Read Buka Helaga (Hiri Motu) 1993 NUMERA 9 Bible Online

NUMERA 9 - Buka Helaga (Hiri Motu) 1993 bible

NUMERA 9

¹Israela taudia ese Aigupito idia rakatania murinai, lagani iharuana ena hua ginigunana dekenai, Sinai tano, taunimanima noho lasi gabuna dekenai Lohiabada ese Mose dekenai ia hereva,

²ia gwau, “Israela taudia ese Pasova ena aria do idia karaia, ena nega korikori dekenai.

³“Inai hua ena dina namba 14 dekenai, adorahi neganai Pasova do umui karaia, ena nega korikori dekenai, Pasova ena taravatu hegeregerena.”

⁴Unai dainai, Mose ese Israela taudia ia oda henia, Pasova do idia karaia.

⁵Vadaeni hua ginigunana ena dina namba 14 adorahi neganai, Pasova aria idia karaia, Sinai tano kaukau dekenai. Israela taudia ese gau ibounai idia karaia, Lohiabada ese Mose ia oda henia hegeregerena.

⁶To tau haida be idia miro vadaeni, mase tauna dekenai idia kamokau dainai. Unai dainai Pasova idia ania diba lasi unai dina dekenai. Vadaeni idia be Mose bona Arona dekenai idia lao unai dina dekenai, idia gwau,

⁷“Ai be miro, badina mase tauna ta ai dogoatao vadaeni. Badina be dahaka ai ese Lohiabada ena boubou do ai karaia lasi, nega korikori dekenai, Israela taudia ibounai danu?”

⁸Mose ese idia dekenai ia haere, ia gwau, “Do umui naria ela bona do lau kamonai, Lohiabada be edena bamona lau dekenai do ia hereva umui dainai.”

⁹Vadaeni Lohiabada ese Mose ia oda henia, ia gwau,

¹⁰“Israela taudia do oi hamaoroa, do oi gwau: Sedira umui ta o emui natudia ta o tubudia ta be miro, mase tauna umui dogoatao dainai, o sedira umui ta be daudau herea do ia laolao, to ia do ura Pasova do ia ania.

¹¹Unai bamona neganai, hua ta murinai idia ania diba, hua iharuana ena dina 14, adorahi neganai Pasova do idia ania, mai paraoa, idia hatubua lasi gauna, bona mai aniani avadia mamina dika gaudia danu do idia ania.

¹²“To ania lasi gaudia do umui rakatania lasi ela bona dabai, bona mamoe ena turiana ta do umui makohia lasi. Pasova do umui badinaia namonamo, Pasova ena taravatu ibounai hegeregerena.

¹³To bema tau ta ia miro lasi, o ia laolao lasi, to Pasova aria ia karaia lasi, unai tau be iena bese dekena amo do umui negea, badina be ia ese Lohiabada ena boubou ia henia lasi, henia ena nega korikori dekenai. Unai tau ese iena kerere ena davana be ia sibona do ia karaia.

¹⁴“Bema idau bese tauna ta, iena tano dekena amo ia mai, umui emui huanai ia noho, bona ia ura Lohiabada ena Pasova aria do ia ania neganai, ia ese Pasova ena taravatu ibounai do ia badinaia guna. Pasova ena taravatu be tamona, idau bese taudia bona Israela taudia dekenai, taravatu be tamona, idau lasi.”

¹⁵Palai Dubu idia haginia dinana dekenai, ori ese unai Dubu, Taravatu Maua ena Dubu ia koua. Hanuaboi neganai unai ori ena toana be lahi bamona.

¹⁶Nega ibounai iena toana be unai bamona, dina neganai ori ese Dubu ia koua, hanuaboi neganai be lahi ena toana ese ia koua.

¹⁷Bema ori ese Dubu dekena amo ia daekau neganai, Israela taudia be idia toreisi, edia kamepa idia rakatania, edia laolao ma idia raka lao lou. To ori ia diho mai lou gabuna dekenai, Israela taudia be unuseni idia kamepa lou.

¹⁸Inai bamona dala dekenai Lohiabada ena oda hegeregerena Israela taudia idia karaia. Iena oda dekenai idia toreisi, bona iena oda dekenai idia kamepa. Ori ese Dubu ia koua negana ibounai lalonai, idia be kamepa dekenai idia noho.

¹⁹Nega haida ori ese nega daudau Dubu ia koua, to Israela taudia ese Lohiabada ena oda idia laloa, idia toreisi lasi kamepa dekena amo.

²⁰Nega haida ori ese dina momo lasi Dubu ia koua. Vadaeni nega ibounai, Israela taudia idia noho o idia toreisi, Lohiabada ena oda hegeregerena.

²¹Nega haida ori be adorahi neganai ia diho, hanuaboi neganai ia noho. To dabai be ma ia daekau lou, vadaeni Israela taudia be idia toreisi. Dina o hanuaboi, bema ori ia daekau negana ibounai, idia be kamepa dekena amo idia toreisi.

²²Ori ese Dubu ia koua negadia ibounai, bema dina rua, o hua ta, o lagani ta, o nega daudau, to Israela taudia kamepa dekenai idia noho, idia toreisi lasi. To ori ia daekau neganai idia toreisi.

²³Lohiabada ena oda dainai idia kamepa, ma Lohiabada ena oda dainai idia toreisi. Idia ese Lohiabada ena oda idia badinaia, Lohiabada ese Mose ia hamaoroa hegeregerena.