Read Buka Helaga (Hiri Motu) 1993 MATAIO 7 Bible Online

MATAIO 7 - Buka Helaga (Hiri Motu) 1993 bible

MATAIO 7

¹“Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi.

²Badina be umui gwauraia kerere karana hegeregerena Dirava ese umui do ia gwauraia kerere. Taunimanima dekenai umui kara henia hegeregerena be Dirava ese danu umui dekenai do ia kara henia.

³Badina be dahaka au ena momoru oiemu tadikakana ena matana lalonai oi itaia, to au badana oiemu matana lalonai ia noho be oi laloa lasi?

⁴Badina be dahaka oiemu tadikakana oi hamaoroa, oi gwau, ‘Mani au ena momoru oiemu matana dekena amo lau kokia,’ to au badana be oiemu matana dekenai ia do noho?

⁵Koikoi tauna e, au badana oiemu matana dekena amo do oi kokia guna, oi itaia namonamo totona. Unai murinai au ena momoru oiemu tadikakana ena matana dekena amo do oi kokia diba.

⁶“Helaga gaudia sisia dekenai do umui henia lasi, idia giroa bona umui idia koria garina, bona emui kavabukavabu be boroma edia vairana dekenai do umui negea lasi. Badina be edia aena dekenai do idia moia garina.

⁷“Umui noinoi, vadaeni Dirava ese do ia henia umui dekenai. Umui tahua, vadaeni do umui davaria. Umui pidipidi, vadaeni iduara do ia kehoa umui dekenai.

⁸Badina be noinoi taudia ibounai ese do idia abia, tahua tauna ese do ia davaria, bona pidipidi tauna dekenai be iduara do ia kehoa.

⁹“Tamana taudia e, umui daika ena natuna paraoa ia noia neganai be nadi do ia henia?

¹⁰O bema gwarume ia noia neganai be gaigai do ia henia?

¹¹Umui be dika taudia, to umui emui natudia dekenai gau namodia umui henia diba, unai dainai emui Tamana guba dekenai ia noho, be gau namodia idia noia taudia do ia henidia momokani, ani?

¹²“Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai. Badina be Mose ena taravatu bona peroveta taudia edia hereva anina korikori be unai.

¹³“Iduara maragina dekenai do umui raka vareai. Badina be lahi gabuna, hel, ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai.

¹⁴To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.

¹⁵“Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona.

¹⁶Edia huahua dekena amo do umui diba idia be namo o dika. Au ginigini ese vain ena anina ia atoa lasi, bona ava ginigini be fig huahua ena anina ia atoa lasi.

¹⁷Oibe, bona au namona ena huahua be ia namo, to au dikana ena huahua be ia dika.

¹⁸Au namona ese huahua dika ia havaraia diba lasi, bona au dikana ese huahua namo ia havaraia diba lasi.

¹⁹Au ibounai huahua namona idia havaraia lasi gaudia be do idia utua, lahi dekenai do idia negea.

²⁰Unai dainai peroveta koikoi taudia edia kara dekena amo idia do umui diba.

²¹“Guba Basileia do idia vareai taudia be daika? ‘Lohiabada e, Lohiabada e,’ idia gwau taudia ibounai, a? Lasi momokani. Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.

²²Unai Dirava ena Kota Dina ia ginidae neganai, taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua, bona oiemu ladana dekenai hoa kara momo ai karaia, ani?’

²³Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’

²⁴“Unai dainai, lauegu hereva inai ia kamonai, bona ia karaia tauna be aonega tauna ta bamona, ia ese iena ruma nadi latanai ia haginia.

²⁵Vadaeni medu bada ia diho, sinavai ia abata, lai bada ia botaia unai ruma dekenai. To unai ruma be ia moru lasi, badina ia be nadi latanai tau ese ia haginia.

²⁶“Ma danu, egu hereva ia kamonai, to ia karaia lasi tauna be kavakava tauna ta bamona. Inai tau ena ruma be miri latanai ia haginia.

²⁷Vadaeni medu bada ia diho, sinavai be ia abata, lai bada ia botaia unai ruma dekenai. Vadaeni, ia moru. Ia moru neganai be ia dika momokani.”

²⁸Iesu ena haroro ia hadokoa, bona taunimanima ese iena hadibaia hereva dekenai idia hoa bada,

²⁹badina iena hadibaia hereva be edia taravatu hadibaia taudia bamona lasi. Ia ese taunimanima ia hadibaia mai siahu danu.