Read Buka Helaga (Hiri Motu) 1993 HOSEA 9 Bible Online

HOSEA 9 - Buka Helaga (Hiri Motu) 1993 bible

HOSEA 9

¹Israela taudia e, do umui moale lasi. Bese idauidau idia moale karaia bamona, be do umui moale karaia lasi. Badina be umui ese emui Dirava dekenai, kara momokani umui karaia lasi. Umui ese emui Dirava umui rakatania vadaeni. Tano kahana ibounai dekenai ariara kara totona, umui sibona umui hoia noho, badina be uiti momo do umui abia totona, Bala dirava dekenai umui tomadiho henia noho!

²Unai dainai emui uiti, be momo lasi sibona do idia vara, bona uaina matamata hegeregere lasi do umui davaria.

³Israela taudia be Lohiabada ena tano, dekenai do idia noho lasi, to idia ese Aigupito tano dekenai do idia giroa lou, bona idia ese ia taravatua vadaeni aniani, do idia ania Asuria lalonai.

⁴Unai gabudia dekenai idia ese uaina bouboudia, be Lohiabada dekenai do idia henia diba lasi, bona edia boubou gaudia ese, Lohiabada do idia hamoalea lasi. Edia aniani be mase taudia totona, idia taitai taudia edia aniani hegeregerena, bona unai aniani ese, idia ania taudia ibounai do ia hamiroa. Unai aniani be edia hitolo hanamoa totona, unai gauna sibona do idia ania, to Lohiabada ena Dubu dekenai, do idia abia vareai diba lasi.

⁵Lohiabada ena aria dinadia dekenai dahaka do umui karaia? Au Raurau Ruma Maragidia ena Aria neganai, Lohiabada be edena bamona do umui hanamoa?

⁶Umui kamonai, Israela taudia, be tuari dika herea dekena amo do idia heau, to Aigupito taudia ese, unai heau taudia do idia haboua, bona Memepisi dekenai do idia guridia. Edia siliva dekenai karaia kohu namodia, bona edia ruma gunadia idia noho gabuna be, ava dikadia bona au ginigini, ese do idia koua momokani.

⁷Israela taudia edia matakani dinadia idia mai vadaeni. Edia dika davana abia dinadia idia ginidae vadaeni. Do ia vara neganai, Israela taudia ese mamina do idia abia. Umui gwau, “Inai peroveta tauna be kavakava. Inai Lauma ese ia abia tauna be kava.” Umui ese lau Hosea umui badu henia noho, badina emui kara dika be bada herea dainai.

⁸Dirava ese lau ia siaia vadaeni, iena bese Israela taudia edia peroveta tauna, bona idia dekenai sisiba henia totona tauna do lau lao. To lau lao gabudia ibounai dekenai, umui Israela taudia ese, lau umui hadikaia daladia umui tahua noho, manu tahua tauna ese reke dekenai, manu do ia abia gwauraia bamona. Inai lau dekenai umui badu kara, be emui Dirava ena Dubu Helaga lalonai umui dagedage bamona.

⁹Israela taudia ese kara mirodia, dika rohoroho idia karaia noho, Gibea dekenai idia karaia dinadia hegeregerena. Dirava ese edia kara dika do ia laloatao. Edia kara dika edia davana do ia henia.

¹⁰Lohiabada ia gwau, “Lau ese Israela lau davaria matamata neganai, idia be vain huahuadia, tano kaukau dekenai idia vara noho bamona. Israela taudia edia sene taudia lau itaia matamata neganai, idia be fig audia edia huahuadia, mage gaudia ginigunadia lau itaia bamona. To idia be Peoro Ororo dekenai idia lao, bona idia ese Bala dirava idia tomadiho henia. Unai neganai idia be dika rohoroho, idia ura henia dirava be dika rohoroho hegeregerena.

¹¹Israela ena hairaina be do ia roho lao ore, manu ia heau bamona. Edia natuna ta do ia vara lasi. Edia hahine ta do ia mara namonamo lasi. Edia hahine ta do ia rogorogo lasi.

¹²Sedira edia natudia haida do idia havaraia, to lau ese mase dekenai idia do lau abia lao, ta do ia mauri noho lasi. Lau ese idia do lau rakatania neganai, idia madi dika do idia davaria.

¹³Laiona hahine ta lau itaia, iena natuna matamata be haida ese idia henaoa ore. Israela hahine taudia ese natudia do idia havaraia, to nega sisina murinai haida ese do idia aladia mase.”

¹⁴Lohiabada e, dahaka be oi dekenai do lau noia, inai taudia do oi henia totona? Edia hahine taudia edia natuna havaraia goadana do oi koua, bona edia rata be anina lasi do oi halaoa.

¹⁵Lohiabada ia gwau, “Edia kara dika ibounai be Gilegala dekenai ia matamaia. Unuseni lau ese idia lau badu henia hamatamaia. Edia kara be dika rohoroho dainai, lau ese egu tano dekena amo, idia do lau lulua lao. Inai murinai lau ese idia do lau ura henia lou lasi, badina edia lohia taudia ibounai ese, lau idia dagedage henia noho.

¹⁶Israela taudia be ia dika vadaeni auna ta bamona, vadaeni idia utua diho. Edia ramudia idia kaukau vadaeni, bona huahua idia atoa diba lasi. Sedira natudia haida do idia havaraia, to lau ese unai idia lalokau henia memero, be do lau alaia mase.”

¹⁷Egu Dirava ese unai iena bese taudia do ia negea, badina be idia ese ia dekenai idia kamonai lasi. Idia be bese idauidau edia huanai, do idia loaloa kava lao.