Read Buka Helaga (Hiri Motu) 1993 AMOSA 5 Bible Online

AMOSA 5 - Buka Helaga (Hiri Motu) 1993 bible

AMOSA 5

¹Israela taudia e, do umui kamonai! Lau ese mase tauna idia guria ena ane do lau abia umui emui latanai, gauna inai:

²Inai kekeni, rami hebou kekeni, ena ladana Israela be ia moru vadaeni. Ia be do ia toreisi lou lasi! Ia be tano dekenai ia hekure noho, ibounai ese ia idia rakatania vadaeni, bona ta ese ia durua lasi, do ia toreisi totona.

³Lohiabada Dirava ese ia hereva, ia gwau, “Israela ena hanua ta ese tuari taudia 1000 idia siaia lao, to 100 sibona idia giroa mai. Ma hanua ta ese tuari taudia 100 idia siaia lao, to 10 sibona idia giroa mai.”

⁴Lohiabada be Israela taudia dekenai ia gwau, “Lau dekenai do umui mai, vadaeni do umui mauri.

⁵Bere Sieba dekenai do umui lao lasi, tomadiho totona. Betele dekenai lau do umui tahua lasi — Betele be anina lasi gabuna do idia halaoa. Gilegala dekenai do umui lao lasi — iena taudia be haida ese do idia guia, idau gabu dekenai do idia abia lao.”

⁶Lohiabada dekenai do umui lao, vadaeni mauri do umui davaria. Bema lasi neganai, Lohiabada ese Israela taudia edia latanai lahi bamona do ia diho mai. Inai lahi ese Betele taudia do ia gabua ore, tau ta ese do ia habodoa diba lasi.

⁷Umui kota maoromaoro umui hakererea taudia, bona kara maoromaoro taudia umui moia diho taudia e, umui ese dika do umui davaria momokani!

⁸Lohiabada ese hisiu oreadia edia ladana Kima bona Kesili ia karaia. Ia ese hanuaboi ena dibura ia hadokoa, daba ena diari ia hamatamaia. Ia ese dina ena diari ia hadokoa, hanuaboi ena dibura ia halaoa. Ia ese davara ena ranu ia boiria noho, bona tanobada ena kopina dekenai ia bubudia diho. Iena ladana be Lohiabada.

⁹Ia ese mai edia siahu bona goada taudia ia alaia ore noho, bona edia kohoro aukadia ia hadikaia ore noho.

¹⁰Bema kara maoromaoro tauna ese kota lalonai hereva momokani ia gwauraia, bona ia ese kara kerere taudia ia hereva auka henidia neganai, umui ese unai kara maoromaoro tauna umui badu henia noho.

¹¹Umui ese ogogami taudia umui dagedage henia, bona edia aniani umui henaoa vadaeni. Unai dainai umui ese umui haginia nadi ruma namodia lalonai do umui noho lasi. Bona umui ese umui hadoa vadaeni vain uma namodia dekena amo uaina do umui inua lasi.

¹²Umui emui kara dika ena bada herea be lau diba vadaeni, bona lau diba emui kerere edia momo be hida. Umui ese kara namo taudia umui dagedage henidia, lalona veria moni umui abia, bona ogogami taudia edia kota maoromaoro dalana umui koua noho.

¹³Inai nega be dika dainai, dika hamaoromaoroa totona kota dekenai umui lao be anina lasi. Unai dainai mai ena lalona tauna ese hereva ta do ia gwauraia lasi.

¹⁴Kara namo do umui tahua, kara dika do umui tahua lasi. Unai neganai mauri do umui davaria diba. Umui emui hereva ta be inai: “Lohiabada, Siahu Ibounai ena Dirava be umui dekenai ia noho.” Bema umui ese kara namo umui karaia neganai, momokani, Dirava be umui dekenai do ia noho.

¹⁵Kara dika do umui ura henia lasi momokani, kara namo do umui ura henia noho, bona kota maoromaoro sibona do umui karaia. Bema inai bamona umui karaia neganai, sedira umui do mauri noho taudia be Lohiabada ese do ia bogahisihisi henia.

¹⁶Unai dainai Lohiabada, Siahu Ibounai Dirava ia gwau, “Ariara ibounai lalonai do idia taitai, mai boiboi danu. Bona idia ese biru taudia do idia boiria, idia ese mase taudia totona do idia taitai. Taitai kara diba momo taudia danu do idia boiria, mase taudia totona do idia taitai, mai boiboi danu.

¹⁷Vain uma gabudia ibounai lalonai do idia taitai. Inai bamona kara ibounai be do ia vara, badina be umui emui kerere davana henia totona lau mai noho.” Lohiabada ese ia hereva vadaeni.

¹⁸Umui momo ese Lohiabada ena dina umui naria noho, ani? To umui ese lalohisihisi bada momokani do umui davaria! Unai dina dekenai dahaka namo do umui davaria? Umui laloa ia be diari ena dina, a? Lasi momokani. Inai dina be dibura ena dina umui dekenai.

¹⁹Inai dina be hegeregere tau ta ese laiona dekena amo ia heau noho, bona maoromaoro bea badana ta ese unai tau ia dogoatao! Ma inai dina be hegeregere tau ta ese iena ruma ia raka vareai, iena imana be haba dekenai ia atoa, to gaigai ta haba dekenai ia naria ese unai tau do ia koria.

²⁰Lohiabada ena dina dekenai dibura bada sibona do ia vara. Diari be do ia vara lasi. Lasi momokani.

²¹Lohiabada ia hereva, ia gwau, “Umui emui aria helagadia bona emui guriguri heboudia be lau ura lasi momokani!

²²Umui ese gabua bouboudia bona paraoa bouboudia lau dekenai umui henia gwauraia, be lau ese do lau abidia dae lasi.

²³Emui ane, mai regena bada gaudia, do umui hadokoa, bona emui gita be lau ura lasi do lau kamonai henidia. Lasi momokani.

²⁴“To lau ura henia gauna be inai: Kota maoromaoro do umui karaia, bona nega ibounai kara maoromaoro do umui karaia, ia heau lao noho hanaihanai sinavai bamona.

²⁵“Israela taudia e, umui be taunimanima idia noho lasi tano dekenai lagani 40 lalonai, umui lau hakaua noho. To unai nega lalonai boubou gaudia lau dekenai umui mailaia, a?

²⁶“To hari umui ese dirava koikoidia, king Sakutu, bona hisiu Kaiwana umui tomadiho henidia dainai, edia kaivakuku be do umui huaia lao daudau.

²⁷Badina lau ese mai guia danu, umui do lau siaia daudau, tano ta, Damaseko unai kahana dekenai. Lau Lohiabada lau hereva inai. Lauegu ladana be Siahu Ibounai Dirava.”