Read Buka Helaga (Hiri Motu) 1993 MAREKO 1 Bible Online

MAREKO 1 - Buka Helaga (Hiri Motu) 1993 bible

MAREKO 1

¹Dirava ena Natuna Iesu Keriso ena Sivarai Namona ia matamaia inai bamona.

²Peroveta tauna ladana Isaia ia torea, “Dirava ia hereva, ia gwau: ‘Oiemu vairana dekenai lauegu hesiai tauna lau siaia. Oiemu dala do ia karaia hegaegae.’

³Ta ia boiboi taunimanima idia noho lasi gabuna dekenai inai bamona, ‘Lohiabada ena dala umui karaia hegaegae, iena dala umui hamaoromaoroa.’ ”

⁴Unai dainai Ioane Bapatiso ia mai, taunimanima idia noho lasi gabuna dekenai ia haroro. Iena haroro be, taunimanima edia lalona idia giroa, bona bapatiso idia abia, kara dika gwauatao ena toana.

⁵Iudea kahana taudia bona Ierusalema hanua taudia ibounai idia lao Ioane dekenai. Idia gwau, “Ai be kara dika taudia.” Vadaeni Ioane ese idia ia bapatiso henia Ioridane Sinavai lalonai.

⁶Ioane ena dabua be kamelo huina bona iena gaba gauna be boromakau kopina. Iena aniani be kwadi bona hani.

⁷Ia haroro, ia gwau, “Tau ta lauegu murinai dohore ia mai, iena siahu ia bada, lauegu siahu ia maragi. Inai tau ena tamaka varona, lau be hegeregere lasi lau ruhaia.

⁸Lau ese umui lau bapatisoa ranu dekenai, to dohore inai tau ese umui do ia bapatisoa Lauma Helaga dekenai.”

⁹Unai neganai, Iesu be Nasareta hanua, Galilea kahana dekena amo ia mai, bona Ioane ese Iesu ia bapatisoa Ioridane Sinavai lalonai.

¹⁰Iesu ese ranu ia rakatania neganai, nega tamona ia itaia guba ia kehoa, bona Lauma Helaga ia diho ia dekenai pune manu bamona.

¹¹Bona guba dekena amo gado ta ia hereva, ia gwau, “Oi be lauegu Natuna. Lau lalokau henia oi. Lau moale bada oi dekenai.”

¹²Vadaeni nega tamona Lauma Helaga ese Iesu ia siaia taunimanima idia noho lasi gabuna dekenai.

¹³Dina 40 ia noho taunimanima idia noho lasi gabunai, unuseni Satani ese ia dibagania. Dagedage boromadia be Iesu danu idia noho, to aneru ese ia idia naria.

¹⁴Ioane Bapatiso idia atoa dibura ruma dekenai murinai, Iesu ia lao Galilea dekenai, Dirava ena Sivarai Namona ia harorolaia.

¹⁵Ia haroro, ia gwau, “Harihari be Dirava ena nega, bona Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.”

¹⁶Iesu ia raka Galilea Gohu kone dekenai, Simona mai ena tadina Andrea danu ia itaia. Idia ruaosi be davara dekenai reke idia negea, badina idia be haoda taudia.

¹⁷Iesu ia gwau, “Umui mai lauegu murinai, dohore siahu lau henia umui dekenai, do umui haoda karaia, taunimanima umui abia.”

¹⁸Nega tamona edia reke idia rakatania, Iesu ena murinai idia raka.

¹⁹Sisina ia raka, vadaeni Iamesi, Sebedeo ena natuna, mai ena tadina Ioane danu ia itaia. Vanagi dekenai idia edia reke idia hanamoa noho.

²⁰Iesu ia gwau, “Lauegu murinai umui raka mai.” Vadaeni, ruaosi ese edia tamana Sebedeo mai ena gaukara taudia danu vanagi dekenai idia rakatania, Iesu ena murinai idia raka lao.

²¹Idia lao Kaperanauma hanua dekenai, unuseni Sabati Dina neganai, dubu lalonai Iesu ese ia hadibaia.

²²Taunimanima idia hoa bada iena hadibaia hereva dekenai, badina mai siahu danu ia hereva, taravatu hadibaia taudia bamona lasi.

²³Inai edia dubu dekenai be tau ta mai lauma dikana ia raka vareai, ia boiboi, ia gwau,

²⁴“Iesu, Nasareta hanua tauna, badina dahaka oi mai ai dekenai? Ai haorea totona oi mai, a? Lau diba oi. Oi be Dirava ena Helaga Tauna.”

²⁵Iesu ese lauma ia gwau henia, ia gwau, “Hereva lasi, inai tau oi rakatania lao.”

²⁶Lauma dikana ese inai tau ia hamarerea bada herea, bona mai boiboi bada danu ia murimuri lao.

²⁷Itaia taudia ibounai idia hoa bada, idia herevahereva sibodia dekenai, “Inai be dahaka? Hadibaia gauna matamata? Inai tau ena siahu dekenai lauma dikadia danu ia gwau henia, bona iena hereva gauna idia karaia.”

²⁸Vadaeni haraga momokani, Iesu ena kara sivarai, be Galilea kahana dekenai noho taudia ibounai idia kamonai.

²⁹Dubu ia rakatania neganai, Iesu be Simona bona Andrea edia ruma dekenai ia raka vareai, Iamesi bona Ioane danu.

³⁰Simona adavana ena sinana ia gorere dainai, ia hekure noho, mai kopina siahu bada. Nega tamona idia ese Iesu idia hamaoroa.

³¹Ia lao, hahine ena imana ia abia, bona ia ese hahine ia abia isi. Vadaeni, inai hahine ena gorere be nega tamona ia doko, ia toreisi, bona aniani ia henia idia dekenai.

³²Adorahi, dina ia diho neganai, gorere taudia bona mai lauma dikadia taudia ibounai idia mailaia Iesu dekenai.

³³Hanua taudia ibounai idia lao, idia hebou ruma ena iduara dekenai.

³⁴Gorere idauidau taudia momo Iesu ese ia hanamoa. Bona lauma dikadia momo ia lulua, bona lauma dikadia edia hereva dala ia koua, badina idia diba ia.

³⁵Daba maragi, dina ena diari ia mai lasi neganai, Iesu ia toreisi, taunimanima lasi gabuna dekenai ia lao, unuseni ia guriguri.

³⁶Simona mai ena bamona taudia danu ese Iesu idia tahua lao.

³⁷Idia davaria neganai, idia gwau, “Taunimanima ibounai idia tahua oi.”

³⁸Ia hereva, ia gwau, “Namo ita lao hanua haida, unuseni lau ura haroro karaia, badina inai totona lau mai.”

³⁹Vadaeni Iesu ia lao Galilea hanua ibounai dekenai. Unuseni edia dubu lalonai ia haroro, bona lauma dikadia ia lulua.

⁴⁰Lepera tauna ta ia mai Iesu dekenai, ia tui diho bona ia noia, ia gwau, “Bema oi ura, mani oi hanamoa lau, badina oiemu siahu be ia hegeregere.”

⁴¹Iesu ese mai bogahisihisi danu, iena imana ia atoa lepera tauna ena kopina dekenai. Ia gwau, “Lau ura. Hari oi goeva.”

⁴²Nega tamona, lepera gorere ia ore, unai tau ia goeva vadaeni.

⁴³Vadaeni Iesu ese ia siaia, to ia sisiba henia guna,

⁴⁴ia gwau, “Tau ta do oi hamaoroa lasi, to oi lao hahelagaia tauna dekenai, oiemu kopina goeva ia itaia totona. Bona Mose ena taravatu hegeregere, oi goeva dainai, harihari gauna Dirava dekenai oi henia. Inai oi karaia neganai, oiemu goeva be momokani vadaeni idia dekenai.”

⁴⁵To unai tau ia lao gabu idauidau dekenai, unai kara ena sivarai taunimanima ibounai dekenai ia haroro hedinaraia, unai dainai Iesu ia lou mai lasi hanua dekenai, to taunimanima lasi gabudia dekenai ia noho. To unuseni danu kahana ibounai dekena amo, taunimanima idia mai ia dekenai.