Read Buka Helaga (Hiri Motu) 1993 MAREKO 4 Bible Online

MAREKO 4 - Buka Helaga (Hiri Motu) 1993 bible

MAREKO 4

¹Iesu ia hadibaia lou kone dekenai. Bona taunimanima momo idia haboua ia dekenai. Idia be momo herea dainai, Iesu be vanagi ta dekenai ia guia, davara latanai. Vanagi latanai ia helai, bona taunimanima idia noho kone dekenai.

²Gau momo ia hadibaia parabole dekenai. Iena hadibaia hereva lalonai ia gwau,

³“Umui kamonai. Tau ta ena uhe ia hadoa tano dekenai.

⁴Ia hadoa neganai, uhe haida idia moru dala dekenai, bona manu idia mai idia ania.

⁵Uhe haida idia moru nadi gabuna dekenai, unuseni be tano momo lasi dainai, idia tubu haraga, badina be tano ia dobu lasi.

⁶Dina ia daekau neganai, iena siahu ese unai uhe matamata ia hamasea, badina idia be ramudia lasi.

⁷Uhe haida be idia moru ava ginigini lalonai, bona uhe edia tubu dala be ava ginigini ese idia koua, bona au huahua ia atoa lasi.

⁸To uhe haida idia moru tano namona dekenai, idia tubu namo herea, huahua idia atoa, haida 30, haida 60, haida 100.”

⁹Vadaeni Iesu ia gwau, “Mai taiana tauna, namo ia kamonai.”

¹⁰Gabeai, Iesu sibona ia noho neganai, ia kamonai henia taudia bona iena diba tahua taudia 12 ese unai parabole ena anina idia tahua.

¹¹Ia hereva idia dekenai, ia gwau, “Dirava ena Basileia hereva ia hunia lasi umui dekenai, to murimuri taudia dekenai, gau ibounai lau hadibaia parabole dekenai.

¹²Buka Helaga ia gwauraia inai: “ ‘Idia itaia, to anina idia diba lasi, bona idia kamonai, to hereva ena anina idia davaria lasi, edia lalona idia giroa garina, bona edia dika be do ia gwauatao garina.’ ”

¹³Iesu ia hamaoroa idia dekenai, “Bema inai parabole ena anina umui diba lasi, edena bamona parabole haida edia anina dohore umui diba?

¹⁴Uhe hadoa tauna ese Dirava ena hereva ia hadoa.

¹⁵Taunimanima haida be unai hereva ia moru dala dekenai tano bamona. Hereva idia kamonai, to nega tamona Satani ia mai, idia lalonai hadoa hereva gauna ia abia lao.

¹⁶Hegeregere, uhe haida idia moru nadi dekenai, be taunimanima haida bamona. Hereva idia kamonai neganai, idia abia dae haraga, mai moale danu.

¹⁷To idia be ramu lasi dainai, nega sisina mo idia goada. Gabeai inai hadibaia hereva dainai, nega dika bona dagedage idia mai neganai, idia moru haraga.

¹⁸Bona haida be uhe ia moru ava ginigini lalonai hegeregere. Inai taudia be hereva idia kamonai vadaeni.

¹⁹To tanobada gaudia dekenai laloa momo, bona kohu ura henia bada, bona ura dika idauidau dainai, hereva ena tubu dala idia koua. Bona au huahua idia atoa lasi.

²⁰To haida be uhe ia moru tano namona dekenai hegeregere. Hereva idia kamonai, idia abia dae goada, au huahua idia abia. Haida 30, haida 60, haida 100.”

²¹Iesu ma idia dekenai ia hereva, ia gwau, “Lamepa ita abia neganai, ita atoa uro lalonai, o mahuta patana henunai, a? Lasi, to lamepa ena gini gabuna dekenai ita atoa.

²²Hunia gaudia ibounai dohore idia hedinaraia, koua gaudia ibounai dohore idia kehoa.

²³Mai taiana tauna, namo ia kamonai.”

²⁴Bona ia gwau, “Umui kamonai gaudia umui laloa namonamo. Umui henia hegeregere, dohore unai bamona idia henia lou umui dekenai, bona gau haida danu.

²⁵Mai ena gau tauna, gau haida danu do ia abia, to gau lasi tauna, ena gau abia dala do ia koua.”

²⁶Ma Iesu ia gwau, “Dirava ena Basileia be inai bamona: Tau ta tano latanai uhe ia negea.

²⁷Hanuaboi ia mahuta, dina neganai ia toreisi, vadaeni uhe hadoa gauna ia tubu bona ia vara, to hadoa tauna ia diba lasi edena bamona uhe ia tubu.

²⁸Tano sibona ese huahua ia havaraia, rau ia tubu guna, gabeai kwarana, inai murinai be anina ia vara.

²⁹To anina ia mage neganai, karaharaga ia utua kaia dekenai, badina huahua gogoa negana ia ginidae.”

³⁰Iesu ia gwau, “Dirava ena Basileia be dahaka bamona? Edena parabole dekenai anina ita hedinaraia?

³¹Ia hegeregere mastadi au ena uhena bamona, tano dekenai hadoa neganai be ia maragimaragi, tanobada ena uhe idauidau edia bada ia be henunai.

³²To idia hadoa, bona ia tubu neganai, ia bada herea, aniani ava ibounai edia bada ia hanaia, iena rigi danu be bada herea, bona ataiai manudia idia helai unuseni, iena keruma dekenai.”

³³Bona parabole unai bamona momo dekenai Iesu ia hadibaia, idia kamonai diba hegeregere.

³⁴Ia hadibaia parabole dekenai sibona. To gabeai, ia bona iena diba tahua taudia sibona idia noho neganai, anina ibounai ia hadibaia idia dekenai.

³⁵Unai dina, adorahi neganai, Iesu ese diba tahua taudia dekenai ia hamaoroa, ia gwau, “Davara unai kahanai ita hanaia lao.”

³⁶Vadaeni, idia ese unai taunimanima momo idia rakatania, Iesu danu vanagi dekenai idia guia, idia heau. Vanagi haida danu idia lao.

³⁷Lai bada herea ia mai, bona hurehure bada idia daekau, ela bona vanagi kahirakahira ia honu.

³⁸Iesu ia mahuta vanagi duduna dekenai, geda manokamanoka latanai. Idia lao ia dekenai, idia hanogaia. Idia gwau, “Hadibaia tauna e, oi laloa lasi, kahirakahira ita mase?”

³⁹Vadaeni Iesu ia toreisi, lai dekenai ia gwau henia, bona davara dekenai ia hereva, ia gwau, “Umui doko, umui maino noho.” Vadaeni, nega tamona lai ia doko, bona hurehure be lasi.

⁴⁰Iena diba tahua taudia dekenai Iesu ia gwau, “Umui dahaka gari momo? Edena bamona umui be abidadama lasi?”

⁴¹Idia hoa bona gari bada, idia hereva, “Inai tau be daika? Lai bona davara ese iena hereva idia kamonai henia!”