Read Buka Helaga (Hiri Motu) 1993 MAREKO 7 Bible Online

MAREKO 7 - Buka Helaga (Hiri Motu) 1993 bible

MAREKO 7

¹Farisea taudia bona taravatu hadibaia taudia haida Ierusalema dekena amo idia mai, Iesu dekenai idia haboua.

²Idia ese iena diba tahua taudia haida idia itaia, imadia mai miro danu aniani idia ania, edia imadia idia huria lasi.

³Badina be Farisea bona Iuda taudia aniani idia ania neganai, imadia idia huria namonamo guna. Inai be edia sene taudia edia taravatu.

⁴Hoihoi gabuna dekena amo idia mai, bema idia digu lasi guna, idia aniani lasi. Taravatu momo inai bamona idia naria, kapusi, sosipani, aniani udaia gaudia huria taravatu.

⁵Farisea taudia bona taravatu hadibaia taudia ese Iesu idia nanadaia, idia gwau, “Badina dahaka oiemu diba tahua taudia ese sene taudia edia taravatu idia naria lasi, aniani idia ania imadia mai miro danu?”

⁶Ia hereva idia dekenai, ia gwau, “Umui be koikoi taudia, Isaia ese emui kara ia hedinaraia vadaeni. Ia torea inai bamona, ia gwau: “ ‘Inai bese taudia edia ududia sibona idia hanamoa lau, to edia kudoudia be daudau masemase lau dekena amo.

⁷Idia tomadiho lau dekenai, to anina lasi. Idia edia hadibaia hereva be taunimanima edia taravatu sibona.’

⁸“Umui ese Dirava ena taravatu umui rakatania vadaeni, bona taunimanima edia taravatu sibona umui dogoatao noho.”

⁹Ia gwau henia, ia gwau, “Momokani umui ese Dirava ena taravatu umui negea, emui sene taravatu umui dogoatao totona.

¹⁰Mose ia gwau, ‘Oiemu tamana bona sinana oi hanamoa,’ inai danu, ‘Tamana o sinana ia hadikaia tauna, umui alaia mase.’

¹¹To umui gwau tau ta ese iena tamana o sinana dekenai ia hamaoroa, ‘Lauegu hanamoa gauna umui dekenai lau henia lasi, badina ia be Kobana.’ (Kobana ena anina be, Dirava dekenai ia atoa vadaeni.)

¹²Inai dala dekenai umui gwau iena tamana bona sinana ia durua lasi be namo.

¹³Inai bamona dala umui emui taravatu dekenai Dirava ena hereva umui hadikaia, taunimanima danu umui hadibaia inai bamona. Kara momo unai bamona umui karaia danu.”

¹⁴Iesu ese taunimanima momo ia boiria, idia mai lou ia dekenai, ia hereva henidia, ia gwau, “Umui ibounai lauegu hereva kamonai namonamo, bona diba.

¹⁵Murimuri dekenai noho gauna ia vareai tau lalonai ese unai tau ia hadikaia lasi, to lalona dekena amo mai gauna ese ia hadikaia.

¹⁶Mai taiana tauna, namo ia kamonai.”

¹⁷Iesu ese taunimanima ia rakatania, bona ruma dekenai ia raka vareai neganai, iena diba tahua taudia ese iena parabole ena anina idia nanadaia.

¹⁸Ia hereva idia dekenai, ia gwau, “Umui danu inai hereva anina umui diba lasi, a? Murimuri dekenai noho gauna ia vareai tau lalonai ese unai tau ia hadikaia lasi. Inai umui diba lasi, a?

¹⁹Badina be unai tau ena lalona ia vareai lasi, to ia lao bogana lalonai sibona, bona inai murinai ia lao negea gabuna, ani?” Unai hereva dekenai aniani gaudia ibounai ia gwauraia idia goeva.

²⁰Ia hereva lou, ia gwau, “Taunimanima edia lalona dekena amo daekau gaudia ese taunimanima idia hadikaia.

²¹Badina be taunimanima edia lalona dekena amo daekau gaudia be, laloa dikadia, sihari kava karadia, henaoa kara, taunimanima alaia kara, heudahanai kara,

²²tanobada gaudia ura dikadika kara, kerere idauidau, koikoi kara, lebulebu mai matabodaga kara, mata dika kara, tau ta ena ladana hadikaia kava kara, hekokoroku kara, bona Dirava ura lasi kara.

²³Inai gau dikadia ibounai lalona dekena amo idia mai neganai, taunimanima idia hamiroa bona hadikaia.”

²⁴Unai gabu Iesu ia rakatania, ia lao Turo bona Sidono kahanai. Ia vareai ruma ta dekenai, ia ura taunimanima ta ia diba lasi, to ena hunia dala be lasi.

²⁵Hahine ta ena natuna kekeni maragina be mai lauma dikana danu. Iesu ena kara sivarai ia kamonai, maoromaoro ia mai, ia tui diho Iesu ena aena badinai.

²⁶Inai hahine be Iuda lasi hahinena, iena bese be Suro Penise. Ia noinoi Iesu dekenai, natuna lalonai noho lauma dikana ia lulua oho.

²⁷Iesu ia gwau, “Maragidia idia boga kunu guna be namo, edia aniani henia sisia dekenai be dika.”

²⁸Hahine ia haere henia, ia gwau, “Lohiabada e, momokani, to sisia be pata henunai maragidia edia aniani momoru idia ania.”

²⁹Hahine dekenai Iesu ia hereva henia, ia gwau, “Inai hereva dainai oi lao, lauma dikana ese oiemu natuna ia rakatania vadaeni.”

³⁰Ia giroa lou iena ruma dekenai, kekeni ia davaria, mahuta patana dekenai ia hekure, lauma dikana ia rakatania vadaeni.

³¹Turo tanona Iesu ia rakatania, Sidono tanona bona Hanua 10 tanona ia raka hanaia, Galilea Gohu dekenai ia ginidae.

³²Idia ese taia kudima bona hereva diba lasi tauna idia hakaua lao ia dekenai. Idia noia iena imana ia atoa ia latanai.

³³Taunimanima dekena amo Iesu ese ia hakaua siri idau gabu dekenai, vadaeni iena ima kwakikwakina unai tau ena taiana lalonai ia atoa. Unai murinai Iesu ia kanudi, bona tau ena malana dekenai iena ima kwakikwakina mai kanudi danu ia atoa.

³⁴Iesu ese iena matana ia negea gubai, ia noinoi, gabeai ia gwau, “Epata,” hereva anina be, “Oi kehoa.”

³⁵Vadaeni unai tau ena taiana ia kehoa vadaeni, ena malana ia ruhaia, bona ia hereva namonamo.

³⁶Iesu ese idia ia hamaoroa, tau ta idia hamaoroa lasi, to idia kamonai lasi, idia lao, sivarai idia kiki loaloa momo.

³⁷Idia hoa bada, idia gwau, “Gau ibounai ia karaia namo herea, taia kudima tauna ena taiana ia kehoa, hereva diba lasi tauna ena malana ia hanamoa.”