Read Buka Helaga (Hiri Motu) 1993 LUKA 12 Bible Online

LUKA 12 - Buka Helaga (Hiri Motu) 1993 bible

LUKA 12

¹Unai neganai taunimanima momo herea idia haboua, hegeregere aena dekenai idia ta ta dekenai moia tao moia tao. Vadaeni Iesu ese iena diba tahua taudia dekenai ia hereva henia guna, ia gwau, “Umui naria namonamo Farisea taudia edia koikoi kara dekenai.

²Koua gaudia ibounai do idia hedinarai, bona hunia gaudia ibounai be do idia diba.

³Unai dainai, dibura lalonai umui gwauraia herevadia be diari dekenai do idia kamonai. Bona ruma lalonai umui hereva metairametaira gaudia, be ruma ena ataiai dekena amo do idia harorolaia.

⁴“Egu turadia e, lau hamaoroa umui dekenai, tauanina do idia alaia diba, to mase murinai gau ta do idia karaia diba lasi taudia dekenai do umui gari lasi.

⁵To lau hamaoroa umui dekenai, daika dekenai do umui gari: Umui do ia alaia mase murinai, ia be mai siahu, mase gabuna dekenai umui do ia negea diho Diravana, ia dekenai do umui gari!

⁶“Manu maragidia 5 edia davana be toea rua sibona, ani? To Dirava ese idia ta ia laloaboio lasi.

⁷Umui emui kwarana huina ibounai ia ese ia duahia ore. Unai dainai, do umui gari lasi, umui ese manu maragidia momo edia davana umui hanaia.

⁸“Lau hamaoroa umui dekenai, taunimanima edia vairana dekenai lau do idia gwauraia hedinarai taudia ibounai be, Taunimanima ena Natuna ese Dirava ena aneru edia vairana dekenai, idia do ia gwauraia hedinarai.

⁹To taunimanima edia vairana dekenai lau do ia hunia tauna, be lau ese Dirava ena aneru edia vairana dekenai do lau hunia.

¹⁰“Taunimanima ena Natuna idia hereva dika henia taudia ibounai edia dika do ia gwauatao. To Lauma Helaga dekenai ia hereva dika henia tauna ena dika do ia gwauatao lasi.

¹¹“Dubu edia biaguna, bona hanua edia lohia bona siahu taudia edia vairana dekenai umui do idia hakaua neganai, emui lalona do idia hekwarahi lasi, edena bamona do umui haere, o edena bamona do umui hereva.

¹²Badina be, unai neganai do umui gwauraia herevadia, be Lauma Helaga ese do ia hadibaia umui dekenai.”

¹³Taunimanima edia huanai, tau ta ese Iesu dekenai ia noia, ia gwau, “Hadibaia tauna e, mani emu kara lauegu kakana dekenai do oi hereva henia, do oi hamaoroa, aiemai tamana ena kohu haria dekena amo lauegu kahana do ia henia.”

¹⁴To Iesu ese ia haere henia ia dekenai, ia gwau, “Tau e, daika ia gwau lau be kota biaguna, o umui ruaosi emui kohu haria tauna?”

¹⁵Vadaeni Iesu ia hamaoroa idia dekenai, ia gwau, “Do umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekena amo lasi, lasi momokani.”

¹⁶Vadaeni Iesu ese parabole ta ia henia idia dekenai, ia gwau, “Kohu momo tauna ena uma aniani be momo herea.

¹⁷Vadaeni inai bamona ia laloa, ia gwau, ‘Lau be edena bamona do lau karaia? Badina be egu uma aniani ibounai be haboua gabuna lasi.’

¹⁸Ma ia gwau, ‘Inai bamona do lau karaia, egu aniani haboua ruma do lau kokia, badadia haida do lau haginia, vadaeni egu uma aniani bona egu kohu ibounai unuseni do lau haboua.

¹⁹Vadaeni egu laumana dekenai do lau hamaoroa, do lau gwau: Egu laumana e, oiemu kohu be momo herea, lagani momo ena hegeregerena. Do oi laga-ani, do oi aniani, do oi inuinu, do oi moale.’

²⁰To Dirava ese ia hereva henia ia dekenai, ia gwau, ‘Kavakava tauna! Hari hanuaboi oiemu laumana oi dekena amo do lau kokia, vadaeni inai oi haboua kohudia be daika ese do ia abia?’

²¹“Iena kohu sibona dekenai ia haboua, to Dirava dekenai ia be gau momo ia henia lasi tauna be unai bamona.”

²²Iesu ese iena diba tahua taudia dekenai ma ia hamaoroa, ia gwau, “Unai dainai lau hamaoroa umui dekenai, emui lalona idia hekwarahi lasi emui mauri totona, dahaka do umui ania. O emui tauanina totona, dahaka dabua do umui karaia.

²³Mauri ese aniani ia hereaia, bona tauanina ese danu dabua ia hereaia.

²⁴Manu, ena ladana galo mani umui laloa, aniani gaudia idia hadoa lasi, idia geia lasi, idia be gau ta lasi, haboua gabuna lasi. To Dirava ese idia ia ubua noho. Umui ese manu umui hereaia lasi, a?

²⁵Umui daika ena laloa hekwarahi dekena amo iena tauanina sisina sibona do ia halataia diba?

²⁶Unai dainai, inai gau maragina bema umui karaia diba lasi, ma gau haida dekenai umui laloa momo ena anina be dahaka?

²⁷Herahera mani do umui laloa, edena bamona idia vara. Idia gaukara lasi, dabua idia turia lasi. To umui lau hamaoroa, Solomona be mai ena dabua namodia ibounai, to iena hairaina be idia ta hegeregere lasi.

²⁸Unai dainai, tano ena avadia, hari be idia noho, kerukeru lahi dekenai do idia negea daekau, to Dirava ese idia dekenai dabua ia henia, be, ia ese umui danu dekenai dabua do ia henia lasi, a? Abidadama maragimaragi taudia!

²⁹Unai dainai, aniani gaudia bona inuinu gaudia do umui tahua momo lasi, bona emui lalona do idia hekwarahi lasi.

³⁰Badina unai gaudia be tanobada bese ibounai ese idia tahua. Bona emui Tamana be ia diba umui ura gaudia be unai.

³¹To Dirava ena Basileia do umui tahua, vadaeni unai gaudia ibounai danu be do ia henia umui dekenai.

³²“Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.

³³Emui kohu do umui hoihoilaia, ogogami taudia dekenai do umui henia. Do ia dika lasi moni pusepusena do umui abia. Bona emui kohu guba dekenai do umui haboua noho, badina unuseni ia be do ia ore diba lasi. Unuseni henaoa tauna ia raka vareai lasi, bona manumanu ese idia ania ore lasi.

³⁴Badina be emui kohu idia noho gabuna dekenai, emui lalona danu be unuseni.

³⁵“Emui rami do umui kwatua, bona emui lamepa do umui gabua, umui noho hagaegae.

³⁶Edia biaguna dekenai idia naria noho taudia bamona do umui noho hegaegae. Edia biaguna be headava aria dekena amo do ia giroa mai, do ia pidipidi, vadaeni iduara do idia kehoa haragaharaga.

³⁷Bema biaguna do ia mai neganai, do ia davaria iena hesiai taudia idia mahuta lasi, unai hesiai taudia do idia moale. Momokani lau hamaoroa umui dekenai, biaguna ese iena rami do ia kwatua, do ia hamaorodia aniani gabuna dekenai do idia helai, vadaeni edia hesiai gaukara ia ese do ia karaia.

³⁸Hanuaboi ena huanai, o daba kahirakahira neganai do ia mai, vadaeni ia davaridia idia noho hegaegae taudia be do idia namo.

³⁹Inai hereva umui laloa namonamo: Ruma biaguna be henaoa tauna ena mai neganai bema ia diba guna, ia be do ia naria namonamo noho, vadaeni iena ruma do ia makohia lasi.

⁴⁰Umui danu do umui noho hegaegae, badina be umui diba lasi negana dekenai, Taunimanima ena Natuna do ia mai.”

⁴¹Petero ese Iesu dekenai ia nanadaia, ia gwau, “Lohiabada e, inai parabole be ai sibona dekenai oi henia, o taunimanima ibounai danu?”

⁴²Lohiabada ia gwau, “Kohu naria tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona aniani neganai, iena hesiai taudia edia aniani do ia henia, tauna be daika?

⁴³Iena biaguna do ia mai, do ia davaria unai bamona ia karaia tauna be do ia moale.

⁴⁴Momokani lau hamaoroa umui dekenai, iena kohu ibounai dekenai naria tauna, unai biaguna ese do ia halaoa.

⁴⁵To bema unai kohu naria tauna ese inai bamona do ia laloa, do ia gwau, ‘Lauegu biaguna be do ia mai haraga lasi,’ vadaeni hesiai taudia bona hahine do ia botaia, do ia aniani noho, do ia inuinu noho, bona do ia kekero,

⁴⁶unai tau be ia laloa lasi dina dekenai, bona ia hegaegae lasi neganai, iena biaguna do ia ginidae. Biaguna ese do ia utua maragimaragi, bona kamonai lasi taudia edia davana hegeregerena do ia henia.

⁴⁷“Hesiai tauna ta, bema iena biaguna ena ura ia diba, to ia hegaegae lasi, vadaeni biaguna ena ura ia karaia lasi, unai tauna be biaguna ese do ia panisia bada.

⁴⁸To biaguna ena ura ia diba lasi tauna, ena kara ena davana momokani be panisia, to biaguna ese do ia panisia bada lasi. Gau momo ia dekenai do idia henia tauna dekena amo, be gau momo do idia tahua. Bona gau momo ia dekenai idia henia do ia naria totona tauna, be henia lou neganai, unai tau dekena amo gau momo do idia tahua.

⁴⁹“Lau be tanobada dekenai lahi araia totona lau mai. To lau ura be ia araia hamatamaia guna.

⁵⁰Lau be mai egu bapatiso, inai bapatiso do idia henia lau, bona lauegu lalona do ia laga-ani diba lasi ela bona lau abia momokani.

⁵¹Umui laloa lau be tanobada dekenai maino havaraia totona lau mai, a? Lau hamaoroa umui dekenai, lasi! Heai havaraia totona lau mai.

⁵²Badina be hari inai nega dekena amo, ruma tamona dekenai taudia 5 do idia hapararaia, taudia toi ese taudia rua dekenai do idia badu henia, bona taudia rua ese taudia toi dekenai do idia badu henia.

⁵³Idia sibona dekenai do idia parara karaia, tamana bona mero, mero bona tamana, sinana bona kekeni, kekeni bona sinana, ravana bada hahine bona ravana maragi hahine, ravana maragi hahine bona ravana bada hahine.”

⁵⁴Iesu ese taunimanima momo dekenai ia hamaoroa, ia gwau, “Umui be dina ia diho ena kahana dekenai ori korema umui itaia, bona umui gwau medu do ia diho, vadaeni ia diho.

⁵⁵O laurabada kahana dekena amo lai ia mai neganai, umui gwau dina do ia siahu, vadaeni ia siahu.

⁵⁶Koikoi taudia, umui be guba bona tanobada edia toana umui diba. To edena bamona, hari inai nega ena toana be umui diba lasi, a?”

⁵⁷“Badina dahaka laloa maoromaoro dalana umui abia hidi lasi emui mauri lalonai?

⁵⁸Oi dekenai ia samani henia tauna danu maino do umui karaia haraga, kota gabuna ena dala dekenai umui ruaosi umui raka hebou neganai, badina be ia ese kota henia tauna ena imana dekenai oi do ia atoa garina. Kota henia tauna ese dibura naria tauna ena imana dekenai oi do ia atoa garina, dibura ruma lalonai oi do idia koua garina.

⁵⁹Lau hamaoroa oi dekenai, unai gabu dekena amo do oi raka siri lasi, ela bona ena davana do oi haorea momokani.”