Read Buka Helaga (Hiri Motu) 1993 HOSEA 12 Bible Online

HOSEA 12 - Buka Helaga (Hiri Motu) 1993 bible

HOSEA 12

¹Ma Dirava ia gwau, “Israela taudia edia kara ibounai be mai anina lasi, bona taunimanima hadikaia kara. Edia kara koikoi bona dagedage karadia, be idia habadaia lao noho. Idia ese durua abia totona, Asuria danu idia turana karaia, bona Aigupito dekenai olive dehoro idia hoihoilaia noho.”

²Lohiabada ese Iuda taudia dekenai ia samania noho. Bona ia ese Israela taudia do ia matakani henia, edia dala dikadia hegeregerena, bona davana do ia henia, edia kara dika hegeregerena.

³Israela edia sene tauna Iakobo ia vara noho neganai, ia ese sinana ena bogana lalonai, iena kakana Esau ena aena ia dogoatao, bona ia be tau badana neganai, ia be Dirava danu ia heatu.

⁴Io, Iakobo be aneru danu ia heatu, bona ia kwalimu. Ia ese Dirava dekenai ia tai henia, Dirava ena hanamoa do ia davaria totona. Bona Betele dekenai ia be Dirava danu idia hedavari, bona unuseni Dirava be Iakobo danu ia hereva.

⁵Unai be Lohiabada, Siahu Ibounai ena Dirava. Iena ladana be Lohiabada.

⁶Unai dainai, Iakobo ena bese taudia e, emui Dirava do umui abidadama henia, bona ia dekenai do umui giroa lou. Lalokau bona kota maoromaoro karadia, be do umui dogoatao noho, bona mai laloa goada danu, emui Dirava ena kara totona do umui naria noho.

⁷Lohiabada ia gwau, “Israela taudia edia kara, be Kanana taudia edia kara bamona. Hoihoi neganai, idia ese sikele koikoidia idia gaukaralaia noho. Inai bamona koikoi kara idia ura henia noho.

⁸Inai Eparaima taudia idia gwau, ‘Ai be kohu momo ai haboua vadaeni taudia.’ To edia kohu momo ibounai ese, edia kerere do ia kokia ore diba lasi.

⁹To Israela taudia e, lau be Lohiabada, emui Dirava. Lau ese Aigupito dekena amo umui lau hakaua mai. Lau ese Au Raurau Ruma Maragidia dekenai, umui lau hanohoa lou noho, bona lagani ta ta ibounai umui laloa, lau be umui dekenai lau mai, tano kaukau dekenai palai ruma lalonai umui noho neganai.

¹⁰“Lau ese peroveta taudia dekenai lau hereva, bona mata hanai momo idia dekenai lau henia. Peroveta taudia edia ududia dekena amo, egu bese taudia lau sisiba henidia.

¹¹To hari Gileada dekenai, kaivakuku idia tomadiho henia noho, bona unai tomadiho taudia be do idia mase momokani. Gilegala dekenai kaivakuku dekenai henia totona boromakau tau, be boubou gaudia totona idia alaia noho. To edia boubou patadia be, uma dekenai ia haboua nadi momoru gaudia bamona, uma ena dadaira dekenai idia haboua nadi bamona.”

¹²Iakobo ese Arama tano dekenai ia heau lao. Unuseni ia ese hesiai gaukara ia karaia, adavana ta ena davana do ia karaia totona. Iena adavana abia totona ia ese mamoe ia naridia.

¹³Lohiabada ese peroveta tauna ta ia siaia lao, Israela taudia Aigupito dekena amo do ia hakaua mai totona, bona peroveta tauna dekena amo, Lohiabada ese Israela taudia ia naridia bona hamauridia.

¹⁴Israela taudia ese Lohiabada idia habadua momokani vadaeni. Edia kara dika dainai bema idia mase be namo. Idia ese Lohiabada idia hahemaraia dainai, ia ese edia dika davana do ia henidia.