Read Buka Helaga (Hiri Motu) 1993 LUKA 19 Bible Online

LUKA 19 - Buka Helaga (Hiri Motu) 1993 bible

LUKA 19

¹Iesu be Ieriko dekena amo ia raka hanaia.

²Unuseni be tau ta, iena ladana Sakaio, takisi gogoa taudia edia biaguna ta, ia danu be kohu momo tauna.

³Ia ura dikadika Iesu do ia itaia. To taunimanima be momo dainai ia itaia lasi, badina ia be tau kwadogi.

⁴Vadaeni ia heau guna ia lao, sikamoa au badana ta dekenai ia daekau, Iesu ia raka hanaia neganai do ia itaia gwauraia.

⁵Iesu be unai gabu dekenai ia ginidae, iena matana ia negea daekau, Sakaio ia itaia, vadaeni ia hamaoroa, ia gwau, “Sakaio e, oi diho haraga, badina be hari dina oiemu ruma dekenai do lau noho.”

⁶Vadaeni kara haraga ia diho, iena ruma dekenai Iesu ia abia dae, mai moale danu.

⁷Idia itaia taudia ibounai ese idia hereva maumau, idia gwau, “Iesu be dika tauna dekenai ia vadivadi henia!”

⁸To Sakaio ia toreisi, ia gini, Lohiabada dekenai ia hereva, ia gwau, “Egu kohu haida be ogogami taudia dekenai do lau henia. Bona ena kohu lau abia kava tauna, be nega 4 do lau henia lou.”

⁹Iesu ia gwau, “Harihari hamauria be inai ruma dekenai ia ginidae vadaeni, badina ia danu be Aberahamo ena natuna.

¹⁰Badina Taunimanima ena Natuna ese idia boio taudia do ia tahua, bona idia do ia hamauria totona ia mai.”

¹¹Taunimanima ese unai hereva idia kamonai, vadaeni Iesu ese parabole ma ta ia hamaoroa idia dekenai, badina be Ierusalema ia kahirakahira vadaeni, bona idia laloa Dirava ena Basileia be unai nega dekenai do ia hedinarai.

¹²Ia gwau, “Lohia ta hanua daudau dekenai ia lao, iena basileia dekenai king dagina do ia abia, vadaeni inai murinai do ia giroa mai.

¹³Unai dainai iena hesiai taudia 10 ia boiria guna, 20 kina idia ta ta dekenai ia henia, ia gwau, ‘Do umui hoihoilaia ela bona do lau giroa mai.’

¹⁴“To inai lohia ena hanua taudia ese idia badu dikadika henia, vadaeni hesiai taudia haida iena murina dekenai idia siaia, do idia gwau, ‘Ai be ai ura lasi unai tau be aiemai basileia ena king dagina do ia abia.’

¹⁵“To herevana, basileia ia abia, vadaeni ia giroa lou, moni ia henia taudia dekenai ia boiria, edia hoihoi dekenai idia davaria gaudia do ia diba gwauraia.

¹⁶“Ginigunana ia mai, ia gwau, ‘Lohiabada e, oiemu 20 kina dekena amo 200 kina lau davaria vadaeni.’

¹⁷Ia hanamoa ia dekenai, ia gwau, ‘Namo herea, oi be hesiai tauna namona. Gau maragina oi naria namonamo dainai, hanua 10 edia lohia tauna do oi lao.’

¹⁸“Iharuana danu ia mai, ia gwau, ‘Lohiabada e, oiemu 20 kina dekena amo 100 kina lau davaria vadaeni.’

¹⁹Vadaeni ia gwau, ‘Hanua 5 edia lohia tauna do oi lao.’

²⁰“Ta ma ia mai, ia gwau, ‘Lohiabada e, oiemu 20 kina be inai, dabua dekenai lau kumia, lau naria.

²¹Badina be oi dekenai lau gari, oi be hereva auka tauna, oi atoa diho lasi gauna oi abia isi, oi hadoa lasi gauna oi utua.’

²²“To lohia ia gwau, ‘Oi be hesiai tauna dikana. Oi sibona emu hereva dekena amo do lau kota henia oi. Oi be oi diba lau be hereva auka tauna, lau atoa diho lasi gauna lau abia isi, bona lau hadoa lasi gauna lau utua.

²³Unai dainai edena bamona egu moni be banika taudia dekenai oi abia lao lasi, vadaeni do lau giroa mai neganai, do lau abia lou, mai ena atoa kau moni sisina danu?’

²⁴Vadaeni iena badibadinai idia gini taudia dekenai ia hereva henia, ia gwau, ‘Ia dekena amo iena 20 kina umui kokia, 200 kina ia abia tauna dekenai do umui henia.’

²⁵“Idia gwau, ‘Lohiabada e, ia be mai ena 200 kina vadaeni.’

²⁶“Ia ma ia gwau, ‘Lau hamaoroa umui dekenai, mai ena gau tauna be gau momo do idia henia, to iena gau be lasi tauna, be ia dekenai sisina ia noho gauna, be do idia abia.

²⁷To lau dekenai idia badu henia taudia, be idia ura lasi do lau lohia idia dekenai taudia, be umui mailaia, egu vairana dekenai idia do umui alaia mase.’ ”

²⁸Unai hereva murinai Iesu ese edia vairana dekenai ia raka guna, Ierusalema dekenai idia daekau.

²⁹Ia be ia raka lao, Betepage bona Betania, Olive Ororo ena hanuadia, idia kahirakahira vadaeni. Vadaeni iena diba taudia rua ia siaia guna,

³⁰ia gwau, “Hanua ta, iseda vairana dekenai umui lao, vadaeni do umui raka vareai gabuna dekenai be doniki ena natuna ta au dekenai idia kwatua do umui itaia, iena latanai tau ta do ia helai lasi. Do umui ruhaia, do umui mailaia.

³¹To tau ta do ia nanadaia umui dekenai, do ia gwau, ‘Dahaka totona unai doniki ena natuna umui ruhaia?’ Do umui gwau, ‘Lohiabada ia ura henia dainai.’ ”

³²Ia siaia taudia idia lao vadaeni, idia dekenai ia hamaoroa hegeregerena idia davaria vadaeni.

³³Doniki ena natuna idia ruhaia neganai, doniki ena biaguna ese ia nanadaia idia dekenai, ia gwau, “Dahaka totona doniki ena natuna umui ruhaia?”

³⁴Idia gwau, “Lohiabada ese ia ura henia.”

³⁵Idia ese doniki ena natuna Iesu dekenai idia hakaua lao, bona edia dabua be doniki natuna ena doruna dekenai idia atoa. Vadaeni latanai Iesu ia helai.

³⁶Iesu ia lao neganai, taunimanima momo ese edia dabua dala dekenai idia atoa.

³⁷Ierusalema hanua idia kahirakahira, Olive Ororo dekena amo idia diho, vadaeni iena diba tahua taudia momo idia moale bada herea, Dirava dekenai idia hanamoa, idia itaia vadaeni siahu karadia ibounai dainai.

³⁸Idia gwau, “Lohiabada ena ladana dekenai ia mai King ita hanamoa inai! Maino guba dekenai do ia noho, bona hanamoa bada Ataiai Momokani Diravana dekenai!”

³⁹Vadaeni Farisea taudia haida ese unai taunimanima momo edia huanai dekena amo Iesu dekenai idia hamaoroa, idia gwau, “Hadibaia tauna e, emu diba tahua taudia dekenai oi gwau henia.”

⁴⁰To Iesu ese ia haere idia dekenai, ia gwau, “Lau hamaoroa umui dekenai, bema idia be mai regerege lasi, inai nadi do idia boiboi.”

⁴¹Iesu be ia raka kahirakahira, Ierusalema hanua ia itaia, vadaeni ia tai.

⁴²Ia gwau, “Madi, hari dina bema oiemu maino do oi davaria dalana oi diba, be oi namo, to emu matana dekena amo ia hunia vadaeni.

⁴³Badina be negana do ia ginidae, oi dekenai idia tuari henia taudia ese tano do idia haboua bada, tuari ena magu do idia karaia, oi do idia koua hagegea, oiemu taudia idia raka murimuri dekenai be dala lasi.

⁴⁴Vadaeni idia ese oi do idia hadikaia ore momokani, oiemu taudia danu oiemu magu lalonai be do idia mase ore, bona nadi ta nadi ta latanai do idia noho lasi. Badina be oi hamauria totona, Dirava ese oi dekenai ia vadivadi henia ena nega be oi diba lasi.”

⁴⁵Vadaeni Dubu Helaga dekenai Iesu ia raka vareai, hoihoi taudia ia lulua murimuri dekenai.

⁴⁶Ia gwau henia idia dekenai, ia gwau, “Buka Helaga lalonai ia torea vadaeni, ‘Egu Ruma be guriguri Rumana, to umui ese henaoa taudia edia ruma dekenai umui halaoa.’ ”

⁴⁷Dina ibounai Dubu Helaga lalonai Iesu ese ia hadibaia karaia. To dubu biagudia bona taravatu hadibaia taudia bona hanua tau badadia ese ia do idia alaia dalana idia tahua.

⁴⁸To dala ta idia davaria lasi, badina be taunimanima ibounai idia ura Iesu ena hereva idia kamonai.