Read Buka Helaga (Hiri Motu) 1993 LUKA 20 Bible Online

LUKA 20 - Buka Helaga (Hiri Motu) 1993 bible

LUKA 20

¹Dina ta, Iesu be Dubu Helaga lalonai ia hadibaia karaia, bona Sivarai Namona ia harorolaia. Vadaeni dubu biagudia bona taravatu hadibaia taudia bona hanua tau badadia ia dekenai idia lao,

²idia nanadaia, idia gwau, “Edena siahu dekena amo inai gaudia oi karaia?”

³Iesu ia haere, ia gwau, “Lau danu hereva tamona lau nanadaia umui dekenai, lau umui hamaoroa,

⁴Ioane ena bapatiso siahuna be guba dekena amo, o taunimanima dekena amo?”

⁵Idia sibona idia hereva henia, idia gwau, “Bema ita gwau guba dekena amo, ia be do ia gwau, ‘To edena bamona umui kamonai henia lasi?’

⁶To bema ita gwau, ‘Taunimanima dekena amo,’ taunimanima ibounai ese nadi dekena amo ita do idia hodoa, badina be idia gwau Ioane be peroveta tauna.”

⁷Unai dainai idia haere henia, idia gwau, “Ia be edeseni dekena amo ai diba lasi.”

⁸Vadaeni Iesu ia gwau, “Lau danu inai gaudia lau karaia ena siahu be do lau hamaoroa lasi umui dekenai.”

⁹Vadaeni Iesu ese taunimanima dekenai ia hereva henia lou, inai parabole ia hamaoroa idia dekenai, ia gwau, “Tau ta vain ena uma gabu ia hadoa, vadaeni vain ena uma gabu be naria taudia dekenai ia henia, do idia naria. Gabeai idau hanua dekenai ia lao, nega daudau unuseni ia noho.

¹⁰Uma gabu ena huahua neganai, ia ese iena hesiai tauna ta ia siaia lao, uma gabu naria taudia dekena amo vain ena anina do ia abia. To uma gabu naria taudia ese idia botaia, iena imana anina lasi idia siaia lou.

¹¹Vadaeni hesiai tauna ma ta ia siaia, to idia ese idia botaia, idia hadikaia, iena imana anina lasi ma idia siaia lou.

¹²Hesiai tauna namba 3 danu ia siaia, to bero idia henia ia dekenai, bona idia negea lao murimuri dekenai.

¹³Vadaeni uma gabu biaguna ia gwau. ‘Lau be edena bamona do lau karaia? Lauegu natuna, egu lalokau, do lau siaia, do idia itaia, sedira do idia matauraia ia dekenai.’

¹⁴To uma gabu naria taudia ese idia itaia, bona idia sibona idia herevahereva, idia gwau, ‘Iena natuna korikori be inai. Do ita alaia mase, vadaeni uma gabu be do ita abia iseda.’

¹⁵Vadaeni idia veria lao uma gabu murimuri dekenai, idia alaia mase. “Uma gabu ena biaguna be edena bamona do ia karaia idia dekenai?

¹⁶Ia be do ia mai, uma gabu naria taudia do ia alaia ore, uma gabu be idau taudia haida dekenai do ia henia.” Inai hereva idia kamonai neganai, haida idia gwau, “Ia! Lasi! Unai bamona do ia vara lasi!”

¹⁷Iesu ese iena matana dekenai ia itadia noho, ia gwau, “Buka Helaga dekenai ia torea herevana ena anina be dahaka? Buka Helaga ia gwau: “ ‘Ruma haginia taudia ese idia ura henia lasi nadi be, ruma ena kona nadi ia halaoa vadaeni.’

¹⁸Unai nadi latanai do idia moru taudia be do ia makohia momokani, bona bema unai nadi be tau ta ena latanai ia moru neganai, unai tau be do ia patapata momokani, kahu bamona.”

¹⁹Taravatu hadibaia taudia bona dubu biagudia ese idia diba unai sivarai be idia edia kara. Unai dainai unai nega korikori dekenai, idia ura Iesu idia dogoatao. To idia gari bada unai taunimanima momo dekenai.

²⁰Vadaeni taravatu hadibaia taudia bona dubu biagudia ese Iesu idia itaia noho, bona dika taudia ia dekenai idia siaia. Edia dika idia hunia, edia toana Iesu vairanai be tau namodia bamona. Idia ura Iesu idia koia, vadaeni hereva ta do ia gwauraia, bona unai hereva dainai, Iesu do idia samania diba, gavana dekenai.

²¹Idia ese Iesu idia nanadaia, idia gwau, “Hadibaia tauna e, ai diba oiemu hereva bona oeimu hadibaia be idia maoromaoro, bona taunimanima edia hereva dekenai oi laloa lasi, to Dirava ena dala sibona oi hadibaia namonamo.

²²Kaisara ena takisi moni do ita henia be ia maoro o?”

²³To ia be edia koikoi ia diba, vadaeni ia haere, ia gwau,

²⁴“Moni ta umui mailaia, lau itaia. Daika ena laulau bona daika ena revareva be inai?” Idia gwau, “Kaisara ena.”

²⁵Vadaeni Iesu ia gwau, “Kaisara ena, Kaisara dekenai do umui henia, to Dirava ena, Dirava dekenai do umui henia.”

²⁶Vadaeni unai taunimanima momo edia vairana dekenai, inai dubu biagudia ese be dala lasi Iesu idia dogoatao, badina iena hereva be kerere lasi. Iena haere dekenai idia hoa bada, idia be mai edia hereva ta lasi.

²⁷Unai murinai Sadukea taudia haida Iesu dekenai idia lao. Unai orea idia gwau be taunimanima idia mase neganai, do idia toreisi lou lasi. Vadaeni idia nanadaia, idia gwau,

²⁸“Hadibaia tauna e, Mose ese taravatu ia henia ai dekenai, ia gwau, ‘Tau ta do ia mase, bona iena vabu do ia noho mai ena natuna lasi, vabu be unai mase tauna ena tadina ese do ia adavaia, iena natuna do ia havaraia, mase tauna ena.’

²⁹Guna, aiemai huana dekenai tadikaka be 7 idia noho, ia vara guna tauna ese hahine ta ia adavaia, to natuna lasi ia mase vadaeni.

³⁰Iharuana bona ihatoina ese unai hahine idia adavaia,

³¹ia lao bona taudia 7 ese idia abia vadaeni. To ibounai idia mase, mai edia natuna lasi.

³²Gabeai hahine danu ia mase vadaeni.

³³Toreisi lou neganai, unai hahine be daika ena adavana? Badina be taudia 7 ese idia adavaia.”

³⁴Iesu ia haere, ia gwau, “Inai tanobada taudia be hahine idia abia bona idia headava.

³⁵To do idia toreisi lou, bona edia namo hegeregere mauri gabeai lalonai do idia vareai taudia be do idia headava lasi.

³⁶Bona do idia mase lou lasi, idia be aneru danu do idia hegeregere, bona Dirava ena natuna do idia lao, badina idia be toreisi lou taudia.

³⁷To mase dekena amo idia toreisi lou herevana be Mose ese ia hamomokania vadaeni au ginigini ia araia ena sivarai lalonai. Inai bamona ia gwau, ‘Lohiabada be Aberahamo ena Dirava, Isako ena Dirava, Iakobo ena Dirava.’

³⁸Unai dainai, ia be mase taudia edia Dirava lasi, to mauri taudia edia, badina taunimanima ibounai be ia dainai idia mauri.”

³⁹Taravatu hadibaia taudia haida idia gwau, “Hadibaia tauna e, hereva maorona be unai.”

⁴⁰Unai dekena amo idia nanadaia lou lasi, idia gari vadaeni.

⁴¹To Iesu ese ia nanadaia idia dekenai, ia gwau, “Badina be dahaka taunimanima be idia gwau Keriso be Davida ena natuna, a?

⁴²Davida be Salamo dekenai ia gwau: “ ‘Lohiabada ese egu Lohiabada dekenai ia hamaoroa, ia gwau: Lauegu imana idiba kahana dekenai do oi helai,

⁴³ela bona oi dekenai idia tuari henia taudia ibounai, be oiemu aena henunai gaudia dekenai do lau halaoa.’

⁴⁴Bema Davida ese Keriso ia gwauraia ‘Lohiabada’, edena bamona Keriso be Davida ena natuna sibona?”

⁴⁵Vadaeni taunimanima ibounai edia vairana dekenai Iesu ese iena diba tahua taudia ia hamaoroa, ia gwau,

⁴⁶“Taravatu hadibaia taudia do umui naria namonamo. Idia be idia ura dabua lata herea karaia, vadaeni do idia loaloa gabudia dekenai taunimanima ese idia dekenai do idia hanamoa, bona dubu dekenai, bona aria neganai, gabu namo herea dekenai do idia helai.

⁴⁷To idia ese vabu edia ruma dekenai gau idia abia haorea, bona taunimanima koia totona, guriguri lata herea idia gwauraia. Idia be edia davana metau do idia abia.”