Read Buka Helaga (Hiri Motu) 1993 NUMERA 27 Bible Online

NUMERA 27 - Buka Helaga (Hiri Motu) 1993 bible

NUMERA 27

¹Mahala, bona Noa, bona Hogila, bona Milika bona Tirisa be Selopehada Hepere ena natuna hahine. Selopehada Hepere be Gileada ena natuna. Gileada be Makiri ena natuna, Makiri be Manase ena natuna. Manase be Iosepa ena natuna.

²Unai hahine taudia be idia lao, Mose, hahelagaia tauna Eleasara, gunalaia taudia, bona Israela taudia ibounai edia vairanai idia gini, Lohiabada ena Palai Dubu ena iduara dekenai. Unai hahine idia gwau,

³“Aiemai tamana be tano kaukau dekenai ia mase neganai, ia be mai ena natuna tau ta lasi. Ia be Kora ena orea taudia edia hebou ia vareai lasi, ia ese Lohiabada ia heai henia lasi, to ia sibona ena kara dika dainai ia mase.

⁴Badina be dahaka aiemai tamana ena ladana be iena iduhu dekena amo do idia kokia, ia be natuna tau lasi dainai? Aiemai tamana ena varavara taudia edia huanai, be tano haida ai dekenai do umui henia.”

⁵Mose ese idia edia noinoi Lohiabada dekenai ia hamaoroa.

⁶Vadaeni Lohiabada ese Mose ia hamaoroa, ia gwau,

⁷“Selopehada ena natuna hahine edia hereva be maoro, edia tamana ena varavara edia huanai, tano haida do oi henia, edia tamana ena tano kahana be idia ese do idia abia.

⁸Inai danu, Israela taudia do oi hamaoroa, bema tau ta ia mase, mai ena natuna tau lasi, iena natuna hahine ese iena tano o kohu do ia abia.

⁹Bema unai tau be mai ena natuna hahine lasi danu, iena tano o kohu be iena tadikakana dekenai do umui henia.

¹⁰“Bema ia be mai ena tadikakana lasi, iena tano o kohu be iena tamana maragi dekenai do umui henia.

¹¹To bema ia be mai tamana maragi lasi, iena tano o kohu be iena varavara ta dekenai do umui henia, ia ese do ia dogoatao, iena. Inai be taravatu bona oda Israela taudia edia latanai, lau Lohiabada ese Mose dekenai lau henia hegeregerena.”

¹²Lohiabada ese Mose ia hamaoroa, ia gwau, “Inai ororo ladana Abarima dekenai do oi daekau lao, oiemu matana do oi negea, Israela taudia dekenai lau henia tanona do oi itaia.

¹³Unai tano oi itaia murinai, oi be do oi mase, oiemu kakana Arona ia mase bamona.

¹⁴Badina be umui ruaosi ese Sini taunimanima noho lasi tano dekenai lauegu hereva umui utua dainai. Unai neganai, Israela taudia ibounai ese Meriba dekenai lau dekenai idia maumau, to lauegu siahu helagana be unai taudia edia vairanai oi gwauraia hedinarai lasi.” Unai Meriba be ranu gabuna. Ia be Kadesi kahana, Sini taunimanima noho lasi gabuna dekenai.

¹⁵Mose ese Lohiabada dekenai ia haere, ia gwau,

¹⁶“Lohiabada e, oi be taunimanima ibounai edia laumadia edia Dirava, mani emu kara tau ta do oi abia hidi, Israela do ia gunalaia.

¹⁷Ia ese tuari dekenai do ia gunalaidia bona naridia. Vadaeni Lohiabada ena orea taudia be do idia noho kava lasi, mai edia naria tauna lasi mamoe bamona.”

¹⁸Lohiabada ese Mose ia hamaoroa, ia gwau, “Iosua Nunu do oi abia, ia be Lauma ese ia abia tauna ta, oiemu imana be iena kwarana latanai do oi atoa.

¹⁹Vadaeni Iosua be hahelagaia tauna ena vairanai, bona Israela taudia edia vairanai do oi haginia. Unai neganai oi ese oiemu dagi ia dekenai do oi henia.

²⁰Oiemu siahu dekena amo Iosua do oi hasiahua, vadaeni Israela taudia ibounai ese ia do idia kamonai henia.

²¹Iosua be hahelagaia tauna Eleasara ena vairanai do ia gini, vadaeni Eleasara ese ia dainai Lohiabada ena ura do ia tahua, Urima bona Tumima dekena amo. Vadaeni Iosua ena oda hereva dekenai, Israela taudia ibounai do idia raka lao, bona do idia raka vareai, orea tamona.”

²²Mose ese Lohiabada ena oda hegeregerena ia karaia. Iosua ia abia, hahelagaia tauna Eleasara bona Israela hebou taudia edia vairanai ia haginia.

²³Vadaeni Mose ese iena imana Iosua ena kwarana latanai ia atoa, iena dagi ia henia, Lohiabada ese Mose ia hamaoroa hegeregerena.