Read Buka Helaga (Hiri Motu) 1993 HAGAI 1 Bible Online

HAGAI 1 - Buka Helaga (Hiri Motu) 1993 bible

HAGAI 1

¹King Dariuse ena king lagani iharuana lalonai, hua namba 6 ena dina ginigunana dekenai, Lohiabada ese peroveta tauna Hagai dekena amo hereva ia gwauraia. Inai hereva be Iuda ena gavana, Serubabele Sealetiele, bona Iosua Iehosadaka, Hahelagaia Tauna Badana totona.

²Siahu Ibounai Lohiabada ese Hagai ia hamaoroa, ia gwau, “Inai taunimanima idia gwau Lohiabada ena Dubu Helaga haginia negana be ia do ginidae lasi.”

³Ma Lohiabada ese peroveta tauna Hagai dekena amo taunimanima ia hamaoroa, ia gwau,

⁴“Egu bese taudia e, badina dahaka umui be ruma namo herea edia lalonai umui noho, to egu Dubu Helaga be ia do dika noho?

⁵Lau Siahu Ibounai Lohiabada ese umui lau hamaoroa inai, emui mauri dalana do umui laloa.

⁶Umui ese uhe momo umui hadoa noho, to anina momo lasi sibona umui haboua noho. Umui aniani noho, to emui bogadia be idia kunu lasi. Ranu umui inua, to umui honu lasi. Mai emui dabua, to emui kopina be do keru noho. Bona moni gaukara ia karaia noho tauna ese moni hegeregere lasi ia abia noho.

⁷Inai bamona umui dekenai ia vara noho ena badina, be umui diba lasi, a?

⁸“Ororo dekenai do umui daekau lao, au namodia do umui abia mailaia, Dubu Helaga do umui haginia. Unai neganai umui haginia gauna do lau moalelaia, bona iena lalonai egu hairaina do lau hedinaraia.

⁹“Uhe umui hadoa neganai, umui laloa emui uiti bona koni anina momo do umui haboua. To emui ruma dekenai unai anina umui mailaia neganai, lau ese lau hodaia lao ore. Badina dahaka unai bamona lau karaia? Badina be egu Dubu Helaga be ia dika noho, to umui ese ta ta emui ruma, emui ruma umui gaukaralaia noho.

¹⁰Unai dainai medu ia diho lasi, bona tano ese ena anina ia hatubua noho lasi.

¹¹Lau Lohiabada ese medu lasi negana be tano dekenai lau atoa vadaeni. Medu be do ia diho lasi tano palaka latanai, ororo latanai, uiti, bona vain umadia, bona olive dehoro umadia, bona tano ena anina ibounai edia latanai. Medu danu do ia diho lasi taunimanima bona ubua gaudia edia latanai, o umui havaraia gwauraia gaudia ibounai edia latanai.”

¹²Vadaeni Serubabele Sealetiele bona Hahelagaia Tauna Badana, Iosua Iehosadaka, bona Babulonia ena hesiai mai guia danu dekena amo idia giroa mai taudia ibounai ese Lohiabada ese ia oda henidia kara idia karaia. Idia ese Lohiabada ena vairanai idia gari, bona iena hesiai tauna, peroveta tauna Hagai idia kamonai henia.

¹³Bona Hagai ese Lohiabada ena hereva taunimanima dekenai ia gwauraia, ia gwau: Lohiabada ia gwau, “Lau be umui dekenai do lau noho.”

¹⁴Unai dainai Lohiabada ese inai taudia ibounai edia laumadia ia hatoreisia: Serubabele Sealetiele, Iuda ena gavana tauna, Iosua Iehosadaka, Hahelagaia Tauna Badana, bona Babulonia ena hesiai mai guia danu dekena amo idia giroa mai taudia ibounai. Inai taudia idia haboua mai, bona Siahu Ibounai Lohiabada, edia Dirava, ena Dubu Helaga idia haginia hamatamaia.

¹⁵Unai gaukara hebou be king Dariuse ena king lagani iharuana, ena hua namba 6 ena dina namba 24 dekenai idia karaia hamatamaia.