Read Buka Helaga (Hiri Motu) 1993 NUMERA 30 Bible Online

NUMERA 30 - Buka Helaga (Hiri Motu) 1993 bible

NUMERA 30

¹Mose ese Israela iduhu lohia taudia dekenai ia hereva, ia gwau, “Lohiabada ena hadibaia hereva be inai:

²Bema tau ta ese Lohiabada dekenai ia gwauhamata, gau ta do ia henia, o Lohiabada ena vairanai ia gwauhamata, kara ta do ia karaia, unai tau ese iena gwauhamata do ia karaia momokani, iena gwauhamata do ia makohia lasi.

³“Bema kekeni ta, iena tamana ena ruma dekenai do noho, ese Lohiabada dekenai ia gwauhamata, gau ta do ia henia, o Lohiabada ena vairanai ia gwauhamata kara ta do ia karaia,

⁴bona bema iena tamana ese unai gwauhamata ia kamonai, to ia koua lasi, vadaeni unai kekeni ese iena gwauhamata ibounai do ia karaia momokani.

⁵“To bema iena tamana ese unai gwauhamata ia kamonai neganai ia ura lasi, bona ia koua neganai, unai kekeni ena gwauhamata be anina lasi, bona Lohiabada ese unai gwauhamata do ia laloaboio, badina be kekeni ena tamana ese ia koua dainai.

⁶“Bema kekeni ta ese gwauhamata ta ia gwauraia momokani, o ia gwauraia kava, kara ta do ia karaia, to ia do karaia lasi neganai ia headava,

⁷unai neganai bema iena adavana ese gwauhamata do ia kamonai neganai ia koua lasi, vadaeni unai gwauhamata be ia gini noho, bona hahine ese gwauhamata ena anina do ia karaia.

⁸“To bema iena tau ese gwauhamata ia kamonai neganai ia koua, unai neganai unai hahine ena gwauhamata be anina lasi. Lohiabada ese unai gwauhamata do ia laloaboio.

⁹“Vabu ta, o negea hahine ta, ese ia karaia gwauhamata be do ia gini, bona gwauhamata ena anina do ia karaia.

¹⁰“Bema headava hahine ta ese gwauhamata ia gwauraia, kara ta do ia karaia,

¹¹bona bema iena tau ese gwauhamata ia kamonai neganai ia koua lasi neganai, unai hahine ese iena gwauhamata ena anina ibounai do ia karaia haorea.

¹²“To bema unai hahine ena tau ese gwauhamata ia kamonai neganai ia ura lasi, bona ia koua, vadaeni unai gwauhamata ia gini lasi, bona Lohiabada ese unai hahine ena gwauhamata do ia laloaboio.

¹³Hahine ena tau ese iena hahine ena gwauhamata do ia hamomokania diba, o do ia koua diba.

¹⁴“To bema tau ese gwauhamata ia kamonai murinai dina haida idia lao vadaeni, bona unai tau ese hereva ta ia gwauraia lasi, unai be ia ese iena hahine ena gwauhamata ia hamomokania. Tau ese iena hahine ena gwauhamata ia hamomokania vadaeni, badina be ia kamonai dinana dekenai koua hereva ta ia gwauraia lasi.

¹⁵“To bema dina haida idia ore murinai, tau ese iena hahine ena gwauhamata ia koua gwauraia, unai tau ese hahine ena kerere be ia ese do ia huaia, bema gwauhamata ena anina ia karaia haorea lasi.”

¹⁶Inai taravatu be Lohiabada ese Mose dekenai ia henia, tau bona hahine totona gaudia, bona tau, mai ena natuna kekeni totona, kekeni be tamana ena ruma dekenai do noho neganai.