Read Buka Helaga (Hiri Motu) 1993 ESEKIELA 45 Bible Online

ESEKIELA 45 - Buka Helaga (Hiri Motu) 1993 bible

ESEKIELA 45

¹Ma Lohiabada ese lau ia hamaoroa, ia gwau, “Israela tano do umui haria neganai, tano ena kahana ta be do umui abia hidi Lohiabada ena, kahana helagana do ia lao. Inai tano ena lata be 12.5 kilomita, bona ena lababa be 10 kilomita. Inai tano be do ia helaga, ia lao bona ena hetoana ibounai dekenai.

²Inai tano ena lalonai Dubu Helaga ena tano do ia noho, iena lata be 250 mita bona iena lababa danu be 250 mita. Inai Dubu Helaga ena tano be tano haida ma ese do ia hagegea, ruma lasi tano, iena lababa be 25 mita.

³Inai tano helagana lalonai, tano kahana ta do umui abia hidi, iena lata be 12.5 kilomita, bona iena lababa be 5 kilomita. Inai tano lalonai Dubu Helaga, helaga herea momokani gabuna do ia gini.

⁴Unai tano be tano helagana do ia lao. Ia be hahelagaia taudia, Dubu Helaga lalonai kara helagadia idia karaia, bona Lohiabada ena vairanai iena hesiai gaukara idia karaia noho taudia edia gabu. Edia ruma be inai tano lalonai, bona Dubu Helaga ia noho tano helagana danu.

⁵Ma unai tano kahana ta, ena lata be 12.5 kilomita, ena lababa be 5 kilomita be Levi taudia edia. Idia ese Dubu Helaga lalonai kara helagadia haida idia karaia noho. Inai tano lalonai Levi taudia edia hanua do idia noho.

⁶“Unai tano helagana ena badibadinai, be tano ma ta, iena lata be 12.5 kilomita, ena lababa be 2.5 kilomita. Unai tano dekenai be hanua badana ta do ia noho, bona Israela taudia be unuseni idia noho diba.

⁷“Tano danu do umui atoa siri king ena. Iena tano kahana be rua. Tano helagana bona hanua badana ena dina diho kahana hetoa gabuna dekena amo dina diho kahana tano ibounai ia lao bona davara badana be king ena tano. Ma tano helagana bona hanua badana ena dina daekau kahana hetoana dekena amo dina daekau kahana tano ia lao bona Israela ena hetoa gabuna dekenai, inai tano ibounai danu be king ena tano. Iena tano ena lata be Israela ena iduhu ta ena lata hegeregerena, dina diho kahana hetoa ia lao bona dina daekau kahana hetoa dekenai.

⁸Inai tano be king ena ahuna korikori Israela dekenai. Unai dainai lau ese king do lau halaodia taudia ese egu bese taudia do idia hisihisi henidia lou lasi, to king ese Israela tano orena be Israela iduhu ta ta edia naria kara henunai do ia rakatania.”

⁹Lohiabada Dirava ia gwau, “Umui Israela ena king taudia e, egu bese taudia umui dagedage bona hisihisi henidia karadia do umui hadokoa. Kota maoromaoro, bona kara maoromaoro danu do umui karaia. Umui ese egu bese taudia edia tano dekena amo do umui luludia lou lasi. Lau, Lohiabada Dirava ese umui lau hamaoroa noho inai.

¹⁰“Gau edia metau[1] tohoa sikele momokanidia sibona do umui gau-kara-laia:

¹¹“Epa bona bata edia anina be hegeregere. Bata ibounai 10 be homere ta hegeregerena, bona epa 10 danu be homere ta hegeregerena. Metau abia sikele ibounai edia badina be homere.

¹²Sekele be gera ibounai 20 hegeregerena. Sekele 5 totona sekele edia anina korikori 5 do umui henia, bona sekele 10 totona sekele edia anina korikori 10 do umui henia. Emui mina totona sekele ibounai 60 do umui henia.

¹³“Boubou gaudia be inai bamona do umui henia: “Uiti: Umui haboua uiti do umui karoa, karoa 60 dekenai, vadaeni karoa ta do umui henia. “Bali: Umui haboua bali do umui karoa, karoa 60, vadaeni karoa ta do umui henia.

¹⁴“Olive Dehoro: Umui emui audia dekena amo umui abia olive dehoro do umui karoa, karoa 100. Vadaeni karoa ta do umui henia. Ena bada be bata dekenai do umui abia. Bata 10 be homere ta hegeregerena. Homere ta be koro ta hegeregerena.

¹⁵“Mamoe: Mamoe 200, 200 dekena amo, mamoe ta ta do umui henia. Umui Israela iduhu ibounai ese mamoe boubou gaudia inai bamona do umui henia. Paraoa bouboudia, gabua ore bouboudia, bona maino karaia bouboudia do umui henia, Israela taudia edia kara dika davana karaia totona. Lau Lohiabada Dirava inai oda hereva lau gwauraia noho inai.

¹⁶“Inai tano taudia ibounai ese inai boubou gaudia be Israela ena king dekenai do idia henia.

¹⁷Vadaeni king ena gaukara korikori be gabua ore bouboudia bona paraoa bouboudia bona uaina bouboudia gaudia do ia henia, aria negadia, bona hua matamata negadia, bona Sabati Dinadia negadia, Israela besena ena aria korikoridia ibounai negadia lalonai. Ia ese kara dika bouboudia bona paraoa bouboudia bona gabua ore bouboudia bona maino karaia bouboudia do ia henia, Israela besena ena kara dika kokia totona gaudia.”

¹⁸Lohiabada Dirava be inai bamona ia hereva noho, ia gwau, “Hua ginigunana ena dina ginigunana dekenai, boromakau ena natuna tau, dika lasi momokani gauna ta do umui abia, bona ia dekena amo Helaga Gabuna do umui hagoevaia.

¹⁹Hahelagaia tauna ese kara dika kokia totona boubou gauna ena rarana haida do ia abia, Dubu Helaga ena iduara idia hagegea audia dekenai, bona boubou patana ena kona 4 dekenai, bona lalona ariara ena magu iduara ibounai edia audia dekenai unai rara do ia atoa.

²⁰Unai hua ena dina namba 7 dekenai danu unai bamona do umui karaia, ia diba lasi o ia laloa kerere dainai tau ta ese kara dika ta ia karaia kava vadaeni dainai. Unai dekena amo Dubu Helaga do umui hagoevaia.

²¹“Hua ginigunana ena dina namba 14 dekenai, Pasova Aria do umui karaia hamatamaia. Dina 7 lalonai idia hatubua lasi paraoa do umui ania.

²²Unai dina dekenai, king ese boromakau natuna tau ta do ia henia, kara dika kokia totona gauna, ia bona Israela taudia ibounai dainai.

²³Bona inai Pasova Aria ena dina 7 lalonai king ese boromakau natudia tau 7 bona mamoe tau, dika lasi momokani gaudia 7 do ia henia, Lohiabada ena, unai dina ta ta dekenai, gabua ore boubou gaudia, bona nanigosi tau ta, unai dina ta ta dekenai, kara dika kokia totona gaudia.

²⁴King ese danu paraoa boubouna do ia henia, paraoa ena bada 17.5 lita be boromakau tau ta ta dekenai, bona paraoa ena bada 17.5 lita be mamoe tau ta ta dekenai, bona olive dehoro 3 lita boromakau ta ta dekenai, bona mamoe ta ta dekenai danu.

²⁵“Unai bouboudia ibounai hegeregerena danu, be king ese do ia henia Au Raurau Ruma Maragidia Aria dekenai. Inai aria be hua namba 7 ena dina namba 15 dekenai ia hamatamaia. Unai aria ena dina 7 lalonai king ese dina ta ta dekenai unai bouboudia ibounai do ia henia, kara dika kokia totona. Gabua ore bouboudia, paraoa bouboudia, bona olive dehoro danu, edia bada be Pasova Aria totona ia henia gaudia edia bada hegeregerena.”