Read Buka Helaga (Hiri Motu) 1993 NAHUMU 1 Bible Online

NAHUMU 1 - Buka Helaga (Hiri Motu) 1993 bible

NAHUMU 1

¹Inai hereva be Nineva hanua badana totona, Nahumu, Elekoso tauna ena mata hanai lalonai ia itaia gauna.

²Lohiabada be mai ena mama, ia ura lasi idau dirava ese, iena gabu do idia abia. Bona Lohiabada ese ia dekenai idia dagedage henia noho taudia, be ia panisidia noho. Mai badu danu ia ese edia davana ia henidia noho.

³Lohiabada be ia badu haraga lasi, to ia be mai ena siahu bada herea. Lohiabada ese kerere taudia edia dika davana, be do ia henia momokani, do ia laloaboio lasi. Lohiabada ia raka noho gabudia dekenai, lai gubadia idia toreisi noho. Ori be Lohiabada ena aena ena kahu.

⁴Lohiabada ese davara ia gwau henia noho, bona ia kaukau lao! Ia ese danu sinavai edia ranu ibounai ia haorea, idia kaukau lao. Basana bona Karamele edia uma gabudia, be idia dika lao noho, bona Lebanona ena palauapalaua idia mase noho.

⁵Lohiabada ena vairana dekenai, ororo idia heudeheude noho, bona ororo maragidia idia veve ore noho. Iena vairanai danu tano ia mareremarere noho, tanobada mai ena noho taudia ibounai danu, be idia heudeheude noho.

⁶Lohiabada ia badu neganai, daika do ia gini diba? Iena badu siahu bada dekenai, daika ia mauri noho diba? Ia ese iena badu ia bubua diho lahi bamona, bona nadi badadia be iena vairanai, idia makohia maragimaragi noho.

⁷Lohiabada be ia namo. Ia ese iena bese taudia ia durua noho, edia hekwarahi bona hisihisi dinana neganai. Lohiabada idia abidadama henia taudia, be ia ese ia naridia noho.

⁸Abata bada bamona, Lohiabada ese ia dekenai idia dagedage taudia, be ia hadikadia ore noho. Ia dekenai idia tuari henia gwauraia taudia, be ia ese ia alaia mase noho.

⁹Umui ese Lohiabada umui hadikaia gwauraia taudia e, umui kamonai! Lohiabada ese umui do ia hadikaia ore. Lohiabada idia dagedage henia taudia ese, nega iharuana do idia karaia diba lasi.

¹⁰Au giniginidia, kaukau gaudia, bona rei kakoro idia gabua bamona, Lohiabada ena lahi ese umui do ia gabua ore.

¹¹Nineva e, oi dekena amo tau ta ia mai vadaeni. Ia ese Lohiabada hadikaia dalana ia tahua noho.

¹²Lohiabada ese Israela taudia ia hamaoroa noho, ia gwau, “Momokani Asuria taudia be mai edia goada, bona idia be momo herea danu, to haida ese do idia hadikadia ore, vadaeni do idia boio ore. Egu bese taudia e, lau ese umui lau hisihisi henia vadaeni, to umui do lau hisihisi henia lou lasi.

¹³Asuria taudia edia siahu umui emui latanai, be harihari do lau hamakohia, bona umui idia guia seini, be do lau utua negea.”

¹⁴Lohiabada ese Asuria taudia totona inai bamona ia hereva: “Edia natudia bona tubudia do idia mase. Vadaeni edia basileia, be do ia gini noho diba lasi, bona edia ladana be do ia ore. Edia dirava edia dubu edia lalonai idia noho kaivakuku, be do lau hadikaia ore, bona Asuria taudia edia guria gabudia, be do lau karaia hegaegae, badina idia be dika rohoroho momokani.”

¹⁵Umui itaia, ororo dekena amo ia mai noho tauna ese, tuari ia ore hereva namona ia mailaia inai! Ia ese maino hereva ia gwauraia noho! Iuda taudia e, emui aria do umui karaia, bona Dirava dekenai umui gwauhamata gaudia do umui henia, badina be kara dika taudia ese, emui tano do idia tuari henia lou lasi. Unai dika taudia be haida ese, idia hadikadia ore momokani vadaeni.