Read Buka Helaga (Hiri Motu) 1993 NUMERA 22 Bible Online

NUMERA 22 - Buka Helaga (Hiri Motu) 1993 bible

NUMERA 22

¹Israela taudia idia laolao lou, Moaba tanona ena tano palaka gabuna dekenai idia kamepa. Unai gabu be Ioridane Sinavai ena dina daekau kahana, bona Ieriko unai kahana dekenai.

²Balaki Siporo be Moaba ena king. Ia be Israela taudia edia kara sivarai ia kamonai, Amoro taudia idia halusia, bona Israela taudia be momo herea.

³Vadaeni ia bona Moaba taudia ibounai idia gari bada herea.

⁴Moaba taudia ese Midiana gunalaia taudia idia hamaoroa, idia gwau, “Inai taunimanima momo herea ese gabu ibounai do idia hadikaia ore, boromakau ese rei ia ania ore bamona.” Unai dainai Moaba ena king, Balaki Siporo,

⁵ese iena hesiai taudia ia siaia, Balama Beoro do idia abia mai totona. Balama Beoro be Petoro dekenai, Euperate Sinavai ena badibadinai, Amawa tano dekenai ia noho. Hesiai taudia idia gwau, “Balaki be inai bamona ia gwau, ‘Bese ta Aigupito dekena amo idia mai vadaeni, idia be momo herea, tano ibounai idia koua, bona lauegu tano ena badibadinai idia kamepa noho.

⁶Mani emu kara do oi mai, inai bese be oiemu meamea dekena amo do oi hadikaia, badina be edia goada ese lauegu bese ena goada ia hereaia. Bema oi hadikadia neganai, sedira lauegu bese ese idia do ia halusia diba, bona aiemai tano dekena amo do ai luludia diba. Badina be, lau diba oi ese oi hanamoa taudia idia namo, to oi ese oi hadikaia taudia do idia dika.’ ”

⁷Unai dainai Moaba bona Midiana gunalaia taudia ese unai meamea ena davana idia abia lao. Idia lao Balama dekenai, bona Balaki ena hereva idia hamaoroa.

⁸Balama ia haere, ia gwau, “Hari hanuaboi iniseni do umui mahuta, bona Lohiabada ena hereva lau dekenai be kerukeru umui dekenai do lau hamaoroa.” Vadaeni Moaba gunalaia taudia be Balama dekenai idia noho.

⁹Vadaeni Dirava be Balama dekenai ia mai, ia gwau, “Inai oi dekenai idia noho taudia be daika?”

¹⁰Balama ese Dirava dekenai ia haere, ia gwau, “Balaki Siporo, Moaba ena king ese lau dekenai idia ia siaia mai. Idia gwau,

¹¹‘Bese ta Aigupito dekena amo idia mai vadaeni, be momo herea, bona tano ibounai idia koua noho. Balaki ia ura meamea dekenai unai bese do lau hadikaia, ia ese idia do ia lulua lao totona.’ ”

¹²Dirava ese Balama dekenai ia hamaoroa, ia gwau, “Inai Moaba bona Midiana taudia danu do oi lao lasi, bona unai Israela besena do oi hadikaia lasi, badina be lau ese Israela lau hanamoa vadaeni.”

¹³Daba neganai Balama ia toreisi, Balaki ena hesiai taudia ia hamaoroa, ia gwau, “Emui tano dekenai do umui giroa lou, badina be Lohiabada ese lauegu dala ia koua, ia gwau umui danu do lau lao lasi.”

¹⁴Vadaeni Balaki dekenai idia giroa lou, idia gwau, “Balama be ia kamonai henia lasi, ai danu ia mai lasi.”

¹⁵Vadaeni kerukeru Balaki ese lohia taudia ma haida ia siaia, ia siaia guna taudia be momo lasi bona dagi maragi taudia sibona. To hari ia siaia taudia be momo, bona idia be dagi bada taudia.

¹⁶Idia be Balama dekenai idia lao, idia gwau, “Balaki be inai bamona ia gwau, ‘Mani emu kara, lau dekenai oi mai, oiemu dala ia koua gauna do oi laloa lasi.

¹⁷Badina lau ese davana namo herea oi dekenai do lau henia, bona lau dekenai oi hereva gauna be do lau karaia. Mani oi mai, bona unai bese Israela do oi hadikaia, lauegu noinoi dainai.’ ”

¹⁸To Balama ese Balaki ena hesiai taudia dekenai ia haere, ia gwau, “Bema Balaki ese iena ruma badana mai ena siliva bona golo ibounai lau do ia henia gwauraia, to Lohiabada, lauegu Dirava, ena oda do lau utua diba lasi. Iena oda be lau hamaragia bona habadaia diba lasi danu.

¹⁹To hari hanuaboi mani iniseni do umui mahuta, hesiai taudia gunadia bamona. Unai neganai Lohiabada ena hereva lau dekenai do lau diba.”

²⁰Unai hanuaboi Dirava be Balama dekenai ia mai, ia gwau, “Inai taudia be oi idia boiria totona idia mai vadaeni. Vadaeni, oi toreisi, idia danu oi lao, to lau ese oi dekenai lau hamaoroa gauna sibona do oi karaia.”

²¹Unai dainai Balama be kerukeru dabai ia toreisi, iena doniki ia abia hegaegae, Moaba lohia taudia danu ia lao.

²²To Balama ia lao dainai, Dirava be ia badu, bona Lohiabada ena aneru ta be dala dekenai ia gini, Balama do ia koua totona. Balama be iena doniki dekenai ia guia, bona iena hesiai taudia rua be ia danu idia lao noho.

²³Inai doniki ese Lohiabada ena aneru ia itaia, dala dekenai ia gini, mai ena tuari kaia iena imana dekenai. Vadaeni doniki be dala dekena amo ia raka siri, rei dekenai. To Balama ese doniki ia botaia, dala dekenai ma do ia lao totona.

²⁴Vadaeni Lohiabada ena aneru be dala ia maragi gabuna dekenai ia gini. Unai dala be vain idia tubu umadia rua edia huanai, bona unai dala kahana kahana dekenai be nadi magudia.

²⁵Doniki ese Lohiabada ena aneru ma ia itaia, vadaeni ia raka siri, magu badibadinai ia raka. Bona Balama ena aena be magu nadidia dekenai ia botaia, ia bero. Vadaeni Balama ese doniki ia botaia lou.

²⁶Unai neganai Lohiabada ena aneru ma vaira dekenai ia lao, dala ia maragi herea gabuna dekenai ia gini, idiba bona lauri kahana be raka siri dala lasi.

²⁷Doniki ese Lohiabada ena aneru ma ia itaia, vadaeni doniki be tano dekenai ia hekure diho, Balama henunai. Balama be ia badu dikadika, bona iena au dekena amo doniki ia dadabaia.

²⁸Vadaeni Lohiabada ese doniki ena uduna ia kehoa, bona ia ese Balama dekenai ia hereva, ia gwau, “Lau be dahaka lau karaia oi dekenai, to oi ese lau oi botaia nega toi?”

²⁹Balama ese doniki dekenai ia haere, ia gwau, “Oi ese kavakava tauna bamona lau oi halaoa. Bona bema lauegu imana dekenai tuari kaia ia noho neganai, oi do lau alaia mase.”

³⁰Doniki ese Balama dekenai ma ia hereva, ia gwau, “Lau be oiemu doniki, ani? Oiemu mauri dinadia ibounai lauegu doruna dekenai oi loaloa vadaeni, ani? Lau be nega ta inai bamona lau karaia, a?” Balama ia gwau, “Lasi.”

³¹Unai neganai Lohiabada ese Balama ena matana ia kehoa, vadaeni Balama ese Lohiabada ena aneru ia itaia dala dekenai, iena imana dekenai be tuari kaia ia noho. Vadaeni Balama be ia tui diho, bona iena vairana be tano dekenai ia atoa.

³²Lohiabada ena aneru ese ia nanadaia, ia gwau, “Badina dahaka oiemu doniki nega toi oi botaia? Oi itaia, lau be oi koua totona inai gabu dekenai lau gini, badina be oiemu kara be dika lauegu vairana dekenai.

³³Doniki ese lau ia itaia, bona nega toi lau dekena amo ia raka siri. Bema ia raka siri lasi neganai, lau ese oi do lau alaia mase, to ia do lau hamauria.”

³⁴Balama ese Lohiabada ena aneru dekenai ia haere, ia gwau, “Lau be lau kerere, badina lau diba lasi oi be dala dekenai oi gini, lauegu dala oi koua. To bema oi laloa inai laolao be dika, lau be do lau giroa lou.”

³⁵Lohiabada ena aneru ese Balama ia hamaoroa, ia gwau, “Idia danu do oi lao, to lau ese oi dekenai lau hamaoroa hereva sibona do oi gwauraia.” Vadaeni Balama be Balaki ena lohia taudia danu ia lao.

³⁶Balaki be ia kamonai Balama ia mai noho, vadaeni ia be Moaba ena hanua ta ladana Ara dekenai ia lao, Balama danu ia hedavari totona. Ara be Aranona Sinavai ena badibadinai ia noho, Moaba ena tano hetoa gabuna dekenai.

³⁷Balaki ese Balama dekenai ia hereva, ia gwau, “Hesiai taudia lau siaia, oi boiria totona, ani? Badina dahaka lau oi kamonai henia lasi? Lau ese oi lau hanamoa diba lasi, a?”

³⁸Balama ese Balaki dekenai ia haere, ia gwau, “Lau mai vadaeni, ani? To lau be siahu lasi hereva ta do lau gwauraia. Dirava ese lau dekenai ia hamaoroa hereva sibona lau gwauraia diba.”

³⁹Vadaeni Balama be Balaki danu ia lao, Kiriata Husoto hanua dekenai idia ginidae.

⁴⁰Balaki ese boubou gaudia ia alaia, boromakau bona mamoe. Bona edia vamu haida be Balama dekenai, bona ia idia bamoa lohia taudia dekenai ia henidia.

⁴¹Kerukeru dabai Balaki ese Balama ia hakaua, Bamoto Bala ena ataiai gabuna dekenai idia daekau lao. Unai gabu dekena amo Balama ese Israela taudia edia kamepa kahana ia itaia.