Read Buka Helaga (Hiri Motu) 1993 HOSEA 14 Bible Online

HOSEA 14 - Buka Helaga (Hiri Motu) 1993 bible

HOSEA 14

¹Israela taudia e, emui Lohiabada Dirava dekenai do umui giroa lou. Badina be emui kara dika ese umui ia hamorua vadaeni.

²Lohiabada dekenai do umui giroa lou, bona inai guriguri ia dekenai do umui henia, boubou gauna bamona, gauna inai: “Lohiabada e, aiemai kara dika ibounai do oi gwauatao, bona aiemai guriguri do oi abia dae, vadaeni ai ese oi do ai hanamoa momokani, aiemai gwauhamata gunana hegeregerena.

³“Asuria ese ai ia hamauria diba lasi, bona tuari ena hosi ese tuari dekena amo ai idia gimaia diba lasi. Bona aiemai imana ese idia karaia dirava koikoi do ai herevalaia lou lasi, ‘Aiemai Dirava’. Badina Lohiabada e, oi ese durua idia davaria diba lasi taudia dekenai oi bogahisihisi henidia noho.”

⁴Lohiabada ia gwau, “Lauegu bese ese lau idia rakatania, to lau ese idia do lau abia mai lou. Lau ese idia do lau lalokau henia, mai egu kudouna ibounai danu. Idia dekenai do lau badu lou lasi.

⁵Lau ese Israela do lau hanamoa, medu ese tano kaukau ia hanamoa hegeregerena. Israela taudia be do idia tubu daekau, herahera namona ese ia tubu daekau hegeregerena. Dohore edia goada be mai edia badina, Lebanona ena sida audia, be mai edia ramu goadadia hegeregerena.

⁶Do idia tubu namonamo, au ese rau matamata ia atoa bamona. Edia hairai be do olive audia edia hairai bamona. Edia bonana danu be namo, Lebanona ena sida audia edia bonana bamona.

⁷Lauegu naria henunai do idia noho lou. Uma namona bamona do idia tubu namonamo, bona vain umana bamona huahua momo do idia atoa. Ladana bada danu do idia abia, Lebanona ena uaina hegeregerena.

⁸Israela taudia ese dirava koikoi, be do idia tomadiho henia lasi. Lau tamona sibona ese edia guriguri do lau kamonai, bona idia do lau naria. Lau be au namona, iena rau idia moru lasi bamona. Israela taudia ese lauegu henunai do idia noho, mai mauri namona danu. Namo idia davaria gaudia ibounai, edia badina be lau inai.”

⁹Taunimanima bema mai edia aonega neganai, idia ese inai buka ena anina do idia davaria diba. Bona lau ura inai buka ena hereva do idia laloa namonamo, bona badinaia. Lohiabada ena dala ibounai be maoromaoro, bona kara maoromaoro taudia ese inai dala dekena amo idia mauri noho. To kara dika taudia ese inai dala do idia badinaia lasi, bona unai dainai do idia hekwakwanai, bona do idia moru.