Read Buka Helaga (Hiri Motu) 1993 MAREKO 16 Bible Online

MAREKO 16 - Buka Helaga (Hiri Motu) 1993 bible

MAREKO 16

¹Sabati Dina ia ore murinai, Maria Magadala bona Maria, Iamesi ena sinana, bona Salome ese bonana namo muramura idia hoia, Iesu ena tauanina dekenai idia atoa totona.

²Pura ena dina ginigunana, dina ia daekau, daba maragi neganai, idia lao guria gabuna dekenai.

³Idia sibona idia herevahereva, “Daika ese inai guria gabuna koua nadi do ia kokia?”

⁴Matadia idia negea atai dekenai, idia itaia, koua nadi badana be ena gabu dekenai ia noho lasi.

⁵Guria gabuna idia raka vareai neganai, uhau tauna ta ia helai idiba kahanai, idia itaia. Iena dabua be lata bona kurokuro. Idia gari bada.

⁶To ia ese idia dekenai ia hereva, ia gwau, “Umui gari lasi, umui ese Iesu, Nasareta tauna, idia alaia mase satauro dekenai, umui tahua noho, to ia toreisi lou vadaeni, iniseni ia noho lasi. Guna iena tauanina idia atoa gabuna mani umui itaia.

⁷Umui lao, iena diba tahua taudia bona Petero dekenai umui hamaoroa, Iesu ia lao umui vairanai, Galilea dekenai. Unuseni do umui itaia, umui dekenai ia hamaoroa guna bamona.”

⁸Karaharaga idia raka lao murimuri dekenai, guria gabuna idia rakatania, idia heau, badina idia hoa bada, bona idia heudeheude. Tau ta dekenai idia hamaoroa lasi, badina idia gari.

⁹Iesu ia toreisi murinai, pura ena dina ginigunana daba maragi neganai, kara ginigunana ia karaia be ia gini Maria Magadala ena vairanai, Maria ese Iesu ia itaia. Guna Maria dekena amo lauma dikadia 7 ia lulua oho.

¹⁰Maria ia lao, guna idia noho Iesu danu taudia dekenai ia hamaoroa, idia tai noho neganai.

¹¹Iesu ia mauri sivaraina, bona Maria ese ia itaia herevana idia kamonai neganai idia abidadama henia lasi.

¹²Gabeai, diba tahua taudia rua be gunika dekenai idia raka lao gwauraia. Iesu, idau tauna bamona, ia sibona ia hedinaraia idia dekenai.

¹³Idia ruaosi idia lao, diba tahua taudia haida dekenai idia hamaoroa, to idia abidadama henia lasi.

¹⁴Gabeai diba tahua taudia 11 idia aniani neganai, Iesu ia hedinarai mai, idia itaia. Idia dekenai ia gwau henia, edia abidadama lasi dainai, bona edia lalo auka dainai. Badina Iesu ese mase dekena amo ia toreisi lou idia itaia taudia edia hereva idia abidadama henia lasi.

¹⁵Idia dekenai ia hamaoroa, ia gwau, “Umui lao tanobada kahana ibounai dekenai, Sivarai Namona umui haroro henia taunimanima ibounai dekenai.

¹⁶Daika daika idia abidadama henia, bona bapatiso idia abia, be mauri do idia davaria, to abidadama henia lasi taudia be Dirava ena Kota Badana dekenai do idia lusi momokani.

¹⁷Abidadama taudia ese inai hoa karadia do idia karaia: Lauegu ladana dekenai lauma dikadia do idia lulua lao, gado matamata idauidau do idia hereva,

¹⁸gaigai do idia abia isi, bema mase muramura idia inua kerere neganai, do ia hadikadia lasi, bona edia imadia gorere taudia edia latanai idia atoa neganai, gorere do ia ore.”

¹⁹Lohiabada Iesu ese idia dekenai ia hereva henia ore, vadaeni guba ese Iesu ia abia daekau, bona Dirava ena idiba kahanai ia helai diho.

²⁰Vadaeni diba tahua taudia idia lao, gabu ibounai dekenai idia haroro. Lohiabada be idia danu nega tamona ia gaukara, bona ia ese hoa karadia dekena amo, idia edia hereva ia hamomokania vadaeni.