Read Buka Helaga (Hiri Motu) 1993 DANIELA 9 Bible Online

DANIELA 9 - Buka Helaga (Hiri Motu) 1993 bible

DANIELA 9

¹Dariuse, Ahasuero ena natuna be Mede tauna. Babulonia tanobada ena king dagi ia abia.

²Dariuse ia king lagani ginigunana lalonai, lau Daniela ese Buka Helaga lalonai Dirava ena hereva, Ieremia peroveta tauna ia torea gauna lau tahua: Unai be ia gwauraia lagani 70 lalonai Ierusalema hanua do ia makohia dika noho.

³Vadaeni Dirava dekenai lau guriguri, lau noinoi henia. Lau aniani lasi, bona puse dabua lau karaia, bona lahi ena kahu dekenai lau helai.

⁴Lohiabada egu Dirava lau guriguri henia, bona egu dika, bona egu bese edia kara dika lau gwauraia hedinarai, lau gwau, “Lohiabada, oi be Dirava badana, taunimanima ibounai oi dekenai idia gari. Oiemu gwauhamata oi badinaia noho momokani, bona oiemu hereva badinaia taudia, bona oi idia lalokau henia taudia be oi ese oi bogahisihisi henidia noho.

⁵“Ai be ai kara dika, bona ai kerere karaia, bona ai be dika momokani. Oiemu taravatu herevadia be ai kamonai henia lasi, bona ai dekenai oi hadibaia dala maorona dekena amo ai raka siri vadaeni.

⁶“Oiemu hesiai taudia, peroveta taudia, be ai kamonai henidia lasi. Idia ese oiemu ladana dainai, aiemai king bona lohia taudia, aiemai tubuna taudia bona aiemai bese taudia idia hereva henidia, to edia hereva ai abia dae lasi.

⁷Lohiabada e, oiemu kara be nega ibounai ia maoromaoro momokani, bona ai ibounai aiemai kara be mai hemaraina. Iuda tanona dekenai bona Ierusalema hanua dekenai idia noho taudia, bona aiemai dika dainai idau tano dekenai ai oi lulua Israela taudia ibounai be ai badinaia lasi oi.

⁸Lohiabada e, aiemai king, bona aiemai lohia taudia, bona aiemai sene taudia edia kara be mai hemaraina, badina be oi dekenai idia kara dika vadaeni.

⁹Lohiabada Dirava e, oi be mai emu bogahisihisi, bona kara dika oi gwauatao diba, to ai ese oi dekenai ai dagedage henia vadaeni.

¹⁰“Oi Lohiabada, aiemai Dirava ese oiemu hereva oi gwauraia vadaeni ai dekenai oiemu peroveta taudia edia uduna dekena amo, to unai hereva be ai kamonai henia lasi.

¹¹Io, Israela taudia ibounai ese oiemu taravatu idia utua, bona oiemu hereva idia kamonai henia lasi. Ai kara dika oi dekenai, bona oiemu hesiai tauna, Mose, ena taravatu lalonai ia torea taunimanima hadikaia hereva, be oi siaia mai ai dekenai.

¹²“Guna oi sisiba henia do oi karaia gaudia, be oi karaia vadaeni ai dekenai, bona aiemai lohia taudia dekenai. Ierusalema dekenai oi siaia panisi ese hanua ibounai idia davaria panisi ia hanaia momokani.

¹³Mose ena taravatu dekenai ia torea panisi ibounai be ai davaria vadaeni. To hari inai nega lalonai danu, Lohiabada aiemai Dirava e, oiemu ura karadia be ai badinaia lasi, bona aiemai kara dika ai rakatania lasi, bona oiemu hereva momokani be ai badinaia lasi.

¹⁴“Unai dainai oi, Lohiabada, aiemai Dirava, inai panisi oi abia hegaegae, vadaeni ai dekenai oi siaia mai, badina oiemu gaukara ibounai be maoro momokani. To ai be ai kamonai henia lasi oi.

¹⁵“Lohiabada aiemai Dirava, oiemu siahu oi hedinaraia vadaeni, oiemu bese taudia be Aigupito dekena amo oi hakaudia mai, bona oiemu goada ena sivarai be ia bada herea ia mai bona hari danu. Ai ese kara dika ai karaia, bona ai ese kerere bada ai karaia vadaeni danu.

¹⁶Lohiabada e, oiemu kara maoromaoro hegeregerena lau noinoi, oi ese Ierusalema do oi badu henia lou lasi. Unai be oiemu hanua, oiemu ororo helagana. Aiemai kara dika bona aiemai sene taudia edia kerere dikadia dainai, Ierusalema ena badinai idia noho idau bese taudia ese Ierusalema bona aiemai hemarai idia kirikirilaia noho.

¹⁷“Aiemai Dirava e, mani lauegu guriguri bona lauegu noinoi oi kamonai henia. Oiemu Dubu Helaga, ia makohia noho gauna mani do oi haginia lou, vadaeni taunimanima do idia diba oi be Dirava.

¹⁸“Dirava e, mani ai dekenai do oi kamonai henia. Oiemu matana mani oi kehoa, bona aiemai dika ena hisihisi bona hemarai, bona oiemu ladana ia noho Ierusalema hanua ena dika ia davaria gauna mani oi itaia. Ai be kara maoromaoro dainai oi dekenai ai noinoi, a? Lasi momokani. Oi dekenai ai noinoi, badina ai diba oi be mai oiemu bogahisihisi.

¹⁹“Lohiabada e, mani ai dekenai do oi kamonai henia. Aiemai dika do oi gwauatao. Lohiabada e, mani oi kamonai henia ai, bona durua kara do oi karaia. Vadaeni taunimanima ibounai do idia diba oi be Dirava. Oi naria daudau lasi! Inai hanua Ierusalema, bona iena taudia be oiemu.”

²⁰Inai guriguri lau karaia noho, bona lauegu kara dika bona lauegu bese Israela edia kara dika lau gwauraia hedinarai noho, bona Lohiabada egu Dirava iena Dubu Helaga do ia haginia lou totona lau noinoi noho danu.

²¹Lau guriguri noho neganai, unai tau Gaberiela, mata hanai ginigunana dekenai lau itaia tauna, lau noho gabuna dekenai ia roho diho mai. Unai be adorahi kahanai boubou gauna idia karaia ena hora lalonai lau dekenai ia mai.

²²Lau dekenai ia hereva, ia gwau, “Daniela e, unai mata hanai ena anina hedinaraia totona lau mai.

²³Oi ese Dirava oi guriguri henia hamatamaia neganai, Dirava ia kamonai henia oi. Bona unai guriguri ena haere hamaoroa totona lau mai, badina Dirava ia lalokau henia bada oi. Unai dainai inai mata hanai ena anina, lau hadibaia gauna, do oi kamonai namonamo.

²⁴“Lagani 490 be nega Dirava ese ia maka karaia oiemu taudia bona oiemu hanua helaga dekenai, edia kara kerere do idia haorea, bona edia kara dika do idia hadokoa momokani. Edia kara dika davana do idia karaia haorea, bona kara maoromaoro do idia karaia ia lao hanaihanai. Helaga Herea Gabuna danu be do idia hahelagaia lou. Inai kara idia vara ese mata hanai bona peroveta herevana do idia hamomokania.

²⁵“Inai oi laloa namonamo: Ierusalema haginia lou herevana idia gwauraia ela bona Mesia ia ginidae be lagani ibounai 483 be do idia ore. Ierusalema ena ariara bona magu badadia do idia karaia lou, to nega dika lalonai do idia karaia.

²⁶“Unai nega ena dokona dekenai be idia ese Mesia do idia hamasea, to iena kerere dainai lasi, bona idau bese ena lohia ta ena taudia do idia mai, unai hanua bona Dubu Helaga do idia hamakohia. Unai gau ibounai edia dokona be abata bamona, tuari do ia vara, bona gau ibounai do idia dika.

²⁷“Unai lohia tauna ese lagani 7 lalonai gwauhamata do ia gwauraia taunimanima momo dekenai. To unai lagani 7 ena kahana, (lagani 3 1/2) ia ore neganai, ia ese boubou gauna bona harihari gauna karana do ia hadokoa. Vadaeni Hadikaia Dika Rohoroho Gauna be Dubu Helaga ena ataiai momokani do idia atoa. Unuseni do ia noho ela bona unai dika ia havaraia tauna be Dirava ese iena dika davana do ia henia.”