Read Buka Helaga (Hiri Motu) 1993 ESEKIELA 9 Bible Online

ESEKIELA 9 - Buka Helaga (Hiri Motu) 1993 bible

ESEKIELA 9

¹Unai neganai lau ese Dirava ena gadona lau kamonai, ia gwau, “Ierusalema ena dika davana do umui henia taudia e, umui mai iniseni. Emui tuari gaudia do umui mailaia.”

²Vadaeni lau itaia, tau ibounai 6 be Dubu Helaga ena magu iduara, mirigini kahana gauna, ena kahana dekena amo idia mai, ta ta be mai edia tuari kaia imadia dekenai. Ma tau ta danu idia danu ia mai, ia be dabua aukana ia karaia, bona mai ena torea peni bona pepa danu. Vadaeni idia be boubou patana, auri laboralabora gauna, ena badibadinai idia gini.

³Unai neganai Israela ena Dirava ena hairaina be ena noho gabuna kerubi edia ataiai, dekena amo ia daekau, bona Dubu Helaga ena raka vareai gabuna dekenai ia lao. Vadaeni Lohiabada ese unai dabua aukana ia karaia bona torea gaudia ia abia tauna ia boiboi henia.

⁴Lohiabada ese ia hamaoroa, ia gwau, “Ierusalema hanua do oi raka hanaia, bona kara dika rohoroho ibounai, hanua lalonai idia karaia noho, dainai idia taitai noho, bona idia lalohisihisi noho taudia edia bagudia dekenai maka do oi atoa.”

⁵Bona lau kamonai, Dirava ese unai tau haida danu ia hamaoroa, ia gwau, “Unai maka ia atoa noho tauna ena murinai, hanua do umui raka hanaia, bona taunimanima do umui alaia mase. Ta do umui bogahisihisi henia lasi, bona ta do umui hamauria lasi,

⁶tau burukadia, uhau, kekeni badadia, memero, kekeni, bona hahine danu. To iena baguna dekenai maka idia abia taudia do umui alaia lasi. Egu Dubu Helaga dekena amo inai kara do umui karaia hamatamaia.” Unai dainai idia ese unai tau badadia, Dubu Helaga ena vairanai idia gini noho taudia dekenai inai alaia kara idia hamatamaia.

⁷Ma Dirava ese idia ia hamaoroa, ia gwau, “Dubu Helaga do umui hamiroa. Dubu ena ariara mai edia magudia ibounai, be umui alaia mase taudia edia tauanidia dekena amo do umui hahonua. Umui lao!” Vadaeni idia be hanua ena ariara dekenai idia raka lao, bona idia ese hanua taudia idia alaia hamatamaia.

⁸Idia aladia noho neganai, lau Esekiela be sibona lau noho, vadaeni tano dekenai egu vairana lau atoa, bona lau boiboi, lau gwau, “Lohiabada Dirava e, oiemu badu mai siahu danu Ierusalema ena latanai oi bubua neganai, Israela do mauri noho taudia ibounai do oi alaia ore, a?”

⁹Vadaeni Dirava ese lau ia hamaoroa, ia gwau, “Israela bona Iuda taudia edia kerere be bada herea, bona idia alaia mase taudia edia rara dekenai Israela tano be ia honu noho. Ierusalema hanua be kota maoromaoro lasi ena kara dekena amo ia honu noho. Badina be idia gwau, ‘Lohiabada ese iseda tano ia rakatania vadaeni. Unai dainai ia ese iseda kara dika ia itaia lasi.’

¹⁰To lau Lohiabada ese idia do lau bogahisihisi henia lasi, bona idia ese taunimanima momo dekenai idia karaia hegeregerena, be lau ese idia dekenai do lau karaia.”

¹¹Unai neganai dabua aukana ia karaia, bona torea gaudia ia abia tauna ese ia giroa mai, bona Lohiabada dekenai ia hereva, ia gwau, “Lohiabada e, oiemu oda hegeregerena lau karaia vadaeni.”