Read Buka Helaga (Hiri Motu) 1993 MATAIO 4 Bible Online

MATAIO 4 - Buka Helaga (Hiri Motu) 1993 bible

MATAIO 4

¹Vadaeni Lauma Helaga ese taunimanima idia noho lasi gabuna dekenai Iesu ia hakaua lao, Satani ese do ia dibagania totona.

²Dina 40, hanuaboi 40, Iesu be aniani ia ania lasi, vadaeni ia hitolo mase.

³Vadaeni Satani be ia dekenai ia lao, ia gwau, “Bema oi be Dirava ena Natuna neganai, inai nadi dekenai oi oda henia, vadaeni aniani gaudia dekenai do oi halaoa.”

⁴To Iesu ia haere, ia gwau, “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.’ ”

⁵Vadaeni Satani ese Hanua Helaga dekenai Iesu ia hakaua lao, Dubu Helaga ena atai dekenai ia haginia.

⁶Vadaeni ia gwau, “Bema oi be Dirava ena Natuna neganai, inai gabu dekena amo oi roho diho, badina be Buka Helaga ia gwau: “ ‘Dirava ese iena aneru dekenai do ia hereva henidia, vadaeni edia imana dekenai do idia abia isi oi, oiemu aena be nadi dekenai do oi botaia garina.’ ”

⁷Iesu ia haere, ia gwau, “Inai hereva danu Buka Helaga dekenai ia torea, ia gwau, ‘Lohiabada oiemu Dirava dekenai do oi dibagania lasi.’ ”

⁸Vadaeni Satani ese ororo bada herea ta ena atai dekenai ia hakaua daekau, tanobada edia basileia ibounai mai edia hairaina danu ia itaia,

⁹ia gwau, “Bema oiemu kwarana oi atoa diho, bona bema lau dekenai oi tomadiho, vadaeni inai ibounai be oi dekenai do lau henia.”

¹⁰Iesu ma ia haere henia, ia gwau, “Satani e, idau gabu dekenai oi lao, badina be Buka Helaga lalonai ia torea, ia gwau, ‘Lohiabada oiemu Dirava do oi tomadiho henia, ia sibona dekenai hesiai gaukara do ia karaia.’ ”

¹¹Vadaeni Satani ese ia rakatania. Aneru haida Iesu dekenai idia lao, ia dekenai idia durua.

¹²Iesu ia kamonai Ioane be dibura ruma lalonai idia koua, vadaeni ia giroa lao Galilea dekenai.

¹³Nasareta ia rakatania, ia lao, Kaperanauma dekenai ia noho, unai hanua be gohu kone dekenai ia noho, Sebuluno bona Napatali tano dekenai.

¹⁴Unai dekena amo Isaia, peroveta tauna, ena hereva ia momokani vadaeni, ia gwau:

¹⁵“Sebuluno tano bona Napatali tano, gohu ena dalana, Ioridane Sinavai unai kahana dekenai, Galilea, bese idauidau edia tano.

¹⁶Dibura dekenai idia noho taudia be, diari badana idia itaia vadaeni. Bona mase laulauna ena dibura dekenai idia helai noho taudia edia latanai, diari ia hedinarai vadaeni.”

¹⁷Unai negana ia lao, Iesu ese ia haroro hamatamaia, ia gwau, “Emui lalona umui giroa, badina Guba Basileia be kahirakahira ia mai vadaeni.”

¹⁸Iesu be Galilea Gohu ena kone dekenai ia raka noho neganai, tadikaka rua, Simona, ena ladana ta Petero, mai ena tadina Andrea, ia itadia, edia reke gohu dekenai idia atoa, badina idia be haoda taudia.

¹⁹Vadaeni idia dekenai ia hereva henia, ia gwau, “Lauegu murinai umui raka, lau be taunimanima haoda henia totona taudia do lau halaoa umui.”

²⁰Vadaeni nega tamona idia ese edia reke idia rakatania, iena murinai idia raka.

²¹Unai gabu dekena amo ma ia raka lao noho neganai, tadikaka rua ma ia itaia, Iamesi Sebedeo, iena tadina Ioane danu, edia vanagi dekenai edia tamana Sebedeo danu edia reke idia karaia hegaegae noho.

²²Vadaeni Iesu ia boiridia. Vadaeni nega tamona idia ese vanagi bona edia tamana idia rakatania, iena murina dekenai idia raka.

²³Iesu be Galilea kahana ibounai dekenai ia loaloa, edia dubu lalonai ia hadibaia, bona Basileia ena Sivarai Namona ia harorolaia. Bona taunimanima edia gorere bona edia hisihisi idauidau dekena amo ia hamauridia.

²⁴Unai dainai, iena sivarai Suria tano ibounai dekenai idia gwauraia loaloa, vadaeni edia gorere taudia ibounai ia dekenai idia abia lao. Mai edia hisihisi idauidau taudia, mai edia lauma dika taudia, kavakava taudia, idia raka diba lasi taudia Iesu dekenai idia abia lao, vadaeni ia ese ibounai ia hanamoa.

²⁵Taunimanima momo herea be iena murina dekenai idia raka, Galilea dekena amo, Hanua 10 gabuna dekena amo, Ierusalema dekena amo, Iudea dekena amo, bona Ioridane Sinavai unai kahana dekena amo.