Read Buka Helaga (Hiri Motu) 1993 NUMERA 25 Bible Online

NUMERA 25 - Buka Helaga (Hiri Motu) 1993 bible

NUMERA 25

¹Israela taudia be Akasia Koura dekenai idia kamepa neganai, edia tatau ese Moaba hahine idia sihari henidia.

²Inai hahine ese unai Israela taudia idia boiria, Moaba dirava ena boubou karadia do idia durua. Vadaeni Israela taudia ese unai boubou aniani idia ania, bona Moaba dirava dekenai idia tomadiho.

³Unai dala dekenai Israela taudia ese Peoro ena dirava Bala idia tomadiho henia. Unai kara dainai Lohiabada ese ia badu henidia.

⁴Vadaeni Lohiabada ese Mose ia hamaoroa, ia gwau, “Israela ena gunalaia taudia ibounai do oi haboua, bona dina ena diari korikori dekenai inai dika taudia do umui taua dae, idia mase, taunimanima ibounai edia vairanai, bona unai neganai taunimanima dekenai do lau badu noho lasi.”

⁵Mose ese Israela ena kota biaguna taudia ia hamaoroa, ia gwau, “Umui ta ta ese emui iduhu taudia, Peoro ena dirava Bala idia tomadiho henia taudia, do umui alaia mase.”

⁶Unai neganai Mose bona Israela taudia be Palai Dubu ena iduara vairanai idia haboua, mai taitai danu. Vadaeni idia edia vairanai, Israela tauna ta ese iena palai ruma dekenai, Midiana hahine ta ia hakaua lao.

⁷Pineha Eleasara, hahelagaia tauna Arona ena tubuna ese unai tau bona hahine ia itaia, vadaeni ia toreisi, hebou ia rakatania. Ia ese iena imana dekenai io ta ia abia,

⁸bona unai tau bona hahine edia murinai ia raka, palai ruma lalonai ia raka vareai. Unuseni ia ese idia ruaosi ia gwadaia mase, tau bona hahine danu, nega tamona. Unai kara dainai, hanaia gorere dikana be Israela dekenai ia doko.

⁹To unai hanaia gorere dikana ese Israela taudia ibounai 24,000 ia alaia mase vadaeni.

¹⁰Lohiabada ese Mose ia hamaoroa, ia gwau,

¹¹“Pineha Eleasara, hahelagaia tauna Arona ena tubuna, ese lauegu badu be Israela taudia dekena amo ia abia lao. Pineha be, iena kudouna ia ura lasi momokani, Israela taudia ese dirava idauna ta do idia tomadiho henia, to lau sibona ia ura henia. Iena kara dainai, egu badu be ia keru lao, bona Israela taudia ibounai lau hamasea ore lasi.

¹²“Unai dainai Pineha do oi hamaoroa, lau ese gwauhamata ia dekenai lau karaia inai, noho hanaihanai doko lasi gwauhamata.

¹³Pineha bona iena tubuna taudia ibounai ese hahelagaia taudia edia dagi do idia dogoatao noho, ela bona nega ibounai. Badina be mai ena kudouna ibounai, ia ura lasi Israela taudia ese dirava idauna ta do idia tomadiho henia. Ia ura lau, Lohiabada sibona be edia Dirava, bona iena kara dainai, lau ese taunimanima edia dika lau gwauatao.”

¹⁴Unai Israela tauna, Midiana hahine danu ia gwadaia nega tamona tauna ena ladana be Simiri Salu, Simeona iduhu ena lohia ta.

¹⁵Unai Midiana hahine, ia gwadaia mase hahine, ena ladana be Kosobi Suru. Iena tamana Suru be iduhu ta ena lohia, Midiana dekenai.

¹⁶Lohiabada ese Mose ia hamaoroa, ia gwau,

¹⁷“Midiana taudia do umui tuari henia, bona do umui hisihisi henidia.

¹⁸Badina be idia ese Peoro ena dirava dekena amo umui idia koia dainai, idia ese umui idia hadikaia. Bona badina ta danu, be Kosobi, Midiana ena lohia natuna dainai. Kosobi be unai hahine, Pineha ese ia gwadaia mase, Israela taudia dekenai gorere dikana ia vara neganai.”