Read Buka Helaga (Hiri Motu) 1993 MATAIO 11 Bible Online

MATAIO 11 - Buka Helaga (Hiri Motu) 1993 bible

MATAIO 11

¹Iesu be iena diba tahua taudia 12 dekenai ia hereva ore neganai, unai gabu ia rakatania. Hanua haida unai kahana dekenai ia lao, do ia hadibaia, bona do ia haroro henia totona.

²Ioane ese dibura ruma dekenai Keriso ena kara sivaraina ia kamonai, vadaeni iena diba tahua taudia haida Iesu dekenai ia siaidia.

³Idia ese Iesu idia nanadaia, idia gwau, “Ioane ia gwau, ‘Do ia mai Tauna be oi, o idau tauna ta do ai naria?’ ”

⁴Vadaeni Iesu ia haere, ia gwau, “Umui lao, umui kamonai, umui itaia karadia be Ioane dekenai do umui hamaoroa.

⁵Matakepulu taudia edia matana idia kehoa, aena dika taudia idia raka, lepera taudia idia goeva, taia kudima taudia idia kamonai, mase taudia idia toreisi lou, bona ogogami taudia ese Sivarai Namona idia abia dae.

⁶Bema tau ta be lau dekenai ia daradara sisina lasi, unai tau be do ia maole bada.”

⁷Ioane ena diba tahua taudia idia raka siri neganai, Iesu ese taunimanima momo dekenai Ioane ia herevalaia, ia gwau, “Umui be dahaka itaia totona, taunimanima idia noho lasi gabuna dekenai umui lao? Siriho, lai ese ia hamarerea gauna, a?

⁸To dahaka itaia totona umui lao? Dabua manadamanada ia karaia tauna, a? Dabua manadamanada idia karaia taudia be king edia ruma lalonai idia noho.

⁹To dahaka itaia totona umui lao? Peroveta tauna, a? Oibe, umui lau hamaoroa, peroveta taudia ibounai be Ioane ese ia hereaia.

¹⁰Badina be Buka Helaga ese Ioane ia herevalaia, ia torea, ia gwau: “ ‘Oi itaia, lau Dirava ese, lauegu hereva siaia tauna oiemu vairana dekenai lau siaia, oiemu dala kehoa totona.’

¹¹“Umui lau hamaoroa momokani, hahine edia bogana dekena amo idia vara taudia ibounai be ta ese Ioane ia hereaia lasi, to Guba Basileia lalonai, tau maragina sibona ese Ioane ia hereaia.

¹²Ioane Bapatiso ese iena haroro ia hamatamaia ia mai bona harihari, Guba Basileia abia totona be taunimanima ese idia heatu henia noho, bona heatu taudia ese idia ura dogoatao momokani.

¹³Badina be peroveta taudia ibounai bona Mose ena taravatu ese Basileia idia herevalaia, ia mai bona Ioane.

¹⁴Bema emui lalona idia hegeregere, inai hereva do umui abia dae: Ioane be Elia, peroveta taudia idia gwauraia do ia mai tauna.

¹⁵Mai ena taiana tauna be do ia kamonai.

¹⁶“Inai nega taudia be daika danu idia hegeregere, do lau gwauraia? Idia be memero maragimaragi bamona, hanua lalonai idia helai, edia turadia dekenai idia boiboi.

¹⁷Idia gwau, “ ‘Ai be gita ai gadaralaia, to umui be umui mavaru lasi. Ai be mase guria ane ai abia, to umui be umui taitai lasi.’

¹⁸“Badina be Ioane Bapatiso ia mai, ia aniani lasi, ia inuinu lasi. To idia gwau, ‘Ia be kavakava,’

¹⁹To Taunimanima ena Natuna be ia mai vadaeni. Ia aniani bona ia inuinu. Vadaeni idia gwau, ‘Inai be aniani momo bona uaina ia inua momo tauna. Ia be takisi gogoa taudia bona kara dika taudia edia turana.’ Io, inai bamona idia hereva, to Dirava ena gaukara badadia ese iena aonega idia hamomokania noho, ani?”

²⁰Hanua momo dekenai Iesu ese hoa kara momo ia karaia, to inai hanua taudia edia lalona idia giroa lasi. Unai dainai Iesu mai ena laloa siahu danu ia gwau henidia.

²¹Ia gwau, “Korasina e, oi dika vadaeni! Betesaida e, oi danu dika vadaeni! Badina be hoa kara emui lalona dekenai lau karaia be, Turo bona Sidono edia lalonai bema lau karaia, idia be idaunegai edia lalona do idia giroa momokani, mai puse dabua, bona lahi kahu danu edia tauanina dekenai.

²²Lau hamaoroa umui, Dirava ena Kota Badana dinana dekenai, Turo bona Sidono edia dika be maragi, to umui be do umui dika bada.

²³Oi danu, Kaperanauma e! Oi ura be guba dekenai sibona do oi abia isi, a? Lasi, mase gabuna, hel dekenai do idia doria diho oi. Badina be, hoa kara oiemu lalona dekenai lau karaia gauna be bema Sodoma ena lalona dekenai lau karaia, ia be do ia noho namo ia mai bona hari.

²⁴Lau hamaoroa oi, Dirava ena Kota Badana dinana neganai, Sodoma be do ia dika maragi, to oi be do oi dika bada.”

²⁵Unai neganai Iesu ia gwau, “Egu Tamana e, guba bona tanobada ena Lohia, lau hanamoa oi, badina be inai gaudia aonega taudia bona diba momo taudia dekena amo oi hunia vadaeni, to natudia matamata dekenai oi hedinaraia vadaeni.

²⁶Momokani, egu Tamana e, badina be emu laloa namona be unai.”

²⁷Ma Iesu ia gwau, “Gau ibounai be lauegu Tamana ese lau dekenai ia henia vadaeni. Tau ta lasi ese Natuna ia diba. Tamana sibona ese Natuna ia diba. Bona tau ta lasi ese Tamana ia diba. Natuna sibona ese Tamana ia diba. To bema Natuna ia ura tau ta dekenai Tamana ia hedinarai henia, be unai tau ese Tamana do ia diba.

²⁸“Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.

²⁹Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani.

³⁰Badina be lauegu huaia auna be ia metau lasi, bona huaia neganai danu hekwarahi lasi.”