Read Buka Helaga (Hiri Motu) 1993 MATAIO 24 Bible Online

MATAIO 24 - Buka Helaga (Hiri Motu) 1993 bible

MATAIO 24

¹Iesu be Dubu Helaga dekena amo ia raka murimuri dekenai. Vadaeni iena diba tahua taudia ia dekenai idia lao. Idia ura be Iesu idia hakaua lao, Dubu Helaga ena ruma idauidau idia hedinarai henia totona.

²Iesu ia hereva idia dekenai, ia gwau, “Inai hairai gaudia umui itaia, a? Umui lau hamaoroa momokani, nadi ta be nadi ta latanai do ia noho lasi, ibounai do idia moru diho.”

³Iesu be Olive Ororo dekenai ia helai, vadaeni iena diba tahua taudia ia dekenai idia lao, hunia dala dekenai idia hereva henia, idia gwau, “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?”

⁴Iesu ia haere idia dekenai, ia gwau, “Umui naria namonamo, tau ta ese umui do ia hakaua kerere garina.

⁵Badina be taunimanima momo lauegu ladanai do idia mai, do idia gwau, ‘Lau inai Keriso,’ vadaeni taunimanima momo do idia hakaua kerere.

⁶To umui be tuari ena regena, bona tuari ena sivarai do umui kamonai neganai, do umui laloa daradara lasi. Inai gaudia be do idia vara guna, to dokona be do vaira neganai.

⁷Badina be bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere.

⁸To unai be hisihisi nega ena hamatamaia sibona, natuna havaraia ena hisihisi bamona.

⁹“Unai neganai umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia.

¹⁰Vadaeni taunimanima momo edia abidadama do idia rakatania, vadaeni idia ta ta ese ta ta do idia samania, bona idia ta ta ese ta ta do idia badu henia.

¹¹Peroveta koikoi taudia momo danu do idia toreisi, taunimanima momo do idia hakaua kerere.

¹²Kara dikadia danu do idia vara gabu idauidau dekenai, vadaeni taunimanima momo edia lalokau be do ia keru.

¹³To iena lalona do ia goada noho ela bona dokona, unai tauna be do ia mauri.

¹⁴Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”

¹⁵Ma Iesu ia hereva, ia gwau, “Peroveta tauna Daniela ese guna ia gwauraia, gau dika rohorohona, gabu ia hadikaia gauna, Dubu Helaga ena lalonai ia gini dohore umui itaia.” (Duahia taudia e, inai hereva ena anina do umui laloa namonamo.)

¹⁶“Unai neganai Iudea dekenai idia noho taudia be ororo dekenai do idia heau lao.

¹⁷Bona ruma ena atai dekenai ia helai noho tauna be ruma lalonai do ia raka vareai lasi iena kohu abia totona.

¹⁸Bona uma dekenai ia gaukara noho tauna danu ese iena dabua abia totona do ia giroa lao lasi.

¹⁹Unai neganai rogorogo hahine bona natuna maragi idia rata henia hahine be madi do idia dika.

²⁰Do umui guriguri, keru neganai, o Sabati Dina neganai be do umui heau lasi.

²¹Badina be unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.

²²Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai, unai nega do ia hakwadogia.

²³“Unai neganai tau ta do ia gwau, ‘Oi itaia, Keriso be inai,’ o, ‘Keriso be unai.’ To do umui kamonai henia lasi.

²⁴Badina be Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana.

²⁵Do umui laloaboio lasi, umui lau hamaoroa guna inai.

²⁶“Unai dainai, bema umui dekenai do idia hamaoroa, do idia gwau, ‘Umui itaia, ia be taunimanima idia noho lasi tano dekenai ia noho,’ to do umui lao lasi. O do idia gwau, ‘Umui itaia, ia be ruma lalonai ia noho,’ to do umui kamonai lasi.

²⁷Kevaru bamona, guba dekenai ia diari haraga bamona, guba ena dina daekau kahana ia lao bona dina diho kahana, unai bamona danu Taunimanima ena Natuna be do ia mai.

²⁸“Mase edia tauanina idia noho gabuna dekenai, ugava manudia do idia haboua unuseni.

²⁹“Unai nega dikana do ia ore, vadaeni maoromaoro dina be do ia dibura, hua danu do ia diari lasi, hisiu guba dekena amo do idia moru, bona guba dekenai idia noho siahu gaudia do idia mareremarere.

³⁰Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.

³¹Vadaeni ia ese iena aneru do ia siaia lao, mai kibi ena regena bada danu, iena abia hidi taudia do ia haboua mai totona. Aneru ese unai taudia do idia abia mai, lai edia gabu 4 dekena amo, tanobada ena kahana ibounai dekena amo.”

³²“Fig auna dekena amo inai parabole do umui diba: Au ena rigina ese ranu ia abia, bona ena raurau matamata idia kehoa neganai, umui diba vadaeni lai be dina diho kahana dekena amo kahirakahira do ia mai.

³³Inai dainai, umui danu ese inai gau ibounai idia vara do umui itaia neganai, do umui diba Taunimanima ena Natuna be ia kahirakahira vadaeni, iduara dekenai ia noho.

³⁴Umui lau hamaoroa momokani, inai nega idia noho taudia do idia mase ore lasi neganai, be inai gaudia ibounai do idia vara momokani.

³⁵Guba bona tanobada do idia boio, to lauegu hereva be do ia boio lasi.”

³⁶“Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.

³⁷Noa ena nega bamona, Taunimanima ena Natuna do ia mai neganai, be unai bamona gaudia do idia vara.

³⁸Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana.

³⁹Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.

⁴⁰Unai neganai tau rua uma dekenai do idia noho, ta be do ia kokia, ta be do ia noho.

⁴¹Hahine rua ese uiti do idia gaukaralaia noho, paraoa karaia totona. Ta be do ia kokia, ta be do ia noho.

⁴²Unai dainai do umui naria, badina be umui emui Lohiabada do ia mai negana be umui diba lasi.

⁴³Inai do umui laloatao! Ruma biaguna bema ia diba guna edena hora dekenai henaoa tauna do ia mai, ia be do ia naria, iena ruma do ia makohia lasi.

⁴⁴Unai dainai, do umui hegaegae, badina be Taunimanima ena Natuna do ia mai ena hora be umui diba lasi.

⁴⁵“Hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona biaguna ena natuna edia aniani neganai edia aniani do ia henia, tauna be daika?

⁴⁶Iena biaguna do ia mai neganai do ia davaria, unai bamona ia karaia noho tauna be ia namo.

⁴⁷Umui lau hamaoroa momokani, iena kohu ibounai naria tauna iena biaguna ese do ia halaoa.

⁴⁸To hesiai tauna dikana ena lalona dekenai do ia laloa, do ia gwau, ‘Lauegu biaguna be do ia giroa mai haraga lasi.’

⁴⁹Vadaeni ia ese iena hesiai taudia haida do ia botaia, muramura inua kekero taudia danu do ia aniani noho, do ia inuinu noho.

⁵⁰Unai hesiai tauna be ia laloa lasi dinana dekenai, bona hora ta ia diba lasi neganai, iena biaguna do ia ginidae.

⁵¹Biaguna ese kaia dekena amo unai tau do ia utua kahana maragimaragi, bona koikoi taudia danu, edia panisia gabu dekenai do ia siaia, vadaeni unuseni do idia tai, edia isena do idia koria auka masemase.