Read Buka Helaga (Hiri Motu) 1993 MAREKO 5 Bible Online

MAREKO 5 - Buka Helaga (Hiri Motu) 1993 bible

MAREKO 5

¹Davara unai kahanai kone dekenai idia kamokau, tano ladana Gerasa.

²Iesu ese vanagi ia rakatania neganai, mase guria gabuna dekenai noho tauna ta karaharaga ia mai ia dekenai. Lauma dikana ia noho inai tau lalonai.

³Taunimanima be hegeregere lasi idia dogoatao, bona idia kwatua diba lasi. Auri kwatua gaudia danu be hegeregere lasi.

⁴Nega momo auri kwatua gaudia dekenai iena imana bona iena aena idia guia, to imana bona aena kwatua gaudia ia makohia ore. Tau ta ese ia hamanadaia hegeregere lasi.

⁵Dina ibounai, hanuaboi danu, mase guria gabuna dekenai bona ororo dekenai, ia tai bona boiboi, bona iena kopina ia utua nadi dekenai.

⁶Daudau dekenai ia ese Iesu ia itaia, vadaeni ia heau Iesu dekenai bona ia tomadiho henia.

⁷Ia boiboi goada, “Dahaka oi ura karaia lau dekenai, Iesu, Dirava Ataiai Momokani ena Natuna? Dirava ena ladana dainai lau noinoi, lau oi hahisia lasi.”

⁸Badina Iesu ia hereva guna, ia gwau, “Vadaeni, lauma dikana e, inai tau oi rakatania, oi lao!”

⁹Bona Iesu ia gwau, “Oiemu ladana be daika?” Ia haere henia, “Lauegu ladana be Hutuma, badina ai be momo herea.”

¹⁰Ia noinoi goada Iesu dekenai, “Mani ai do oi lulua daudau lasi. Ai ura noho inai tano dekenai.”

¹¹Unuseni ororo ta dekenai boroma momo herea idia aniani noho.

¹²Lauma dikadia ese Iesu idia noia, idia gwau, “Oi siaia ai boroma dekenai, bona boroma lalonai ai vareai.”

¹³Vadaeni Iesu ese idia ia siaia, bona lauma dikadia ese unai tau idia rakatania, idia lao vareai boroma lalonai. Nega tamona ororo dekena amo boroma idia heau diho lao, idia moru davara dekenai. Ibounai idia maloa, idia mase. Idia be 2000 bamona.

¹⁴Boroma naria taudia idia heau lao hanua, bona uma gabudia dekenai, unai sivarai idia gwauraia loaloa. Vadaeni taunimanima idia lao, dahaka ia vara gauna idia itaia.

¹⁵Idia mai Iesu dekenai, bona guna mai ena lauma dika momo tauna idia itaia, ia helai diho, mai dabua, bona iena lalona be namo lou. Vadaeni ibounai idia gari.

¹⁶Unai kara idia itaia taudia ese boroma bona lauma dikadia lulua sivarai idia hamaoroa hanua taudia dekenai.

¹⁷Vadaeni idia ese Iesu dekenai idia noinoi, edia tano do ia rakatania.

¹⁸Vanagi dekenai Iesu ia guia neganai, unai guna mai lauma dikadia tauna ese ia noinoi ia dekenai, ia gwau, “Lau ura loaloa oi danu.”

¹⁹Iesu ia gwau, “Lasi, oi lao oiemu varavara bona turana dekenai, Lohiabada ia bogahisihisi oi dekenai, bona oi ia hamauria sivarai do oi hamaoroa.”

²⁰Vadaeni ia lao Hanua 10, unuseni ia ese Iesu ena kara ia dekenai ena sivarai ia harorolaia, taunimanima ibounai idia hoa bada.

²¹Iesu ese vanagi dekenai ia hanaia lou davara unai kahanai, vadaeni taunimanima momo idia haboua ia dekenai, ia be kone dekenai ia noho.

²²Dubu ena lohia ta, iena ladana be Iairo, ese Iesu ia itaia neganai ia mai, ia tui diho Iesu ena aena badinai.

²³Ia noinoi goada, ia gwau, “Egu natuna kekeni maragina be kahirakahira ia mase, lau noinoi, mani oi mai, oiemu imana oi atoa iena latanai, oi hamauria.”

²⁴Iesu be dubu lohia tauna danu ia lao, taunimanima momo ese idia hagegea, bona momo be iena murinai idia raka.

²⁵Taunimanima edia huanai be hahine ta. Inai hahine ia gorere lagani 12, iena gorere be rara moru.

²⁶Muramura taudia momo ese iena gorere idia hanamoa gwauraia, to idia be hegeregere lasi. Iena moni bona kohu ia negea ore, to iena gorere be ia bada noho.

²⁷Iesu ena kara sivarai ia kamonai. Unai dainai ia mai, taunimanima edia huanai ia vareai, Iesu ena dabua ia dogoatao.

²⁸Badina be ia gwau, “Bema iena dabua sibona lau dogoatao, mauri do lau davaria.”

²⁹Nega tamona rara gorere ia doko, hahine sibona ena lalona dekenai ia diba iena gorere ia ore.

³⁰Iesu ia diba iena lalona dekena amo hamauria siahu ia lao murimuri dekenai, unai dainai ia giroa, taunimanima dekenai ia nanadaia, “Lauegu dabua daika ese ia dogoatao?”

³¹Iena diba tahua taudia idia gwau, “Taunimanima momo herea oi kahirakahira idia gini, idia dogoatao oi, badina dahaka oi gwau, ‘Daika ia dogoatao lau?’ ”

³²To Iesu ia giroa, ia dogoatao tauna ia tahua.

³³Unai hahine ia heudeheude mai gari danu, ia diba dahaka ia vara ia dekenai. Ia mai, ia tui diho Iesu ena vairanai, dahaka ia vara gauna ia hamaoroa ia dekenai.

³⁴Iesu ia gwau, “Lauegu natuna, oiemu abidadama dainai, mauri oi davaria vadaeni, oi lao mai maino danu, bona oiemu gorere do oi davaria lou lasi.”

³⁵Ia hereva noho neganai, dubu lohia tauna ena taudia haida be iena ruma dekena amo idia mai. Dubu lohia dekenai idia hamaoroa, idia gwau, “Oiemu natuna ia mase vadaeni. Badina dahaka hadibaia tauna dekenai oi noinoi noho?”

³⁶To edia hereva Iesu ia kamonai neganai, ia hereva dubu lohia dekenai, ia gwau, “Oi gari lasi, oi abidadama henia sibona.”

³⁷Taunimanima dekenai ia gwau, “Umui noho, Petero bona Iamesi bona iena tadina Ioane sibona mo idia mai lau danu.”

³⁸Idia lao, dubu lohia ena ruma dekenai idia ginidae, unuseni Iesu ese ia itaia, taunimanima momo idia taitai bada bona lalohisihisi regena idia karaia noho.

³⁹Ia raka vareai, ia nanadaia, “Badina dahaka umui boiboi bona tai momo? Kekeni ia mase lasi, ia mahuta.”

⁴⁰Idia kiri ia dekenai, to Iesu ese idia ibounai ia lulua murimuri dekenai. Unai kekeni ena tamana bona sinana, bona iena bamona taudia sibona, ia hakaua lao kekeni ia hekure gabunai.

⁴¹Iesu ese kekeni ena imana ia abia, ia hereva henia, ia gwau, “Talita kumi,” (anina be, “Kekeni e, oi toreisi”).

⁴²Nega tamona unai mase kekeni ese mauri ia davaria lou, ia toreisi bona ia raka. Iena laganai be 12. Ibounai idia hoa dikadika.

⁴³Iesu ese sisiba goada ia henia idia dekenai, inai kara be taunimanima dekenai do idia hamaoroa lasi. Bona ia hereva, aniani sisina kekeni dekenai idia henia, ia ania.