva taunimanima dekenai do oi gwauraia. Unai negadia dekenai, lau ese oiemu uduna do lau kehoa, vadaeni oi be taunimanima dekenai do oi gwau: ‘Lohiabada Dirava ese inai bamona ia hereva.’ Idia haida ese do idia kamonai henia, to haida be do idia kamonai henia lasi momokani, badina idia be dagedage besena.”