Read Buka Helaga (Hiri Motu) 1993 NUMERA 28 Bible Online

NUMERA 28 - Buka Helaga (Hiri Motu) 1993 bible

NUMERA 28

¹Lohiabada ese Mose ia hereva henia, ia gwau,

²“Israela taudia do oi hamaoroa, egu boubou gaudia, lahi dekenai umui gabua ore, lau totona edia bonana be namo gaudia, do umui laloa noho, bona lau dekenai do umui henia noho, edia nega korikori dekenai.

³“Ma idia do oi hamaoroa, lahi bouboudia lau Lohiabada dekenai do idia henia be inai: Dina ta ta dekena amo, mamoe natudia tau rua, lagani tamona gaudia, bero lasi bona toto lasi gaudia, do umui henia, emui gabua ore bouboudia, ela bona nega ibounai.

⁴Mamoe ena natuna ta be daba dekenai do umui henia, bona mamoe iharuana be adorahi neganai do umui henia.

⁵“Inai mamoe ta ta danu be paraoa boubou do umui henia, paraoa namo herea ena metau be kilogaram ta, olive dehoro namo herea ena bada lita ta dekena amo umui mikisi gauna.

⁶Inai boubou ruaosi be dina ibounai do umui henia, idia gabua ore gaudia. Sinai Ororo dekenai inai bamona bouboudia idia henia hamatamaia. Ia be aniani boubouna, mai bonana namo Lohiabada dekenai.

⁷“Uaina bouboudia be, mamoe ginigunana, dabai gauna umui gabua neganai, do umui henia. Unai uaina ena bada lita ta, be boubou patana ena latanai do umui bubua.

⁸“Adorahi neganai danu, mamoe iharuana be dabai gauna hegeregerena do umui gabua ore, mai ena uaina boubou danu. Inai danu be aniani boubouna, mai ena bonana namo, Lohiabada ena.

⁹“Sabati Dinana dekenai, mamoe natuna tau rua, lagani tamona gaudia do umui henia. Idia be namodia momokani, bero o toto lasi gaudia. Ma paraoa ena metau kilogaram rua, olive dehoro dekena amo mikisi gauna, bona uaina boubou danu do umui henia.

¹⁰Inai gabua ore boubouna be Sabati Dinadia ibounai do umui henia, dina ibounai bouboudia danu do umui henidia hebou, mai edia uaina bouboudia danu.

¹¹“Hua matamata dinadia dekenai gabua ore boubouna be Lohiabada dekenai do umui henia inai bamona: Boromakau natudia tau rua, mamoe tau ta, bona mamoe natudia tau 7, lagani tamona gaudia, namodia momokani, bero o toto lasi.

¹²Paraoa bouboudia danu do umui henia, inai paraoa be olive dehoro danu do umui mikisi inai bamona: Boromakau ta ta danu be paraoa kilogaram toi, mamoe tau danu be paraoa kilogaram rua,

¹³bona mamoe natuna ta ta danu be paraoa kilogaram ta. Inai gabua ore bouboudia be aniani bouboudia, Lohiabada ena, bona Lohiabada dekenai edia bonana be namo herea.

¹⁴“Uaina bouboudia be inai: Boromakau ta ta danu uaina lita rua, mamoe tau danu, uaina lita ta, 500 garam, bona mamoe natuna ta ta danu uaina lita ta. Inai be hua ta ta edia dina ginigunana edia gabua ore bouboudia, lagani ena hua ta ta ibounai lalonai.

¹⁵Bona dina ibounai dekenai be nanigosi tau ta, kara dika boubouna totona do umui henia. Inai ibounai be dina ibounai ena gabua ore boubouna, bona iena uaina boubouna danu do umui henia hebou.

¹⁶“Hua ginigunana ena dina namba 14 be Lohiabada ena Pasova do umui karaia.

¹⁷Inai hua ena dina namba 15 dekenai, aria do umui ania hamatamaia ia lao bona dina 7 ia ore, bona unai dina 7 lalonai mai hatubua gauna lasi paraoa sibona do umui ania.

¹⁸“Unai aria ena dina ginigunana dekenai Lohiabada tomadiho henia totona do umui haboua, bona gaukara ta do umui karaia lasi.

¹⁹To lahi ese do ia gabua ore boubouna Lohiabada dekenai do umui henia, boromakau natuna tau rua, mamoe tau ta, bona mamoe natudia tau ibounai 7 do umui henia, ibounai namodia momokani, bero o toto lasi gaudia.

²⁰“Paraoa boubouna danu, olive dehoro danu mikisi gauna do umui henia, boromakau ta ta danu be paraoa kilogaram toi, mamoe tau danu be paraoa paraoa kilogaram rua,

²¹bona mamoe ta ta danu be kilogaram ta.

²²“Nanigosi tau ta danu do umui henia, kara dika boubouna totona. Inai bamona do umui karaia, emui kara dika ena davana karaia totona.

²³Inai boubou do umui karaia, ma dina ibounai bouboudia dabai bona adorahi gaudia do umui karaia noho.

²⁴“Unai dina 7 lalonai unai vamu bouboudia be dina ta ta Lohiabada dekenai do umui gabua ore, bonana namo Lohiabada ena, ma dina ibounai gabua ore bouboudia, bona ena uaina bouboudia danu do umui henia hebou.

²⁵“Dina namba 7 dekenai Lohiabada tomadiho totona do umui haboua, bona gaukara ta do umui karaia lasi.

²⁶“Uma ena Anina Utua aria ena dina ginigunana dekenai umui ese uiti ena anina matamata Lohiabada dekenai umui henia neganai, umui ese Lohiabada tomadiho henia totona do umui haboua, bona gaukara ta do umui karaia lasi.

²⁷“Gabua ore boubouna Lohiabada dekenai do umui henia, Lohiabada dekenai bonana namo gauna, inai bamona: Boromakau natuna tau rua, mamoe tau ta, bona mamoe natuna tau ibounai 7, lagani tamona gaudia, namodia momokani, bero o toto lasi gaudia.

²⁸“Paraoa boubou danu do umui henia, paraoa bona olive dehoro idia mikisi gauna inai bamona: Boromakau ta ta danu be paraoa kilogaram toi, mamoe tau danu be paraoa kilogaram rua,

²⁹bona mamoe natuna ta ta danu be paraoa kilogaram ta.

³⁰“Ma nanigosi tau ta, kara dika boubouna totona do umui henia. Inai bamona do umui karaia, emui kara dika davana karaia totona.

³¹“Inai anina utua boubou be dina ibounai gabua ore boubou danu do umui henia, mai ena uaina bona paraoa boubouna danu. Do umui itaia namonamo, mauri gaudia namodia momokani, bero o toto lasi gaudia sibona do umui henia.”