Read Buka Helaga (Hiri Motu) 1993 MATAIO 14 Bible Online

MATAIO 14 - Buka Helaga (Hiri Motu) 1993 bible

MATAIO 14

¹Unai neganai king Heroda ese Iesu ena sivarai ia kamonai.

²Vadaeni ia ese iena hesiai taudia ia hamaorodia, ia gwau, “Inai be Ioane Bapatiso. Ia be mase dekena amo ia toreisi vadaeni, inai dekenai unai siahu karadia ia karaia.”

³Badina be Heroda ese Ioane ia dogoatao vadaeni, ia guia, dibura ruma dekenai ia koua, Herodia, iena kakana Filipo ena adavana totona.

⁴Badina be Ioane ese ia hamaoroa, ia gwau, “Inai hahine oi abia be oi kerere.”

⁵Heroda ia ura be Ioane ia alaia, to Iuda taudia dekenai ia gari, badina be idia ibounai idia laloa Ioane be peroveta tauna.

⁶To dina ta Heroda ese ia vara dinana laloatao totona, aria ta ia karaia, vadaeni Herodia ena natuna kekeni be edia vairana dekenai ia mavaru, Heroda ia hamoalea.

⁷Unai dainai mai hereva metau danu Heroda ese kekeni dekenai ia gwauhamata, ia gwau, “Bema gau ta oi noinoi lau dekenai, do lau henia diba.”

⁸Kekeni ena sinana ese ia hereva henia guna dainai, ia be ia gwau, “Ioane Bapatiso ena kwarana be mereki dekenai oi mailaia, iniseni oi henia lau dekenai.”

⁹King ena lalona ia hisihisi vadaeni, to iena gwauhamata dainai, bona iena vadivadi taudia dainai, king ese idia ia hamaoroa, kekeni ena ura gauna do idia henia.

¹⁰Tau haida ia siaia, Ioane ena kwarana, dibura ruma dekenai idia utua oho.

¹¹Kwarana be mereki dekenai idia atoa, idia mailaia, kekeni dekenai idia henia. Vadaeni ia ese iena sinana dekenai ia mailaia.

¹²Vadaeni Ioane ena diba tahua taudia idia lao, Ioane ena tauanina idia guria. Vadaeni idia lao, Iesu idia hamaoroa.

¹³Iesu be Ioane ena sivarai ia kamonai. Vadaeni vanagi ta dekenai unai gabu ia rakatania, taunimanima idia noho lasi gabuna dekenai ia lao. To taunimanima momo be idia kamonai, vadaeni aena dekenai idia raka lao ia dekenai, edia hanua dekena amo.

¹⁴Kone dekenai ia diho neganai, Iesu ese taunimanima momo herea ia itaia, ia bogahisihisi idia dekenai, bona edia gorere taudia ia hanamoa.

¹⁵Adorahi neganai iena diba tahua taudia Iesu dekenai idia lao, idia gwau, “Inai be taunimanima idia noho lasi gabuna, bona dina be ia diho vadaeni. Taunimanima oi siaia be namo, hanua maragidia dekenai edia aniani do idia hoia.”

¹⁶To Iesu ia gwau, “Badina dahaka do idia lao? Umui sibona ese aniani umui henidia be namo.”

¹⁷To idia haere ia dekenai, idia gwau, “Iseda aniani gaudia be paraoa 5 sibona, bona gwarume maragi rua.”

¹⁸Iesu ia gwau, “Umui mailaia lau dekenai.”

¹⁹Vadaeni unai taunimanima momo dekenai Iesu ia hereva, rei dekenai do idia helai diho. Vadaeni Iesu ese aniani gaudia 5 sibona, bona gwarume rua sibona ia abia, guba dekenai ia itaia, bona aniani ia hanamoa. Vadaeni aniani ia makohia sisina sisina, diba tahua taudia dekenai ia henia. Vadaeni idia ese unai taunimanima momo dekenai idia henia.

²⁰Ibounai idia aniani, idia boga kunu. Gabeai aniani orena idia haboua, bosea 12 idia honu.

²¹Idia aniani tatau be 5000 bamona, to hahine mai edia natudia be idia duahia lasi.

²²Iesu ese iena diba tahua taudia dekenai ia hereva, vanagi dekenai do idia guia, do idia lao guna, gohu ena kahana dekenai do idia heau hanaia. To ia be taunimanima do ia siaia lao idau gabu idau gabu dekenai.

²³Taunimanima ia siaia ore, vadaeni Iesu sibona ororo ta dekenai ia daekau, ia guriguri. Hanuaboi ia ginidae, Iesu sibona ia noho unuseni.

²⁴To unai vanagi be gohu ena huana dekenai, bona hurehure ese ia hamarerea momo, badina lai be edia vairana dekena amo ia mai.

²⁵Vadaeni daba rere kahirakahira, dibura neganai, Iesu be idia dekenai ia lao, davara ena kopina dekenai ia raka.

²⁶Diba tahua taudia ese davara kopina dekenai ia raka noho neganai idia itaia, vadaeni idia gari dikadika, idia gwau, “Unai be lauma ta.” Idia gari bada dainai idia boiboi dikadika.

²⁷To Iesu ia hereva idia dekenai, ia gwau, “Umui goada abia, inai be lau, umui gari lasi.”

²⁸Vadaeni Petero ia hereva Iesu dekenai, ia gwau, “Lohiabada e, bema inai be oi momokani, oi hereva lau dekenai, vadaeni davara ena kopina dekenai do lau raka mai.”

²⁹Iesu ia gwau, “Oi mai.” Petero be vanagi dekena amo ia diho, davara ena kopina latanai ia raka hamatamaia, Iesu dekenai ia lao gwauraia.

³⁰To lai ia itaia, vadaeni ia gari, davara lalonai ia diho hamatamaia, vadaeni ia boiboi, ia gwau, “Lohiabada e, oi hamauria lau.”

³¹Vadaeni Iesu ese nega tamona iena imana dekenai Petero ia dogoatao, ia veria daekau. Ia gwau, “Abidadama maragimaragi tauna, dahaka totona oi daradara?”

³²Idia ruaosi vanagi dekenai idia guia, vadaeni lai ia doko.

³³Vanagi taudia be Iesu ena vairana dekenai idia tomadiho, idia gwau, “Momokani, oi be Dirava ena Natuna.”

³⁴Gohu idia hanaia, Genesareta kone dekenai idia kamokau.

³⁵Unai gabu taudia idia diba vadaeni inai be Iesu, vadaeni hereva idia siaia, unai tano taudia ibounai idia hadibaia. Vadaeni gorere taudia ibounai Iesu dekenai idia abia lao.

³⁶Idia noia, iena dabua sibona dekenai do idia dogoatao. Vadaeni idia dogoatao taudia ibounai be idia namo lou.