Read Buka Helaga (Hiri Motu) 1993 NUMERA 26 Bible Online

NUMERA 26 - Buka Helaga (Hiri Motu) 1993 bible

NUMERA 26

¹Gorere ia doko murinai, Lohiabada ese Mose bona Eleasara Arona ia hamaoroa, ia gwau,

²“Israela taudia edia bese ta ta ibounai do umui duahia, edia mauri lagani be 20 idia hanaia tatau ibounai, tuari totona do idia lao diba taudia ibounai do umui duahia.”

³Vadaeni Moaba ena tano palaka gabuna dekenai, Ioridane Sinavai ena badibadinai, Ieriko kahirakahira, Mose bona hahelagaia tauna Eleasara ese taunimanima idia hamaoroa, idia gwau,

⁴“Edia mauri lagani 20, bona 20 idia hanaia tatau ibounai do umui duahia, Lohiabada ese Mose ia oda henia hegeregerena.” Israela taudia, Aigupito dekena amo idia raka mai taudia be inai:

⁵Rubena be Iakobo ena natuna vara guna. Rubena ena natuna be Hanoka, Hanoka iduhu ia havaraia tauna, bona Palu, Palu iduhu ia havaraia tauna,

⁶bona Hesarona, Hesarona iduhu ia havaraia tauna, bona Karami, Karami iduhu ia havaraia tauna.

⁷Rubena ena natuna edia iduhu ibounai be unai, bona edia tatau ibounai be 43,730.

⁸Palu ena natuna ta be Eliaba.

⁹Eliaba ena natuna be Nemuele bona Datana bona Abirama. Inai Datana bona Abirama be Israela taudia orea ta ese idia abia hidi, vadaeni idia ruaosi bona Kora ese Mose bona Arona idia heai henia, bona idia ese danu Lohiabada idia heai henia.

¹⁰Ela bona tano ese iena uduna ia kehoa, bona idia ia hadonoa ore, idia bona Kora, bona Kora ena orea taudia, vadaeni idia ibounai idia mase. Unai neganai danu, lahi ese taunimanima 250 ia gabua mase. Inai be sisiba, bona matakani gauna, Israela taudia edia latanai.

¹¹To Kora ena natuna tau be idia mase lasi.

¹²Simeona ena natuna, bona edia iduhu be inai: Nemuele, Nemuele iduhu ia havaraia tauna, bona Iamina, Iamina iduhu ia havaraia tauna, bona Iakini, Iakini iduhu ia havaraia tauna.

¹³Bona Sera, Sera iduhu ia havaraia tauna, bona Saulo, Saulo iduhu ia havaraia tauna.

¹⁴Simeona ena natuna edia iduhu ibounai be unai, bona edia tatau ibounai be 22,200.

¹⁵Gado ena natuna, bona edia iduhu be inai: Sepona, Sepona iduhu ia havaraia tauna, bona Hagi, Hagi iduhu ia havaraia tauna, bona Suni, Suni iduhu ia havaraia tauna.

¹⁶Bona Osini, Osini iduhu ia havaraia tauna, bona Eri, Eri iduhu ia havaraia tauna, bona Aroda, Aroda iduhu ia havaraia tauna,

¹⁷bona Areli, Areli iduhu ia havaraia tauna.

¹⁸Gado ena natuna edia iduhu ibounai be unai, bona edia tatau ibounai be 40,500.

¹⁹Iuda ena natuna rua, Ere bona Onana, be Kanana dekenai idia mase.

²⁰Iuda ena natuna, bona edia iduhu be inai: Sela, Sela iduhu ia havaraia tauna, bona Perese, Perese iduhu ia havaraia tauna, bona Sera, Sera iduhu ia havaraia tauna.

²¹Perese ena natuna be Hesarona, Hesarona iduhu ia havaraia tauna, bona Hamulu, Hamulu iduhu ia havaraia tauna.

²²Iuda ena natuna edia iduhu ibounai be unai, bona edia tatau ibounai be 76,500.

²³Isakara ena natuna bona edia iduhu be inai: Tola, Tola iduhu ia havaraia tauna, bona Puva, Punu iduhu ia havaraia tauna,

²⁴bona Iasubu, Iasubu iduhu ia havaraia tauna, bona Simarona, Simarona iduhu ia havaraia tauna.

²⁵Isakara ena natuna edia iduhu ibounai be unai, bona edia tatau ibounai be 64,300.

²⁶Sebuluno ena natuna bona edia iduhu be inai: Sereda, Sereda iduhu ia havaraia tauna, bona Elono, Elono iduhu ia havaraia tauna, bona Ialila, Ialila iduhu ia havaraia tauna.

²⁷Sebuluno ena natuna edia iduhu ibounai be unai, bona edia tatau ibounai be 60,500.

²⁸Iosepa ena natuna bona edia iduhu be inai: Manase bona Eparaima.

²⁹Manase ena natuna be inai: Makiri, Makiri iduhu ia havaraia tauna, bona Gileada Makiri, Gileada iduhu ia havaraia tauna.

³⁰Gileada ena natuna be inai: Iesere, Iesere iduhu ia havaraia tauna, bona Heleke, Heleke iduhu ia havaraia tauna,

³¹bona Asariele, Asariele iduhu ia havaraia tauna, bona Sekema, Sekema iduhu ia havaraia tauna,

³²bona Semida, Semida iduhu ia havaraia tauna, bona Hepere, Hepere iduhu ia havaraia tauna.

³³Selopehada Hepere be natuna tau ta lasi, hahine sibona. Selopehada ena natuna hahine edia ladana be Mahala bona Noa bona Hogila bona Milika bona Tirisa.

³⁴Manase ena natuna edia iduhu ibounai be unai, bona edia tatau ibounai be 52,700.

³⁵Eparaima ena natuna bona edia iduhu be inai: Sutela, Sutela iduhu ia havaraia tauna, bona Bekere, Bekere iduhu ia havaraia tauna, bona Tahana, Tahana iduhu ia havaraia tauna.

³⁶Sutela ena natuna be Erana, Erana ena iduhu ia havaraia tauna.

³⁷Eparaima ena natuna edia iduhu ibounai be unai, bona edia tatau ibounai be 32,500. Unai be Iosepa dekena amo idia vara iduhu taudia.

³⁸Beniamina ena natuna bona edia iduhu be inai: Bela, Bela iduhu ia havaraia tauna, bona Asabela, Asabela iduhu ia havaraia tauna, bona Ahirama, Ahirama iduhu ia havaraia tauna.

³⁹Bona Sepupama, Sepupama iduhu ia havaraia tauna, bona Hupama, Hupama iduhu ia havaraia tauna.

⁴⁰Bela ena natuna be Arada bona Namana. Arada be Arada iduhu ia havaraia, bona Namana ese Namana iduhu ia havaraia.

⁴¹Beniamina ena natuna edia iduhu ibounai be unai, bona edia tatau ibounai be 45,600.

⁴²Dano ena natuna be Suhama, Suhama iduhu ia havaraia tauna. Dano ena natuna ena iduhu be unai.

⁴³Bona inai iduhu Suhama ena tatau ibounai be 64,400.

⁴⁴Asere ena natuna bona edia iduhu be inai: Imina, Imina iduhu ia havaraia tauna, bona Isivi, Isivi ena iduhu ia havaraia tauna, bona Beria, Beria ena iduhu ia havaraia tauna.

⁴⁵Beria ena natuna be inai: Hebere, Hebere iduhu ia havaraia tauna, bona Malakiela, Malakiela iduhu ia havaraia tauna.

⁴⁶Asere ena natuna hahine ena ladana be Sera.

⁴⁷Asere ena natuna edia iduhu ibounai be unai, bona edia tatau ibounai be 53,400.

⁴⁸Napatali ena natuna bona edia iduhu be inai: Iasila, Iasila ena iduhu ia havaraia tauna, bona Guni, Guni iduhu ia havaraia tauna,

⁴⁹bona Iesa, Iesa iduhu ia havaraia tauna, bona Silema, Silema iduhu ia havaraia tauna.

⁵⁰Napatali ena natuna edia iduhu ibounai be unai, bona edia tatau ibounai be 45,400.

⁵¹Israela tatau ibounai be 601,730.

⁵²Lohiabada ese Mose ia hamaoroa, ia gwau,

⁵³“Tano be inai iduhu edia huanai do oi haria, edia ladana, bona edia taunimanima hida hegeregerena do oi haria.

⁵⁴Iduhu badana dekenai be tano badana do oi henia, to iduhu maragina dekenai tano maragina do oi henia. Iduhu ta ta edia tano ena bada be edia taunimanima hida hegeregerena.

⁵⁵To laki dalana dekenai danu iduhu ta ta edia tano do oi haria, edia tamana edia iduhu ladana dekena amo do oi henia.

⁵⁶Edena tano iduhu badadia do idia abia, be laki dekena amo do oi gwauraia. Ma iduhu maragidia danu be laki dekena amo edia tano ta ta danu do oi gwauraia.”

⁵⁷Levi taudia danu edia iduhu ta ta dekena amo idia duahia. Geresone ese Geresone iduhu ia havaraia, Kohata ese Kohata iduhu ia havaraia, bona Merari ese Merari iduhu ia havaraia.

⁵⁸Levi edia iduhu maragidia be inai: Libini, bona Heberona bona Mali bona Musi bona Kora. Kohata be Amarama ena tamana.

⁵⁹Amarama ena adavana ena ladana be Iokebedi, Levi ena natuna hahine, Aigupito dekenai ia vara. Iokebedi ese Amarama dekena amo ia havaraia natuna be Arona bona Mose, bona edia taihuna Miriama.

⁶⁰Arona ena natuna be Nadaba bona Abihu bona Eleasara bona Itamara.

⁶¹To Nadaba bona Abihu be idia mase, lahi idauna, helaga lasi gauna, Lohiabada ena vairanai idia gabua dainai.

⁶²Levi taudia idia duahia, bona idia ibounai be 23,000. Unai be memero bona tatau, hua ta idia hanaia vadaeni taudia ibounai. Israela taudia danu Levi taudia idia duahia hebou lasi, badina be Levi taudia dekenai Israela taudia edia huanai tano ta idia henia lasi.

⁶³Inai iduhu ibounai be Mose bona Eleasara ese idia duahia, Moaba ena tano palaka, Ioridane Sinavai unai kahanai bona Ieriko kahirakahira Israela taudia idia duahia neganai.

⁶⁴To Mose bona Arona ese Israela taudia idia duahia nega ginigunana, Sinai ena tano kaukau dekenai neganai, be unai idia duahia taudia ta ia do mauri noho lasi.

⁶⁵Badina be Lohiabada ese idia ia hamaoroa vadaeni, ia gwau idia ibounai be tano kaukau dekenai do idia mase. Unai dainai idia ta ia mauri lasi, Kaleba Iepune bona Iosua Nunu, idia ruaosi sibona idia do mauri noho.