Read Buka Helaga (Hiri Motu) 1993 NUMERA 15 Bible Online

NUMERA 15 - Buka Helaga (Hiri Motu) 1993 bible

NUMERA 15

¹Lohiabada ese Mose ia hamaoroa, ia gwau,

²“Israela taudia do oi hereva henia, do oi gwau, ‘Lohiabada ese umui dekenai do ia henia tano dekenai do umui ginidae neganai,

³boromakau tau ta, mamoe tau ta, mamoe ta, o nanigosi ta be Lohiabada dekenai gabua ore boubouna totona, o gwauhamata boubouna totona, o laloa namo boubouna, o emui aria ta boubouna totona do umui henia. Inai aniani bouboudia edia bonana be namo herea Lohiabada dekenai.

⁴“ ‘Unai neganai danu boubou do ia henia tauna ese paraoa namo herea ena metau kilogaram ta, olive dehoro, ena bada lita ta dekenai ia mikisi gauna ma do ia henia.

⁵Gabua ore boubouna, o boubou ta totona, mamoe natuna ta ta danu be uaina lita ta, ma do ia henia.

⁶“ ‘Bema mamoe tau idia henia neganai, paraoa ena metau kilogaram rua, olive dehoro, 1 lita 500 garam danu mikisi gauna, be paraoa boubouna totona do idia henia,

⁷ma uaina ena bada 1 lita 500 garam danu do idia henia. Inai bouboudia be Lohiabada dekenai edia bonana be namo herea.

⁸“ ‘Bema boromakau tau be gabua ore boubouna, o gwauhamata boubouna, o maino karaia boubouna totona Lohiabada dekenai umui henia neganai,

⁹paraoa boubouna, paraoa ena metau kilogaram toi, olive dehoro ena bada lita rua dekenai idia mikisi gauna danu do umui henia,

¹⁰mai uaina ena bada lita rua danu. Inai boubou ena bonana be Lohiabada dekenai ia namo herea.

¹¹“ ‘Boromakau tau ta ta danu, mamoe tau ta ta danu, mamoe natuna ta ta danu, bona nanigosi natuna ta ta danu henia gaudia Lohiabada dekenai be unai bamona.

¹²Bema boubou totona mauri gaudia be tamona sibona lasi neganai, paraoa bona uaina boubouna danu be tamona sibona lasi. Mauri gaudia hida do umui henia gwauraia, unai namba hegeregerena danu paraoa bona uaina bouboudia do umui henia.

¹³“ ‘Israela korikori taudia ibounai ese aniani gabua boubouna idia henia neganai, inai bamona taravatu do idia badinaia, bona Lohiabada dekenai unai boubou ena bonana be namo herea.

¹⁴“ ‘Sedira idau bese tauna ta, nega sisina o nega daudau umui emui huanai ia noho tauna ese aniani gabua boubouna, Lohiabada dekenai ena bonana be namo gauna, ia ura do ia henia. Bema ia henia neganai, ia ese boubou henia taravatu, umui ese umui badinaia gauna hegeregerena do ia badinaia.

¹⁵Umui bona umui emui huanai idia noho idau bese, umui ibounai dekenai taravatu be tamona, hari ela bona nega ibounai. Lohiabada ena vairana dekenai umui bona idia be tamona.

¹⁶Taravatu bona oda ibounai be tamona, umui, bona umui dekenai noho idau bese taudia emui latanai.’ ”

¹⁷Lohiabada ese ma Mose dekenai ia hereva lou, ia gwau,

¹⁸“Israela taudia do oi hamaoroa, inai bamona: Lau Lohiabada ese umui do lau henia tano dekenai umui ginidae neganai, inai taravatu do umui badinaia:

¹⁹Unai tano dekenai anina do umui ania hamatamaia neganai, aniani haida be harihari gauna Lohiabada dekenai do umui henia.

²⁰“Bema paraoa umui gabua neganai, beredi ginigunana, uiti anina ginigunana dekena amo be Lohiabada ena vairanai do umui atoa, ia be harihari gauna, Lohiabada ena. Inai be do umui henia, uiti kwadia gabuna dekena amo umui henia harihari gauna umui henia dalana hegeregerena.

²¹“Hari ela bona hanaihanai, inai harihari gauna be Lohiabada dekenai do umui henia, umui gabua beredi ibounai dekena amo.

²²“To bema tau ta ia diba lasi dainai inai taravatu, Lohiabada ese Mose ia henia gauna, ia badinaia lasi neganai,

²³o bema vaira neganai Israela taudia ese Lohiabada ena oda ibounai, Mose ia henia gaudia do idia badinaia lasi,

²⁴bona bema unai kerere idia karaia, badina be taravatu idia diba lasi dainai, idia ese boromakau tau do idia henia, gabua ore boubouna totona, mai bonana namona Lohiabada dekenai gauna. Paraoa bona uaina bouboudia danu nega tamona do idia henia, bona nanigosi tau, kara dika totona boubouna danu do idia henia unai neganai.

²⁵“Vadaeni hahelagaia tauna ese Israela orea ibounai edia kara dika davana do ia karaia, bona Lohiabada ese edia kara dika do ia gwauatao, badina edia kerere be idia karaia kava, idia diba lasi dainai, bona edia kerere totona aniani boubouna idia henia vadaeni Lohiabada dekenai.

²⁶Unai neganai Israela taudia bona edia huanai noho idau bese taudia danu edia kara dika be Lohiabada ese do ia gwauatao. Badina be unai kara dika kava ese taunimanima ibounai ia hakererea vadaeni.

²⁷“To bema tau ta sibona ese kara kerere ia karaia kava neganai, ia ese nanigosi hahine do ia henia, kara dika totona boubouna.

²⁸Hahelagaia tauna ese Lohiabada ena vairana dekenai unai tau ena kara dika ena davana do ia karaia, bona Lohiabada ese iena kara dika do ia gwauatao.

²⁹Inai kara kerere ia karaia kava taravatuna be tamona sibona, bese ibounai taudia edia latanai. Bema Israela tauna o Israela dekenai ia noho idau tauna ese unai bamona ia kerere neganai, taravatu be tamona sibona.

³⁰“To bema Israela tauna o Israela dekenai ia noho idau tauna ese mai hekokoroku bona mai laloa dika danu kara kerere ia karaia, inai be ia ese Lohiabada ia matauraia lasi. Vadaeni unai bamona tauna be do umui alaia mase.

³¹Badina be ia ese Lohiabada ena hereva ia negea vadaeni, bona ia ese mai hekokoroku danu, Lohiabada ena taravatu ta ia makohia vadaeni. Iena mase be ia sibona ena kerere dainai.”

³²Israela taudia be taunimanima idia noho lasi tano dekenai idia noho neganai, idia ese tau ta idia itaia, Sabati Dina dekenai lahi totona au ia gogoa noho.

³³Vadaeni unai kara ia karaia tauna idia davaria taudia ese unai tau idia abia, Mose bona Arona, bona Israela taudia ibounai dekenai idia hakaua lao.

³⁴Vadaeni idia guia, bona gabu ta dekenai idia koua, ela bona Lohiabada ese iena ura idia dekenai do ia hedinaraia.

³⁵Vadaeni Lohiabada ese Mose ia hamaoroa, ia gwau, “Inai tau be do umui alaia mase. Kamepa ena murimurina dekenai be kamepa taudia ibounai ese nadi dekena amo unai tau do idia hodoa mase.”

³⁶Vadaeni Israela taudia ibounai ese unai tau idia abia lao kamepa ena murimurinai, bona unuseni nadi dekenai idia hodoa mase, Lohiabada ese Mose ia oda henia hegeregerena.

³⁷Lohiabada ese Mose ia oda henia, ia gwau,

³⁸“Israela taudia do oi hamaoroa edia dabua edia kona dekenai varo do idia hatua namonamo, herahera edia toana bamona. Bona inai herahera gaudia ta ta edia latanai varo ta, ena kala bulu do umui kwatua. Inai bamona do umui karaia noho, ela bona nega ibounai.

³⁹Inai herahera gaudia umui itaia neganai, be lau Lohiabada egu taravatu ibounai do umui laloa, bona kamonai henia. Unai bamona neganai, umui ese lau dekena amo do umui raka siri lasi, bona umui emui laloa bona ura sibona do umui karaia lasi.

⁴⁰“Inai herahera gaudia dekena amo umui ese egu taravatu ibounai do umui laloaboio lasi, bona umui be lau, emui Dirava dekenai, do umui noho helaga momokani.

⁴¹“Lau be Lohiabada, emui Dirava. Aigupito dekena amo lau ese umui lau hakaua mai, emui Dirava do lau lao totona. Lau inai Lohiabada.”