Read Buka Helaga (Hiri Motu) 1993 MIKA 3 Bible Online

MIKA 3 - Buka Helaga (Hiri Motu) 1993 bible

MIKA 3

¹Umui Israela umui gunalaia noho taudia e, umui kamonai! Umui ese kara maoromaoro do umui ura henia, bona havaraia, be emui gaukara bona dagi korikori.

²To umui ese kara dika umui ura henia, bona kara maoromaoro umui ura henia lasi. Umui ese egu bese edia kopina umui kokia noho, bona edia turiana ena varovaro umui utua maragimaragi noho.

³Umui ese egu bese umui ania noho. Umui ese edia kopina umui darea oho, edia turiana umui makohia, bona edia hidiona umui utua maragimaragi, hegeregere vamu umui utua, uro dekenai umui udaia totona.

⁴To nega be ia mai noho, umui ese Lohiabada dekenai do umui boiboi, to ia ese umui do ia haere henia lasi. Emui guriguri dekenai do ia kamonai lasi, badina umui ese kara dika umui karaia vadaeni.

⁵Egu bese edia peroveta taudia haida ese idia koidia noho. Bema moni idia henia neganai, idia peroveta maino be ia mai noho. To bema moni idia henia lasi neganai, tuari idia peroveta noho. Unai bamona peroveta taudia dekenai Lohiabada ia hereva, ia gwau,

⁶“Peroveta taudia e, emui dina be kahirakahira ia ore. Hegeregere dina be ia diho lao, bona dibura be umui emui latanai ia diho noho bamona. Badina be, umui ese egu bese taudia umui hakaua kerere dainai, mata hanai do umui itaia lou lasi, bona peroveta hereva do umui gwauraia lou diba lasi.”

⁷Bona inai peroveta taudia be vaira neganai do idia vara gaudia totona do idia peroveta, to anina do idia vara lasi dainai do idia hemarai, bona edia lalona ena mamina be dika. Badina Dirava ese edia guriguri do ia kamonai lasi, bona idia peroveta do ia vara gauna, be Dirava ese do ia koua.

⁸To lau be, Lohiabada ese iena Lauma, mai ena siahu bona goada lau dekenai ia henia noho. Unai dainai mai egu laloa maoromaoro, bona laloa goada danu, lau ese Israela taudia dekenai edia kara dika lau hamaorodia diba.

⁹Umui Israela gunalaia taudia e, kamonai! Umui ese kota maoromaoro umui ura henia lasi, bona umui ese kara maoromaoro be kara kerere dekenai umui halaoa noho.

¹⁰Umui ese taunimanima alaia kara, bona kota maoromaoro lasi umui karaia noho. Bona inai bamona kara dekena amo umui laloa Ierusalema, Dirava ena hanua ena taudia be bese goadana do idia lao.

¹¹Hanua taudia ese lohia taudia dekenai moni idia henia, bona edia lalona idia ania, kerere do idia karaia totona, bona hahelagaia taudia ese moni do idia abia totona, Taravatu ena anina idia gwauraia. Peroveta taudia danu ese do idia vara gaudia, moni totona idia gwauraia noho. Bona idia ibounai idia hereva, idia gwau, “Lohiabada be ita dekenai ia noho. Unai dainai dika ta ita dekenai do ia vara lasi.”

¹²Unai dainai umui lohia taudia, bona hahelagaia taudia, bona peroveta taudia, umui emui kerere dainai, Dirava ese Ierusalema do ia hadikaia ore. Ierusalema ena ruma bona kohu be momoru haboua gabuna do idia lao. Bona Siona be idia geia tano kavakava bamona do ia lao. Unai ororo, Dubu Helaga ia noho gabuna, be uda ese do ia koua ore.