Read Buka Helaga (Hiri Motu) 1993 AMOSA 4 Bible Online

AMOSA 4 - Buka Helaga (Hiri Motu) 1993 bible

AMOSA 4

¹Umui Samaria hahine e, umui emui tauanidia be idia bada, Basana ena boromakau hahinedia bamona. Umui ese manoka taudia umui hisihisi henia, bona ogogami taudia umui dagedage henidia noho. Bona umui ese emui adavana taudia umui oda henidia, umui gwau, “Inua kekero momo do umui mailaia, do ai inua.”

²Lohiabada Dirava be ia helaga momokani, bona ia ese ia gwauhamata vadaeni inai bamona: “Lau hereva momokani inai, nega be ia mai noho, idia ese kimai dekena amo umui do idia veria lao. Umui ibounai be kimai dekena amo do idia veria daekau, gwarume idia veria daekau bamona.

³Bona idia ese umui do idia veria lao, hanua maguna ia makohia gabuna dekenai, bona unuseni ia noho matuna dekena amo umui do idia negea murimuri dekenai.”

⁴Lohiabada Dirava ia gwau, “Israela taudia e, umui lao, Betele ena helaga gabuna dekenai do umui kara dika! Gilegala dekenai danu do umui lao, bona mai emui goada danu do umui kara dika! Bona daba ibounai umui ese boromakau bona mamoe be boubou gaudia totona do umui mailaia. Bona dina ihatoina ibounai dekenai, emui kohu kahana 10 dekena amo kahana tamona do umui mailaia, emui harihari gauna lau dekenai totona.

⁵Paraoa boubouna danu lau Dirava dekenai do umui henia, emui tanikiu toana. Bona emui harihari gaudia umui habadaia neganai do umui hekokorokulaia! Inai bamona kara umui ura henia bada noho, ani?

⁶“Lau Lohiabada ese emui hanua ibounai dekenai hitolo bada lau havaraia, to umui ese lau dekenai umui giroa mai lasi.

⁷Emui uma anina ena medu davaria negana lalonai lau ese medu lau hadihoa lasi. Lau hadihoa hanua ta dekenai, to hanua ma ta dekenai lau hadihoa lasi. Medu be tano ta dekenai ia diho, to tano ma ta dekenai ia diho lasi, vadaeni ia kaukau.

⁸Hanua haida dekena amo ranu mase taudia idia manoka dainai, hanua ta dekenai idia lao, ranu abia totona. To ranu be hereregere lasi dainai, idia abia lasi. Inai bamona dika umui davaria vadaeni, to umui emui lalona umui do giroa lasi.

⁹“Emui uiti do idia kakoro totona, lai siahu bada lau siaia. Kwadi ese emui uma gabudia, emui vain audia, emui fig audia, bona emui olive audia idia ania ore. To umui emui lalona umui do giroa lasi. Lasi momokani.”

¹⁰Ma Lohiabada ia hereva, ia gwau, “Lau ese gorere badana, Aigupito dekenai lau siaia gauna bamona, umui dekenai lau siaia, umui hadikaia totona. Emui eregabe taudia tuari dekenai lau alaia mase, bona emui hosi lau abia lao daudau. Emui kamepa dekenai tauanina masedia momo idia noho dainai, bonana dika herea ia daekau. To emui lalona umui do giroa lasi.”

¹¹Ma Lohiabada ia gwau, “Lau ese umui haida lau alaia mase, Sodoma bona Gomora taudia lau alaia mase bamona. Umui emui heau mauri taudia edia toana be au rakuraku ia hururu noho, lahi dekena amo idia kokia gaudia bamona. To emui lalona umui do giroa lasi.”

¹²“Unai dainai, Israela taudia e, emui kerere davana umui dekenai do lau henia. Inai do lau karaia dainai, egu kota dekenai do umui hedinarai totona do umui noho hegaegae!”

¹³Dirava ese ororo ia karaia. Ia ese lai ia havaraia. Ia ese iena laloa gaudia, be taunimanima dekenai ia hadibaia noho. Ia sibona ese dina ia haorea, bona hanuaboi ia halaoa. Ia ese tanobada ena kahana ibounai ia biagua noho. Iena ladana be inai: Lohiabada, Siahu Ibounai ena Dirava.