Read Buka Helaga (Hiri Motu) 1993 MATAIO 28 Bible Online

MATAIO 28 - Buka Helaga (Hiri Motu) 1993 bible

MATAIO 28

¹Sabati ia ore murinai, daba ia rere neganai, pura ena dina ginigunana, Maria, Magadala hahinena, Maria ta danu, guria gabuna itaia totona idia lao.

²Unai neganai tano mareremarere bada herea ia vara. Badina be Lohiabada ena aneru ese guba dekena amo ia diho, nadi badana be guria gabuna ena iduara dekena amo ia keia siri, vadaeni unai nadi ena latanai ia helai.

³Aneru ena vairana ia diari momokani, kevaru bamona, iena dabua danu ia kurokuro momokani, sinou bamona.

⁴Ia dekenai idia gari dainai, tuari taudia be idia heudeheude, bona mase taudia hegeregerena idia lao.

⁵To aneru ese hahine dekenai ia hereva, ia gwau, “Umui gari lasi, badina lau diba umui be Iesu, idia hasatauroa tauna, umui tahua noho.

⁶Ia be ia noho lasi iniseni. Ia toreisi lou vadaeni, ia hamaoroa umui dekenai hegeregerena. Vadaeni, umui mai, idia atoa gabuna mani umui itaia.

⁷Vadaeni do umui lao haragaharaga, iena diba tahua taudia dekenai do umui hamaoroa ia be mase dekena amo ia toreisi vadaeni. Kamonai, ia be Galilea dekenai ia lao noho, umui do ia itaia totona. Egu hereva be unai, umui kamonai.”

⁸Vadaeni idia ruaosi ese guria gabuna idia rakatania haragaharaga, mai gari bona mai moale bada danu, Iesu ena diba tahua taudia dekenai hadibaia totona idia heau lao.

⁹To dala dekenai Iesu danu idia hedavari, ia hereva idia dekenai, ia gwau, “Do umui mauri!” Vadaeni idia ruaosi idia raka kahirakahira ia dekenai, ena aena dekenai idia rosia, idia tomadiho henia ia dekenai.

¹⁰Vadaeni Iesu ia gwau, “Umui gari lasi. Umui lao, lauegu varavara taudia do umui hamaoroa, do idia lao Galilea. Unai kahana dekenai do idia itaia lau.”

¹¹Idia ruaosi be idia lao neganai, tuari taudia haida danu hanua badana dekenai idia lao, inai idia vara gaudia ibounai dubu biagudia dekenai idia hamaoroa.

¹²Vadaeni inai dubu biagudia be hanua tau badadia danu idia hereva hebou. Gabeai tuari taudia dekenai moni momo herea idia henia,

¹³idia gwau, “Do umui gwau, ‘Iena diba tahua taudia be hanuaboi idia mai, ai mahuta neganai iena tauanina idia henaoa.’

¹⁴Bema gavana ese inai sivarai do ia kamonai, ai ese do ai hereva henia, ena lalona do ai hanamoa, kerere ta do umui davaria lasi.”

¹⁵Unai dainai, tuari taudia ese moni idia abia, vadaeni idia dekenai idia hadibaia hegeregerena idia hereva. Inai sivarai be Iuda taudia ese idia gwauraia loaloa ia mai bona harihari danu.

¹⁶Diba tahua taudia 11 be idia lao Galilea dekenai, ororo ta, Iesu ese ia gwauraia guna do idia hedavari gabuna dekenai.

¹⁷Unuseni idia ese Iesu idia itaia, vadaeni idia tomadiho ia dekenai. To haida be idia laloa daradara.

¹⁸Vadaeni Iesu ia raka kahirakahira idia dekenai, ia hereva henia idia dekenai, ia gwau, “Siahu ibounai guba dekenai bona tanobada dekenai be lau dekenai ia henia vadaeni.

¹⁹Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai.

²⁰Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.”