Read Buka Helaga (Hiri Motu) 1993 SEKARAIA 14 Bible Online

SEKARAIA 14 - Buka Helaga (Hiri Motu) 1993 bible

SEKARAIA 14

¹Lohiabada ese kara ta do ia karaia ena dina be ia mai noho. Unai neganai idau bese taudia ese Ierusalema do idia tuari henia, bona kohu momo do idia abia. Unai kohu be emui vairana dekenai do idia haria karaia.

²Lohiabada ese bese idauidau taudia ibounai do ia haboua, bona idia ese Ierusalema do idia tuari henia. Idia ese Ierusalema do idia abia, ruma edia kohu do idia dadia, bona hahine do idia sihari henia, bona hadikaia. Hanua taudia kahana be do idia guia, do idia abia lao, idau tano dekenai hesiai gaukara do idia karaia. To hanua dekenai do noho taudia kahana be hanua dekena amo do idia siaia lao lasi.

³Unai neganai Lohiabada be do ia toreisi, unai bese idauidau taudia do ia tuari henia, guna neganai ia tuari bamona.

⁴Inai neganai, Lohiabada be Olive Ororo ena latanai do ia gini, Ierusalema ena dina daekau kahanai. Unai neganai Olive Ororo be do ia parara, kahana kahana do ia lao, dina daekau kahana ela bona dina diho kahana. Inai parara gabuna dekenai koura badana do ia vara. Ororo ena kahana ta be mirigini kahana do ia marere lao, bona ororo ena kahana ta be diho kahana do ia marere lao.

⁵Inai parara gabuna, unai ororo ena kahana rua edia huanai ia noho koura, dekena amo do umui heau mauri. Umui be do umui heau, tano mareremarere neganai emui sene taudia idia heau bamona, king Usaia ese Iuda ia gunalaia neganai. Vadaeni Lohiabada, lauegu Dirava be do ia mai. Iena aneru helagadia ibounai be ia danu do idia mai.

⁶Unai dina ia ginidae neganai, keru bona aisi, hanuaboi ia moru gauna, be do ia vara lou lasi.

⁷Dibura danu be do ia vara lasi. Diari be do ia noho nega ibounai, hanuaboi neganai danu. Inai bamona kara do ia vara negana be Lohiabada sibona ia diba.

⁸Bona unai dina ia ginidae neganai, ranu namona be Ierusalema dekena amo do ia bubua lao, kahana be Mase Davara dekenai do ia heau diho lao, ma kahana be Davara Badana dekenai do ia heau diho lao. Inai ranu ruaosi be do idia heau noho hanaihanai, medu neganai, bona medu lasi neganai danu.

⁹Bona Lohiabada be tanobada ibounai ena King do ia lao. Taunimanima ibounai ese ia dekenai do idia tomadiho henia, edia Dirava. Unai dina neganai Lohiabada be do ia tamona, bona iena ladana danu be do ia tamona.

¹⁰Ierusalema kahirakahira ia noho tano ibounai be palaka gabuna do ia lao, Geba, mirigini kahana dekena amo ela bona Rimono, Ierusalema ena diho kahana dekenai. To Ierusalema sibona be unai tano ena ataiai do ia noho. Ierusalema ena hetoa maka be Beniamina ena Iduara dekena amo ela bona Kona ena Iduara, ia be magu iduara gunana ta. Ma ena hetoa maka danu be Hananele Kohoro dekena amo ela bona king ena uaina karaia rumana.

¹¹Taunimanima be Ierusalema dekenai do idia noho namonamo, idia be hadikaia gauna ta dekenai do idia gari henia lou lasi.

¹²Vadaeni unai bese idauidau taudia, Ierusalema idia tuari henia bese taudia, be Lohiabada ese gorere dikana dekena amo do ia hadikadia. Inai gorere ena dika be inai: Idia mauri noho neganai edia kopina be do ia bodaga lao. Edia matana bona edia malana danu be edia kwarana lalonai do idia bodaga lao.

¹³Unai dina dekenai, Lohiabada ese unai bese idauidau tuari taudia do ia hagaridia, bona idia dekenai daradara do ia havaraia. Vadaeni tuari taudia ta ta ese iena turana tuari tauna do ia dogoatao, bona do ia heatu henia.

¹⁴Iuda taudia be Ierusalema taudia durua totona Ierusalema dekenai do idia mai, do idia tuari. Idia ese bese idauidau taudia edia kohu do idia abia, golo, siliva, bona dabua momo herea.

¹⁵Ma bese idauidau taudia edia kamepa lalonai, edia hosi, doniki badadia, kamelo, bona doniki maragidia, bona boromakau idauidau ibounai ese gorere dikana momokani do idia davaria.

¹⁶Iuda taudia do idia kwalimu murinai, bese idauidau taudia, tuari dekena amo idia do mauri noho taudia, be lagani ta ta ibounai Ierusalema dekenai do idia lao, Siahu Ibounai Lohiabada, edia King, do idia tomadiho henia totona. Au Raurau Ruma Maragidia Aria ena tomadiho kara danu do idia badinaia.

¹⁷Bema bese ta taudia ese Siahu Ibounai Lohiabada, edia King totona do idia tomadiho henia lasi neganai, medu be edia tano dekenai do ia diho lasi.

¹⁸Bona bema Aigupito taudia ese Au Raurau Ruma Maragidia Aria do idia badinaia lasi, idia ese gorere dikana momokani do idia davaria. Bona bese haida danu, bema Au Raurau Ruma Maragidia Aria badinaia totona idia lao lasi, Lohiabada ese unai gorere dikana idia edia latanai danu do ia siaia.

¹⁹Inai bamona kerere davana be Aigupito bona idau bese taudia danu do idia davaria, bema Au Raurau Ruma Maragidia Aria idia badinaia lasi neganai.

²⁰Bona unai neganai, Lohiabada hanamoa totona, hosi edia aiona dekenai gaba gaudia maragidia edia latanai inai bamona do idia torea: “Helaga, Lohiabada ena.” Ma Dubu Helaga dekenai idia noho nadua urodia edia helaga, be boubou patana ena uro edia helaga hegeregerena.

²¹Uro ibounai Ierusalema dekenai bona Iuda dekenai be do idia helaga, edia biagudia ese unai uro do idia makaia, Siahu Ibounai Lohiabada tomadiho henia karadia totona. Unai dainai taunimanima ese boubou totona idia mailaia vamu, be inai uro edia lalonai vamu do idia nadua. Bona unai neganai danu, hoihoi tauna ta be Siahu Ibounai Lohiabada ena Dubu Helaga lalonai do ia noho lou lasi, lasi momokani.