Read Buka Helaga (Hiri Motu) 1993 MAREKO 14 Bible Online

MAREKO 14 - Buka Helaga (Hiri Motu) 1993 bible

MAREKO 14

¹Pasova bona mai hatubua gauna lasi paraoa ariana, be dina rua gabeai do idia karaia. Dubu biagudia bona taravatu hadibaia taudia danu ese dala idia tahua, Iesu do idia dogoatao koikoi dala dekenai, bona alaia mase gwauraia.

²Idia hereva, “Aria neganai ita guia lasi, badina aria dekenai haboua taudia idia badu, bona heatu ia vara garina.”

³Iesu ia noho Betania hanua maragi neganai, Simona, lepera tauna ena ruma dekenai ia aniani. Hahine ta ia mai, bonana namo herea muramura, nadi kavabu lalonai, davana bada gauna ia mailaia. Inai kavabu ia makohia, bona muramura ia bubua Iesu ena kwarana dekenai.

⁴Unuseni noho taudia haida idia badu, idia gwau, “Dahaka badina inai davana moni bada gauna ia negea kava inai bamona?

⁵Bema unai bonana namo muramura ia hoia, 300 kina ia abia, ogogami taudia dekenai ia henia, be namo.” Hahine dekenai idia badu sisina.

⁶To Iesu ia gwau, “Umui rakatania. Iena kara umui koua lasi. Ia be kara namona lau dekenai ia karaia.

⁷Ogogami taudia be nega ibounai idia noho umui dekenai, bona umui ura neganai, kara namo umui karaia diba idia dekenai, to lau be nega ibounai umui dekenai lau noho lasi.

⁸Ia diba gauna ia karaia, lauegu tauanina ia dahua, idia be do idia guria lau totona.

⁹Momokani lau hamaoroa umui, tanobada ena kahana ibounai dekenai inai Sivarai Namona do idia haroro karaia, bona inai hahine ena kara danu do idia gwauraia, bona iena kara do idia laloatao.”

¹⁰Iuda Iskariote, diba tahua taudia 12 tauna ta, ia lao dubu biagudia dekenai, Iesu ia samania hereva ia gwauraia.

¹¹Dubu biagudia idia kamonai, idia moale, idia gwauhamata moni do idia henia. Inai dainai Iuda ese dala ia tahua, edena bamona koikoi dekenai edia imadia dekenai Iesu do ia atoa.

¹²Mai hatubua gauna lasi paraoa ariana dina ginigunana, Pasova mamoe natuna alaia dinana, iena diba tahua taudia ese Iesu idia nanadaia, “Edeseni oi ura Pasova aria ai karaia hegaegae, oi ania?”

¹³Iena diba tahua taudia rua Iesu ese ia siaia, ia gwau, “Umui lao, hanua badana dekenai umui raka vareai, unuseni ranu daramu huaia lao tauna do umui davaria. Iena murinai umui raka.

¹⁴Ia raka vareai gabuna, inai ruma ena biaguna dekenai do umui hereva, umui gwau, ‘Hadibaia tauna ia gwau: Edeseni lau bona lauegu diba tahua taudia Pasova aria do ai ania?’

¹⁵Ruma ena daiutu badana ta ataiai do ia hedinaraia, ia hagoevaia vadaeni. Unuseni iseda aria do umui karaia hegaegae.”

¹⁶Unai diba tahua taudia ruaosi idia lao, hanua badana lalonai idia raka vareai, Iesu ia hamaoroa bamona idia davaria, bona unai gabu dekenai Pasova aria idia karaia hegaegae.

¹⁷Adorahi, Iesu bona iena diba tahua taudia 12 idia mai.

¹⁸Idia helai, aniani ania, vadaeni Iesu ia gwau, “Momokani lau hamaoroa umui, hari nega tamona ita aniani hebou tauna ta ese do ia samania lau.”

¹⁹Idia herevahereva mai lalohisihisi bada danu, idia ta ta ese idia hereva, “Lau be lasi, a? Lau be lasi, a?”

²⁰Iesu ese idia ia hamaoroa, ia gwau, “Taudia 12 tauna ta, ia ese lau danu disi tamona lalonai imana ia atoa.

²¹Taunimanima ena Natuna ia lao, Buka Helaga ia torea bamona, to Taunimanima ena Natuna samania tauna, madi! Bema ia vara lasi be namo!”

²²Aniani idia ania neganai, Iesu ese paraoa ia abia, ia guriguri, Dirava dekenai ia tanikiu henia, ia makohia, idia dekenai ia henia, ia gwau, “Umui abia, lauegu tauanina be inai.”

²³Kapusi ia abia, ia tanikiu henia, ia henia idia dekenai, idia ibounai idia inua.

²⁴Idia dekenai ia hamaoroa, ia gwau, “Lauegu rarana be inai, taravatu matamata ena rarana, ia bubua taunimanima momo dainai.

²⁵Momokani lau hamaoroa umui, lau ese uaina do lau inua lou lasi, ela bona Dirava ena Basileia lalonai uaina matamata do lau inua.”

²⁶Idia ese ane idia abia murinai, Olive Ororo dekenai idia raka lao.

²⁷Iesu ese idia dekenai ia hereva henia, ia gwau, “Umui ibounai, emui abidadama lau dekenai do umui rakatania, badina inai bamona Buka Helaga ia torea vadaeni: ‘Mamoe naria tauna lau alaia neganai, mamoe do idia heau kava.’

²⁸To gau tamona do umui laloa, lau toreisi lou murinai do lau lao Galilea dekenai, unai neganai egu murinai do umui mai.”

²⁹Petero ese Iesu ia hereva henia, ia gwau, “Taunimanima ibounai do idia rakatania oi, to oi do lau rakatania lasi momokani.”

³⁰Iesu ia haere henia, “Momokani lau hamaoroa oi, hari hanuaboi, kokoroku nega rua ia do boiboi lasi, nega toi do oi hereva, oi diba lasi lau.”

³¹Petero ia hereva goada, ia gwau, “Bema oi mase neganai lau danu mase, lau be do lau hunia lasi oi, egu hereva dekenai. Lau be do lau hunia lasi oi, lasi momokani.” Ibounai idia hereva inai bamona.

³²Gabu ta ladana Getesemane dekenai idia ginidae, iena diba tahua taudia dekenai Iesu ia gwau, “Iniseni umui helai, lau lao guriguri gwauraia.”

³³Petero bona Iamesi bona Ioane ia hakaua lao neganai, Iesu ena lalona be ia hisihisi bada.

³⁴Ia hereva idia dekenai, “Lauegu lauma be ia hisihisi bada, mase bamona, umui noho iniseni, bona naria noho.”

³⁵Ia raka lao sisina, tano dekenai ia moru diho, ia guriguri, iena guriguri hereva be, do ia abia nega dika ia ura lasi abia, bema dala ia noho.

³⁶Ia gwau, “Aba, Tamagu, gau ibounai oi karaia diba, inai kapusi lau dekena amo oi abia lao, to egu ura oi karaia lasi, oiemu ura sibona mo do oi karaia.”

³⁷Ia mai lou, ia ese idia ia davaria, idia mahuta noho. Petero dekenai ia gwau, “Simona e, oi mahuta noho, a? Oi goada lasi hora gauna tamona oi naria, a?

³⁸Umui naria, umui guriguri, dika ese umui ia abia garina. Lauma ia ura goada, to tauanina ia manokamanoka.”

³⁹Ia lao, ia guriguri lou.

⁴⁰Ia mai lou, ia davaria idia mahuta lou, badina matadia idia metau, idia haere henia diba lasi.

⁴¹Nega namba 3 ia mai lou, idia dekenai ia hereva, “Umui mahuta? Umui laga-ani noho? Vadaeni! Negana ia ginidae. Hari Taunimanima ena Natuna be ia henia vadaeni kara dika taudia dekenai.

⁴²Umui toreisi, ita lao, ia ese lau ia samania tauna be kahirakahira!”

⁴³Iesu ia hereva noho neganai, nega tamona Iuda, taudia 12 tauna ta ia mai. Iuda danu be tau momo, imadia dekenai be edia kaia bona au idia dogoatao. Idia be dubu biagudia bona taravatu hadibaia taudia bona hanua tau badadia ese idia siaia taudia.

⁴⁴Iesu ia samania tauna ese toana ta ia henia idia dekenai, ia gwau, “Do lau kisi henia tauna, umui dogoatao, umui hakaua lao namonamo.”

⁴⁵Vadaeni Iuda ia mai, bona maoromaoro ia lao Iesu dekenai, ia gwau, “Hadibaia tauna e!” Bona ia ese Iesu dekenai ia kisi.

⁴⁶Idia dogoatao Iesu, idia abia.

⁴⁷Gini kahirakahira tauna ta ese iena kaia ia veria daekau, Hahelagaia Tauna Badana ena hesiai tauna ena taiana ia utua oho.

⁴⁸Iesu ese idia dekenai ia hereva, ia gwau, “Mai emui kaia bona au danu umui mai lau abia gwauraia, henaoa tauna umui guia bamona, a?

⁴⁹Dina ibounai umui danu lau noho Dubu Helaga lalonai, lau hadibaia umui, to umui dogoatao lasi lau. To hari inai kara ia vara be Buka Helaga hamomokania totona.”

⁵⁰Diba tahua taudia ibounai idia rakatania, idia heau.

⁵¹Uhau tauna ta Iesu ena murinai ia lao, rami sibona mo ia kwatua, ia danu idia dogoatao.

⁵²To ia ese iena rami ia rakatania, kopina kavakava ia heau.

⁵³Iesu idia hakaua lao Hahelagaia Tauna Badana ena ruma dekenai. Dubu biagudia, bona hanua tau badadia, bona taravatu hadibaia taudia ibounai danu, be unuseni idia haboua.

⁵⁴Iesu ena murinai be Petero ia raka, to sisina daudau ia noho. Petero ese Hahelagaia Tauna Badana ena ruma ena ariara lalonai ia raka vareai, hesiai taudia danu ia helai, lahi siahuna dekenai.

⁵⁵Dubu biagudia bona kaunsolo taudia ibounai ese Iesu hamasea ena badina idia tahua, to ta idia davaria lasi.

⁵⁶Badina be tau momo ese samani hereva koikoi sibona idia henia, to edia samani hereva be tamona lasi.

⁵⁷Haida idia toreisi, idia samania koikoi, idia gwau,

⁵⁸“Ai kamonai ia gwau inai bamona, ‘Inai taunimanima edia imadia dekenai karaia Dubu Helaga, lau ese do lau hamakohia, bona dina toi murinai, imana dekenai karaia lasi gauna ta do lau haginia.’ ”

⁵⁹To idia edia samani hereva danu be hegeregere lasi.

⁶⁰Hahelagaia Tauna Badana ia toreisi, Iesu ia nanadaia, ia gwau, “Oi hereva lasi, a? Inai taunimanima idia samania oi. Edena kerere oi karaia?”

⁶¹Ia hereva lasi, ia haere henia lasi. Gabeai Hahelagaia Tauna Badana ese ia nanadaia lou, ia gwau, “Oi be Keriso, a? Oi be Ladana Bada ena Natuna, a?”

⁶²Iesu ia gwau, “Lau inai, bona gabeai Taunimanima ena Natuna do umui itaia, Siahu Ibounai Dirava ena idiba kahanai ia helai, guba ena ori lalonai do ia diho mai.”

⁶³Hahelagaia Tauna Badana ese sibona ena dabua ia darea, ia gwau, “Badina dahaka ita ese ia samania daladia ita tahua noho?

⁶⁴Dirava ena ladana hadikaia herevana umui kamonai vadaeni, umui laloa dahaka?” Ibounai idia gwau ia mase be namo.

⁶⁵Haida ese Iesu dekenai idia kanudi, haida ese iena matana idia koua, idia botaia, idia gwau, “Peroveta hereva gwauraia!” Hesiai taudia haida ese edia imadia dekenai idia botaia.

⁶⁶Petero ia noho ariara dekenai, be Hahelagaia Tauna Badana ena hesiai kekeni ta ia mai.

⁶⁷Petero be lahi ena siahu ia abia neganai, hesiai kekeni ese ia itaia, ia gwau, “Oi danu be Iesu, Nasareta tauna ena turana?”

⁶⁸To ia gwau, “Lasi, inai tau lau diba lasi, bona oiemu hereva ena anina lau diba lasi.” Murimuri dekenai ia raka lao, iduara kahirakahira, unai neganai kokoroku ia boiboi.

⁶⁹Gabeai hesiai kekeni ese ia itaia, bona gini noho taudia dekenai ia hereva lou, ia gwau, “Iesu ena turana ta be inai.”

⁷⁰Petero ia gwau lou, “Lasi.” Nega sisina Petero badinai gini taudia idia hereva lou, “Momokani, oi be idia ta, badina oi be Galilea tauna.”

⁷¹Hereva dika siahu bada ia gwauraia, ia gwau, “Hari oi hereva tau lau diba lasi, lasi momokani.”

⁷²Kokoroku ia boiboi lou, vadaeni, Petero ese Iesu ena hereva ia laloa. Guna Iesu ia gwau, “Kokoroku nega rua ia do boiboi lasi, nega toi do oi hereva, oi diba lasi lau.” Vadaeni, Petero ia laloa momo, ia tai.