Read Buka Helaga (Hiri Motu) 1993 MATAIO 13 Bible Online

MATAIO 13 - Buka Helaga (Hiri Motu) 1993 bible

MATAIO 13

¹Unai dina lalonai, Iesu be ruma dekena amo ia diho, kone dekenai ia helai, hadibaia totona.

²Vadaeni taunimanima momo herea be ia dekenai idia haboua. Vadaeni ia be vanagi ta dekenai ia guia, ia helai diho. Taunimanima momo herea be kone dekenai idia gini.

³Ia ese parabole momo idia dekenai ia hadibaia, ia gwau, “Umui kamonai: “Uhe hadoa tauna ta ese hadohado totona uma dekenai ia lao.

⁴Uiti uhena ia negea lao negea mai neganai, haida be dala dekenai idia moru, vadaeni manu idia roho mai, idia ania ore.

⁵Vadaeni haida be nadi dekenai idia moru, tano sisina dekenai, nega sisina lalonai idia tubu haraga, badina tano be ia bada lasi.

⁶To dina ia daekau, vadaeni idia mase, idia kakoro, badina edia ramuna be lasi dainai.

⁷Ma haida be ava ginigini lalonai idia moru, ava ginigini ese idia tubu bada, bona uhe ena tubu gauna idia koua.

⁸To haida be tano namona dekenai idia moru, anina idia atoa, haida be 100, haida be 60, haida be 30.”

⁹Vadaeni Iesu ia gwau, “Mai ena taiana tauna be do ia kamonai.”

¹⁰Iesu ena diba tahua taudia be ia dekenai idia lao, idia nanadaia, idia gwau, “Badina be dahaka taunimanima dekenai parabole dekena amo oi hadibaia noho?”

¹¹Idia dekenai ia haere, ia gwau, “Guba Basileia ena hunia hereva umui dekenai be idia hedinarai, to haida dekenai be lasi.

¹²Badina be mai ena gau tauna, ia dekenai be ma haida do idia henia, gau momo do ia abia. To mai ena gau lasi tauna dekena amo ia noho gauna be do idia kokia.

¹³Inai dainai parabole dekena amo lau hereva idia dekenai, vadaeni edia matana idia negea, to do idia itaia diba lasi. Bona idia kamonai gwauraia, to do idia kamonai diba lasi, bona edia lalona be do ia kehoa diba lasi.

¹⁴Idia dekenai Isaia ena peroveta hereva ia momokani vadaeni, ia gwau: “ ‘Kamonai be do umui kamonai, to emui lalona do idia kehoa diba lasi. Itaia be do umui itaia, to diba do umui davaria lasi.

¹⁵Badina be inai bese taudia edia lalona idia dibura, edia taiana idia kuduma, bona edia matana idia koua. Unai be edia matana dekena amo do idia itaia garina, bona edia taiana dekena amo do idia kamonai garina, edia lalona do idia kehoa garina, edia lalona do idia giroa, bona lau ese do lau hamauridia garina.’

¹⁶“To umui be emui matana idia namo vadaeni, badina umui itaia diba. Umui emui taiana danu idia namo, badina be umui kamonai diba.

¹⁷Umui lau hamaoroa momokani, peroveta taudia bona kara maoromaoro taudia momo idia ura be umui itaia gaudia do idia itaia, to idia itaia diba lasi, bona umui kamonai herevadia idia ura kamonai, to idia kamonai diba lasi.

¹⁸“Inai dainai uiti negea lao negea mai tauna ena parabole ena anina do umui kamonai:

¹⁹Tau ta ese Basileia ena sivarai ia kamonaia, to ena anina ia diba lasi, vadaeni Satani ia mai, unai tau ena lalona dekenai ia hadoa gauna be ia kokia. Dala dekenai ia moru gauna be unai.

²⁰Nadi dekenai ia moru gauna be tau ta ese Dirava ena hereva ia kamonai, bona nega tamona ia abia dae mai moale danu.

²¹To ia be ramuna lasi, ia noho nega sisina sibona, badina be gabeai haida ese Dirava ena hereva idia hadikaia, bona idia ese unai tau idia hisihisi henia, o idia dagedage henia neganai, iena abidadama be do ia ore haraga.

²²Ava ginigini dekenai ia moru gauna be tau ta ese hereva ia kamonai, to tanobada ena laloa metau idauidau bona kohu ura henia dikadika ese Dirava ena hereva idia koua. Unai dainai ia be anina lasi.

²³To tano namona dekenai ia moru gauna be tau ta ese Dirava ena hereva ia kamonaia, bona iena lalona ia kehoa momokani. Unai bamona taudia be edia anina idia atoa, ta 100, ta 60, ta 30.”

²⁴Parabole ta ma ia hamaorodia, ia gwau, “Guba Basileia be uma tauna ta bamona, ena uma dekenai uiti uhena namodia ia negea lao negea mai.

²⁵To taunimanima idia mahuta neganai badu tauna ia mai, ava dikadia uiti edia huanai ia hadoa, vadaeni ia raka siri.

²⁶Vadaeni uiti be ia tubu bona ena anina ia atoa neganai, ava dikadia danu idia hedinarai.

²⁷Vadaeni uma biaguna ena gaukara taudia ia dekenai idia lao, idia gwau, ‘Aiemai biaguna e, uhe namodia oiemu uma dekenai oi hadoa, ani? To harihari ava dikadia be edeseni dekena amo idia mai?’

²⁸“Ia haere, ia gwau, ‘Inai be badu tauna ta ena gaukara.’ Ena gaukara taudia ese idia nanadaia, idia gwau, ‘Oi ura ai ragaia, o?’

²⁹Ia gwau, ‘Lasi, ava dikadia umui ragaia neganai uiti danu umui ragaia nega tamona garina.

³⁰Do idia noho, do idia tubu nega tamona, ia lao bona uiti utua neganai. Vadaeni lau ese utua taudia do lau hamaorodia, lau gwau, “Ava dikadia umui haboua guna, umui kwatua, lahi dekenai gabua totona, to uiti be egu aniani rumana dekenai do umui haboua.” ’ ”

³¹Parabole ta ma Iesu ia hamao-rodia, ia gwau, “Guba Basileia be mastadi uhena bamona, tau ta ese ia abia, iena uma dekenai ia hadoa.

³²Au uhedia ibounai huanai ia sibona be maragi-maragi momokani. To ia tubu neganai, au maragidia ibounai ia hanaia, au badana dekenai ia lao, vadaeni ataiai manu ibounai be iena rigi dekenai edia ruma idia karaia.”

³³Parabole ta ma ia hamaorodia, ia gwau, “Guba Basileia be hatubua ena muramura bamona, hahine ta ese ia abia, paraoa momo, hegeregere disi toi danu ia mikisi karaia, ia lao bona inai muramura ese paraoa ibounai ia hatubua, ia bada vadaeni.”

³⁴Iesu ese inai hereva ibounai parabole dekena amo ia gwauraidia unai taunimanima momo dekenai. Nega ibounai ia hadibaia parabole sibona dekena amo.

³⁵Inai bamona ia karaia, peroveta tauna ena hereva hamomokania totona, ia gwau: “Lau hadibaia neganai parabole do lau gwauraia. Tanobada matamaia nega dekena amo ia mai bona hari, hunia gaudia do lau gwauraia hedinarai.”

³⁶Iesu ese unai taunimanima momo ia rakatania, vadaeni ruma dekenai ia daekau. Vadaeni iena diba tahua taudia ia dekenai idia mai, idia gwau, “Ava dikadia uma lalonai edia parabole ena anina mani oi hadibaia ai dekenai.”

³⁷Iesu ia haere, ia gwau, “Uiti uhena namodia ia negea lao negea mai tauna be Taunimanima ena Natuna.

³⁸Uma be tanobada. Uhe namodia be Basileia ena taunimanima. Ava dikadia be Satani ena taunimanima.

³⁹Badu tauna, ava uhena ia negea lao negea mai be Satani. Uiti utua negana be tanobada ena dokona. Utua taudia be aneru.

⁴⁰Unai dainai, ava dikadia idia haboua, lahi dekenai idia gabua ore, tanobada ena dokona neganai danu unai bamona.

⁴¹Taunimanima ena Natuna ese iena aneru do ia siaia, vadaeni taunimanima idia hakererea taudia, bona kara dika taudia ibounai, ena Basileia dekena amo do idia abia siri.

⁴²Lahi badana dekenai do idia negedia vareai, unuseni do idia tai, edia isena do idia koria auka masemase.

⁴³Unai neganai Dirava ena kara maoromaoro taudia be edia Tamana ena Basileia lalonai do idia diaridiari, dina bamona. Mai ena taiana tauna be do ia kamonai.

⁴⁴“Guba Basileia be kohu namona ta, tano dekenai ia hunia noho bamona. Tau ta ese ia davaria, vadaeni tano dekena amo ia koua, ia lao, mai moale danu iena gau ibounai ia hoia lao, vadaeni unai tano ia hoia.

⁴⁵“Guba Basileia be hoihoi tauna ta bamona, davana bada nadi namodia ia tahua.

⁴⁶Nadi namo herea ta ia davaria, vadaeni ia lao, iena gau ibounai ia hoia lao, unai nadi namo herea ia hoia.

⁴⁷“Guba Basileia be reke bamona, davara dekenai idia atoa, gwarume idauidau momo idia vareai.

⁴⁸Ia honu neganai, reke be kone dekenai idia veria lao, gwarume namodia idia haboua baketi dekenai, to gwarume dikadia idia negea.

⁴⁹Tanobada dokona neganai be unai bamona. Aneru ese kara dika taudia bona kara maoromaoro taudia do idia hapararaia.

⁵⁰Kara dika taudia be lahi badana dekenai do idia negea vareai, unuseni do idia tai, edia isena do idia koria auka masemase.”

⁵¹Iesu ese ia nanadaia idia dekenai, ia gwau, “Inai hereva ibounai dekenai umui emui lalona idia kehoa vadaeni, a?” Idia gwau, “Io.”

⁵²Vadaeni Iesu ia hamaorodia, ia gwau, “Unai dainai bema taravatu hadibaia tauna ta be Guba Basileia ena diba tahua tauna do ia halaoa neganai, ia be ruma badana ena biaguna ta bamona. Ia ese kohu matamata bona kohu gunana danu edia haboua gabuna dekena amo do ia kokia, vadaeni idia do ia hedinaraia.”

⁵³Iesu ese inai parabole ia gwauraia ore, vadaeni unai gabu dekena amo ia raka siri.

⁵⁴Iena hanua korikori dekenai ia ginidae, bona hanua taudia edia dubu dekenai ia hadibaia. Vadaeni idia be idia hoa, idia gwau, “Inai tau ena aonega bona iena siahu kara be edeseni ia abia?

⁵⁵Inai be kamuta tauna ena natuna lasi, a? Iena sinana ena ladana be Maria, ani? Iena tadina be Iamesi bona Iose, bona Simona bona Iuda, ani?

⁵⁶Iena taihuna be ita dekenai idia noho, ani? Unai dainai inai siahu ibounai be edeseni ia abia?”

⁵⁷Vadaeni idia ura lasi Iesu. To Iesu ia hamaorodia, ia gwau, “Peroveta tauna be do idia matauraia, to ena hanua korikori dekenai, bona ena ruma dekenai be do idia matauraia lasi.”

⁵⁸Unuseni be siahu karadia momo lasi ia karaia, badina idia be abidadama lasi dainai.