Read Buka Helaga (Hiri Motu) 1993 IONA 3 Bible Online

IONA 3 - Buka Helaga (Hiri Motu) 1993 bible

IONA 3

¹Vadaeni Lohiabada ese Iona dekenai ia hereva lou, ia gwau,

²“Oi toreisi, hanua badana ladana Nineva dekenai oi lao, bona oi dekenai do lau henia hereva do oi gwauraia.”

³Unai dainai, Iona ia toreisi, Nineva dekenai ia lao, Lohiabada ena hereva hegeregerena. Inai Nineva be hanua bada herea, bema tau ta ia ura kahana maguna ia lao kahana maguna dekenai do ia raka, ia be dina toi do ia raka.

⁴Iona ese hanua lalonai ia raka vareai hamatamaia, dina ta ena raka hegeregerena ia lao. Vadaeni ia haroro, ia gwau, “Dina 40 do idia ore, vadaeni Nineva hanua be do ia dika momokani.”

⁵Nineva dekenai idia noho taudia ese Dirava ena hereva idia abidadama henia. Unai dainai taunimanima ibounai ese aniani ania lasi taravatu idia gwauraia. Edia ladana bada bona ladana maragi taudia ibounai danu ese puse dabua idia karaia, edia lalona giroa toana do idia hedinaraia totona.

⁶Nineva ena king ese inai sivarai ia kamonai neganai, iena helai gauna dekena amo ia toreisi, iena dabua namona ia kokia, puse dabua ia karaia, bona lahi ena kahu lalonai ia helai diho.

⁷Ia ese oda hereva ia siaia Nineva taudia ibounai dekenai. Ia gwau: “Inai oda hereva be king bona iena lohia taudia ibounai dekena amo: Taunimanima ibounai, boromakau ibounai, mamoe ibounai danu be do idia aniani lasi, bona ranu do idia inua lasi.

⁸Taunimanima ibounai, bona boromakau bona mamoe ibounai ese puse dabua do idia karaia. Taunimanima ibounai ese Dirava dekenai do idia guriguri henia, bona edia kara dika, bona edia dika idauidau do idia rakatania.

⁹Bema inai bamona ita karaia, sedira Dirava ese iena lalona do ia giroa, bona ita be do ita mase lasi!”

¹⁰Dirava ese edia kara ia itaia, ia itaia idia ese edia kara dikadia idia rakatania. Unai dainai ia ese iena lalona ia giroa, bona idia hadikaia kara, ia ese ia karaia gwauraia gauna, ia karaia lasi.