Read Buka Helaga (Hiri Motu) 1993 LUKA 17 Bible Online

LUKA 17 - Buka Helaga (Hiri Motu) 1993 bible

LUKA 17

¹Iesu ese iena diba tahua taudia dekenai ia hamaoroa, ia gwau, “Dibagani be hanaihanai do ia vara noho, to dibagani ia havaraia tauna be madi ia dika bada herea.

²Ia namo lasi bema tau ta ese mero maragi ta ia hakaua kerere. Tau unai bamona dekenai, be namo iena aiona dekenai nadi badana idia kwatua, idia negea davara lalonai, badina iena panisi be do ia bada herea.

³“Oi naria namonamo, oiemu tadikaka ese oi bema ia hadikaia, do oi sisiba henia, vadaeni iena lalona bema ia giroa neganai, be iena dika do oi gwauatao.

⁴Dina tamona dekenai nega 7 bema ia hadikaia oi dekenai, vadaeni nega 7 bema ia giroa mai oi dekenai, do ia gwau, ‘Lau be, egu lalona lau giroa inai,’ vadaeni iena dika do oi gwauatao.”

⁵Aposetolo taudia ese Lohiabada dekenai idia noia, idia gwau, “Aiemai abidadama oi habadaia.”

⁶Lohiabada ese ia haere henia idia dekenai, ia gwau, “Emui abidadama bema ia maragi herea, mastadi ena uhena bamona, umui ese au badana umui hereva henia diba, umui gwau, ‘Oi sibona do oi abia isi, davara dekenai oi sibona do oi gini,’ vadaeni ia be do ia kamonai henia umui dekenai.

⁷“To umui daika, bema oiemu hesiai tauna tano makohia gaukara, o mamoe naria gaukara dekena amo hanua dekenai do ia ginidae neganai, do oi hamaoroa, do oi gwau, ‘Oi mai helai diho haraga, oi aniani?’

⁸Lasi, oi be do oi gwau, ‘Egu aniani oi nadua, emu rami do oi kwatua, egu hesiai gaukara do oi karaia, ia lao bona do lau aniani ore bona do lau inuinu ore, unai murinai oi be do oi aniani bona do oi inuinu,’ ani?

⁹Oi be hesiai tauna dekenai oi hanamoa, oi hereva henia gaukaradia ia karaia dainai, a? Lasi.

¹⁰Unai dainai, umui danu, umui dekenai Dirava ia hereva karadia ibounai do umui karaia, vadaeni do umui gwau, ‘Ai be hesiai taudia namodia lasi, badina be ai ese aiemai gaukara sibona ai karaia vadaeni.’ ”

¹¹Iesu be Ierusalema dekenai ia lao neganai, Samaria bona Galilea tano dekena amo ia raka hanaia.

¹²Hanua maragina ta dekenai ia ginidae, vadaeni lepera taudia 10 ia danu idia hedavari, to sisina daudau dekenai idia gini.

¹³Iesu dekenai idia boiboi, idia gwau, “Iesu, aiemai biaguna e, oi bogahisihisi ai dekenai.”

¹⁴Ia ese ia itaia noho idia dekenai, vadaeni ia hereva idia dekenai, ia gwau, “Dubu ena hahelagaia taudia dekenai umui lao, do idia itaia umui.” Vadaeni idia lao. Dala dekena amo idia lao neganai, edia kopina idia namo vadaeni.

¹⁵Vadaeni tamona sibona ese iena kopina ia itaia ia namo vadaeni, ia giroa lao, mai moale bada danu Dirava dekenai ia hanamoa,

¹⁶bona Iesu ena aena badinai iena kwarana ia atoa diho, ia hanamoa. To ia be Samaria tauna.

¹⁷Vadaeni Iesu ia gwau, “Ibounai 10 idia namo, ani? Taudia 9 be edeseni?

¹⁸Haida be idia giroa lou lasi, Dirava dekenai hanamoa totona, inai idau bese tauna sibona, a?”

¹⁹Vadaeni Iesu ia hamaoroa ia dekenai, ia gwau, “Oi toreisi, vadaeni oi lao, oiemu abidadama ese oi ia hanamoa vadaeni.”

²⁰Farisea taudia ese Iesu idia nanadaia, idia gwau, “Dirava ena Basileia be edena negai do ia mai?” Idia dekenai ia haere, ia gwau, “Dirava ena Basileia ena mai, be iena toana do ita itaia lasi guna.

²¹Bona ta do ia gwau lasi, ‘Gauna inai,’ o, ‘Gauna unai,’ badina Dirava ena Basileia be umui emui lalona dekenai ia noho.”

²²Vadaeni Iesu ese iena diba tahua taudia dekenai ia hamaoroa, ia gwau, “Nega ta do ia ginidae, umui be do umui ura bada Taunimanima ena Natuna ena dina tamona sibona do umui itaia, to do umui itaia lasi.

²³Haida be do idia gwau, ‘Tauna inai,’ o, ‘Tauna unai.’ To umui be do umui lao lasi, edia murinai do umui raka lasi.

²⁴Badina be kevaru guba ena kahana dekenai ia abia isi ia lao bona guba ena kahana dekenai bamona, Taunimanima ena Natuna ese iena mai neganai be unai bamona do ia karaia.

²⁵To ia be hisihisi momo do ia abia guna, bona inai nega taudia ese do idia ura henia lasi.

²⁶“Noa ena nega dekenai idia karaia bamona, Taunimanima ena Natuna ena nega be unai bamona danu do idia karaia.

²⁷Idia be idia aniani, idia inuinu, idia headava, ia mai bona Noa lagatoi dekenai ia guia dinana. Vadaeni abata ese idia ia koua, ranu ese ibounai ia hamasea.

²⁸Lota ena nega dekenai danu, unai bamona sibona ia karaia. Idia aniani, idia inuinu, idia hoihoi, idia hadohado, ruma idia karaia.

²⁹To Lota be Sodoma dekena amo ia raka siri dina dekenai, lahi bona nadi siahu, guba dekena amo idia moru, ibounai ia alaia ore.

³⁰Taunimanima ena Natuna do ia hedinarai dina dekenai danu, unai bamona kara do ia vara.

³¹“Unai dina dekenai, bema tau ta ruma ena atai dekenai ia noho, ia be ruma ena lalona dekenai do ia raka vareai lasi, iena kohu abia totona. Bona tau ta bema uma dekenai, ia be hanua dekenai do ia giroa lou lasi.

³²Lota ena adavana umui laloa.

³³Iena mauri ia dogoatao auka masemase tauna ese iena mauri do ia halusia, to iena mauri ia halusia tauna ese iena mauri do ia davaria.

³⁴“Lau hamaoroa umui dekenai, unai hanuaboi dekenai, tatau rua geda tamona dekenai do idia hekure. Ta do ia abia siri, ta be do ia noho.

³⁵Hahine rua ese uiti makohia maragimaragi nadina do idia giroa, be ta do ia abia siri, ta be do ia noho.

³⁶Tatau rua uma gabu dekenai do idia gaukara, be ta do ia abia siri, ta be do ia noho.”

³⁷Idia ese idia nanadaia ia dekenai, idia gwau, “Lohiabada e, inai kara be edeseni do ia vara?” Ia gwau, “Mase tauanina ia noho gabuna dekenai galo manudia do idia haboua.”