Read Buka Helaga (Hiri Motu) 1993 NUMERA 19 Bible Online

NUMERA 19 - Buka Helaga (Hiri Motu) 1993 bible

NUMERA 19

¹Lohiabada ese Mose bona Arona ia hamaoroa, ia gwau,

²“Lohiabada ena oda ma ta be inai: Israela taudia do umui hamaoroa, boromakau hahine kakakakana ta, bero o toto ta lasi gauna, bona iena pagana dekenai metau huaia gaudia idia do atoa lasi, umui dekenai do idia mailaia.

³“Inai boromakau be hahelagaia tauna Eleasara dekenai do umui henia, ia ese kamepa ena murimurinai do ia abia lao. Vadaeni unuseni, Eleasara ena vairanai, tau ta ese unai boromakau hahine do ia alaia mase.

⁴Eleasara ese unai boromakau ena rarana haida do ia abia, bona iena ima kwakikwakina dekenai nega 7 Palai Dubu ena kahana dekenai ia noho tano dekenai do ia negea.

⁵“Inai boromakau ena tauanina ibounai, iena kopina, iena hidiona, iena rarana, bona iena bogarauna be tau ta ese do ia gabua ore, Eleasara ena vairanai.

⁶Vadaeni hahelagaia tauna ese sida audia, bona husopo muramura avana, bona varo kakakaka be boromakau idia gabua lahi ena latanai do ia negea.

⁷“Unai murinai hahelagaia tauna ese iena dabua do ia huria, bona do ia digu, vadaeni kamepa lalonai ma do ia raka vareai. To ia be do ia miro noho ela bona dina do ia diho.

⁸“Boromakau ia gabua ore tauna danu ese iena dabua do ia huria, bona do ia digu, bona ia be do ia miro noho ela bona dina do ia diho.

⁹Unai neganai miro lasi tauna ta ese boromakau ena lahi kahuna do ia haboua, bona goeva gabuna ta, kamepa ena murimurina dekenai do ia atoa. Unai kahu be do ia noho, badina Israela taudia ese do idia gaukaralaia. Idia be ranu dekenai unai kahu do idia udaia, do idia mikisi, bona inai ranu be goeva lasi kara hagoevaia totona, bona kara dika huria ore totona.

¹⁰“Unai boromakau ena kahuna ia haboua tauna ese iena dabua do ia huria, bona do ia miro noho ela bona dina do ia diho. Inai taravatu be do ia noho ela bona nega ibounai, Israela taudia totona, bona idia edia huanai noho idau taudia danu totona.”

¹¹“Bema tau ta ese mase tauna ena tauanina ia dogoatao, ia be do ia miro noho ela bona dina 7 idia ore.

¹²Ia ese unai miro hagoevaia totona ranuna dekena amo ia sibona do ia hadigua dina namba 3 bona dina namba 7 dekenai, vadaeni do ia goeva. To bema dina namba 3 dekenai, bona dina namba 7 dekenai sibona do ia hagoevaia lasi, unai tau be do ia goeva lasi.

¹³“Bema tau ta ese mase tauna ena tauanina do ia dogoatao, bona sibona ia hagoevaia lasi neganai, ia be ia miro noho, badina unai miro hagoevaia totona ranuna be ia dekenai idia do bubua lasi. Unai tau ese Lohiabada ena Palai Dubu ia hamiroa noho, bona unai dainai Israela besena dekena amo unai tau do umui atoa siri.

¹⁴“Tau ta be palai ruma ta dekenai ia mase ena taravatu be inai: Unai palai ruma idia raka vareai taudia, bona unai palai ruma dekenai idia noho taudia be do idia miro, ela bona dina 7 idia ore.

¹⁵Bona unai ruma lalonai noho hodu, uro, bona disi, koua gauna lasi gaudia danu be miro.

¹⁶“Bema tau ta ese kamepa ena murimurinai kaia dekenai ia mase tauna, o ia mase kava tauna, o mase tauna ta ena turiana ta do ia dogoatao, o bema ia ese guria gabuna ta dekenai ia kamokau neganai, unai tau be do ia miro noho ela bona dina 7 do idia ore.

¹⁷“Inai tau ena miro hagoevaia totona, unai boromakau kakakakana ena lahi kahuna be uro ta dekenai do umui udaia, bona kahu ena latanai ranu goevana do umui bubua.

¹⁸Vadaeni miro lasi tauna ta ese husopo muramura avana do ia abia, unai ranu lalonai do ia atoa, bona unai mase tauna ena palai ruma, bona lalonai noho gaudia ibounai, bona palai ruma taudia danu dekenai unai ranu do ia negea. Ma ia ese mase tauna ena turiana, o guria gabuna, o kaia dekenai mase tauna, o mase kava tauna ia dogoatao tauna danu dekenai unai ranu do ia negea lao.

¹⁹Unai goeva tauna ese dina namba 3 bona dina namba 7 dekenai miro tauna ena latanai unai ranu do ia negea. Vadaeni dina namba 7 dekenai ia ese miro tauna do ia hagoevaia haorea. Badina be unai miro tauna ese unai dina dekenai iena dabua do ia huria, bona ranu dekenai do ia digu, bona dina do ia diho neganai ia be goeva.

²⁰“To bema miro tauna ta ese sibona ia hagoevaia lasi neganai, ia be Israela taudia dekena amo do umui atoa siri, badina be ia ese Lohiabada ena Palai Dubu ia hamiroa noho. Badina unai miro hagoevaia ranuna be ia dekenai idia bubua lasi dainai unai tau be ia miro noho.

²¹Inai taravatu be noho hanaihanai taravatuna. “Unai miro hagoevaia ranuna ia negea tauna ese danu iena dabua do ia huria. Bona unai ranu dekenai ia kamokau tauna be do ia miro noho ela bona dina do ia diho.

²²Miro tauna ese ia dogoatao gaudia ibounai danu be idia miro, bona unai gaudia ma idia dogoatao taudia danu do idia miro ela bona dina do ia diho.”