Read Buka Helaga (Hiri Motu) 1993 HOSEA 3 Bible Online

HOSEA 3 - Buka Helaga (Hiri Motu) 1993 bible

HOSEA 3

¹Lohiabada ese lau dekenai ia hereva lou, ia gwau, “Oi lao, oiemu hahine, idau tauna ia sihari henia noho hahine, ma do oi ura henia lou. Inai hahine do oi lalokau henia momokani, lau ese egu bese Israela taudia lau lalokau henia noho hegeregerena. Momokani, idia ese lau idia rakatania, dirava koikoi dekenai idia lao, bona vain huahua, idia hakaukaua gaudia, be unai dirava dekenai idia henia. To lau ese Israela do lau lalokau henidia noho.”

²Vadaeni lau ese unai hahine lau hoia lou, 150 kina bona bali raisi puse 6 dekena amo.

³Lau ese ia lau hamaoroa, lau gwau, “Momokani oi be lauegu hahine, to hegeregere lasi oi danu ita mahuta hebou. Oi be do oi noho namonamo, sihari kava karadia do oi karaia lasi nega sisina daudau. Bona inai nega lalonai lau ese oi totona do lau naria.”

⁴Inai bamona danu Israela taudia ese do idia noho kava, nega sisina daudau, edia gunalaia taudia bona edia lohia ta be lasi. Inai nega lalonai danu boubou karadia, bona nadi helagadia do idia haginia lasi, guriguri henia totona. Bona dirava koikoi, bona vaira neganai do idia vara gaudia tahua totona meamea karadia danu do idia karaia lasi.

⁵Inai nega be ia ore neganai, Israela taudia ese Lohiabada Dirava dekenai do idia giroa lou, bona ia sibona dekenai do idia tomadiho. Bona idia ese edia King, Davida ena tubuna do idia kamonai henia. Unai neganai idia ese Lohiabada do idia gari henia, bona ia ese iena harihari gaudia do ia henidia.