Read Buka Helaga (Hiri Motu) 1993 LUKA 22 Bible Online

LUKA 22 - Buka Helaga (Hiri Motu) 1993 bible

LUKA 22

¹Idia hatubua lasi paraoa ena aria ladana Pasova, ia kahirakahira vadaeni.

²Vadaeni dubu biagudia bona taravatu hadibaia taudia ese Iesu alaia totona dala idia tahua, hunia dekenai, badina be idia ese unai taunimanima momo dekenai idia gari.

³Unai neganai Satani ese Iuda Iskariote, idia 12 tauna ta, ena lalona dekenai ia vareai.

⁴Vadaeni ia be ia lao, dubu biagudia bona Dubu Helaga ena gima taudia danu idia hereva hebou, Iesu be edena bamona do ia henia idia dekenai.

⁵Idia be idia moale, vadaeni idia gwauhamata ia dekenai, moni do idia henia idia gwau.

⁶Iuda ia gwau, “Namo.” Vadaeni nega ia naria, taunimanima idia noho lasi neganai, ia ese Iesu do ia henia idia dekenai.

⁷Idia hatubua lasi paraoa ena aria dinana, Pasova ena mamoe alaia dinana, ia ginidae.

⁸Vadaeni Iesu ese Petero bona Ioane ia siaia, ia gwau, “Umui lao, Pasova do umui karaia hegaegae, vadaeni do ita ania.”

⁹Idia ruaosi idia gwau, “Edeseni do ai karaia hegaegae?”

¹⁰Vadaeni Iesu ese ia hamaorodia, ia gwau, “Hanua badana dekenai do umui raka vareai, tau ta hodu ta ia huaia noho do umui itaia, vadaeni ia ese do ia daekau rumana dekenai do umui daekau.

¹¹Vadaeni unai ruma ena biaguna do umui hereva henia, do umui gwau, ‘Hadibaia tauna ia gwau, vadivadi daiutu be edeseni, egu diba tahua taudia danu Pasova do ai ania?’

¹²Vadaeni ia ese ataiai daiutu badana ta do ia hadibaia umui dekenai, ia hegaegae vadaeni. Unuseni Pasova do umui karaia hegaegae.”

¹³Vadaeni idia ruaosi idia lao, ia ese ia gwauraia guna gaudia idia davaria, vadaeni Pasova idia karaia hegaegae.

¹⁴Negana ia ginidae neganai, Iesu be iena aposetolo taudia danu idia helai diho.

¹⁵Vadaeni idia dekenai ia hereva, ia gwau, “Lau ura bada hari inai Pasova do ita ania hebou guna, gabeai hisihisi do lau davaria.

¹⁶Badina be umui lau hamaoroa, lau be Pasova do lau ania lou lasi, ela bona iena anina korikori do ia hedinarai Dirava ena Basileia lalonai.”

¹⁷Vadaeni kapusi ta ia abia, ia hanamoa, ia gwau, “Inai be umui abia, umui ibounai do umui inua.

¹⁸Badina be lau hamaoroa umui dekenai, lau be uaina do lau inua lou lasi, ela bona Dirava ena Basileia do ia ginidae.”

¹⁹Vadaeni paraoa ia abia, ia hanamoa, ia makohia, ia henia idia dekenai, ia gwau, “Lauegu tauanina be inai, umui totona ia henia vadaeni. Inai bamona do umui karaia, lau dekenai do umui laloa totona.”

²⁰Idia ania ore, vadaeni ia ese kapusi ma ia abia, ia gwau, “Inai kapusi be maino karaia gwauhamata matamatana lauegu rarana dekenai, umui totona do ia bubua.

²¹“Lauegu mase dala do ia karaia tauna ena imana be pata latanai, inai lauegu badibadinai.

²²Momokani, Taunimanima ena Natuna be do ia lao, ia gwauraia guna hegeregerena, to iena mase dala ia karaia tauna madi ia dika momokani.”

²³Vadaeni idia sibona ta ta dekenai idia nanadaia, idia gwau, “Inai be daika ese unai bamona do ia karaia?”

²⁴Vadaeni idia sibona idia hepapahuahu, idia be daika do ia herea.

²⁵Vadaeni ia hamaoroa idia dekenai, ia gwau, “Bese idauidau edia king ese idia lohia idia dekenai, bona hanua idauidau taudia ese edia lohia dekenai idia hanamoa.

²⁶To umui be unai bamona lasi. Umui emui huanai guna ia vara tauna be gabeai vara tauna bamona do ia lao, bona hakaua tauna danu be hesiai tauna bamona do ia lao.

²⁷Badana be daika, aniani gabuna dekenai do ia helai diho tauna, o hesiai tauna? Aniani gabuna dekenai ia helai diho tauna, ani? To lau be umui emui huanai lau noho, emui hesiai tauna bamona.

²⁸Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi.

²⁹Unai dainai, egu Tamana ese Basileia ta ia henia lau dekenai hegeregerena, lau danu Basileia ta lau henia inai, umui dekenai.

³⁰Vadaeni lauegu Basileia lalonai, egu pata dekenai do umui aniani, bona do umui inuinu, bona terona ena latanai do umui helai, vadaeni Israela iduhu 12 dekenai do umui kota henia.

³¹“Simona e, Simona e, oi ka-mo-nai. Satani ese gwaumaoro ia abia vadaeni, emui abidadama do ia tohoa, hegeregere uiti idia botaia, iena momoru kokia totona.

³²To lau be lau guriguri vadaeni oi dainai, oiemu abidadama do ia moru lasi totona. Vadaeni lau dekenai do oi giroa mai neganai, be oiemu tadikaka dekenai goada do oi henia.”

³³Petero ia gwau, “Lohiabada e, lau be oi danu do ita lao, ela bona dibura ruma, ela bona mase.”

³⁴To Iesu ia gwau, “Petero e, oi lau hamaoroa inai, kokoroku do ia boiboi lasi, oiemu hereva dekenai nega toi do oi hunia lau, do oi gwau, ‘Lau be lau diba lasi Iesu.’ ”

³⁵Ma Iesu ia gwau, “Guna lau ese umui lau siaia neganai, mai emui pusepuse lasi, mai emui dabua udaia gauna lasi, mai emui tamaka lasi, umui raka, be umui ese gau ta dekenai umui hegeregere lasi, a?” Idia gwau, “Lasi.”

³⁶Vadaeni ia gwau, “To harihari, ta mai ena pusepuse, do ia abia, ta mai ena dabua udaia gauna, danu do ia abia, ta mai ena tuari kaia lasi, iena dabua dekena amo kaia ta do ia hoia.

³⁷Badina Dirava ena Buka Helaga lalonai inai hereva ia noho: ‘Taunimanima ese idia laloa vadaeni, ia be dika karaia tauna hegeregerena.’ Umui lau hamaoroa inai: Unai kara be momokani lau dekenai do ia vara. Badina Buka Helaga ena hereva ibounai lau totona, be do idia vara momokani.”

³⁸Idia gwau, “Lohiabada e, tuari kaia rua be inai.” Ia gwau, “Ia hegeregere vadaeni.”

³⁹Vadaeni idia raka murimuri dekenai, ma nega ibounai ia karaia bamona, Iesu ia lao Olive Ororo dekenai, iena diba tahua taudia danu iena murina dekenai idia raka.

⁴⁰Unai gabu dekenai idia ginidae, vadaeni idia dekenai ia hamaoroa, ia gwau, “Do umui guriguri, dibagani ese umui do ia abia garina.”

⁴¹Vadaeni ia sibona ia raka siri, nadi ta bema idia negea ena daudau hegeregerena, vadaeni iena tuina ia atoa diho, ia guriguri,

⁴²ia gwau, “Egu Tamana e, oiemu lalona bema ia hegeregere, inai kapusi be lau dekena amo do oi kokia, to lauegu ura lasi, oiemu ura sibona.”

⁴³Vadaeni aneru ta guba dekena amo ia dekenai ia ginidae, ia dekenai goada henia totona.

⁴⁴To hisihisi bada ese Iesu ena lalona ia abia, ia guriguri goadagoada, ela bona iena kopina ia siahu ranuna be rara bamona ia moru tano dekenai.

⁴⁵Guriguri dekena amo ia toreisi, diba tahua taudia dekenai ia giroa lao, to idia be idia mahuta noho, edia laloa idia doko dainai.

⁴⁶Vadaeni ia ese ia hereva idia dekenai, ia gwau, “Badina dahaka umui mahuta? Umui toreisi, umui guriguri, dibagani ese umui do ia abia garina.”

⁴⁷Iesu ia hereva noho neganai, taunimanima momo idia ginidae vadaeni. Iuda, diba tahua tauna ta, ese ia hakaudia, vadaeni Iesu dekenai kisi henia totona ia raka kahirakahira lao.

⁴⁸To Iesu ia gwau, “Iuda e, Taunimanima ena Natuna be kisi dekena amo iena mase dala do oi karaia, a?”

⁴⁹Iesu ena diba tahua taudia ese idia itaia dahaka do ia vara, vadaeni idia nanadaia ia dekenai, idia gwau, “Lohiabada e, tuari kaia dekena amo idia dekenai do ai heatu, a?”

⁵⁰Vadaeni idia ta ese Hahelagaia Tauna Badana ena hesiai tauna ena taiana idiba kahana ia utua oho.

⁵¹To Iesu ia gwau, “Dohore.” Vadaeni unai tau ena taiana dekenai Iesu ese iena imana ia atoa, ia hanamoa lou.

⁵²Vadaeni Iesu ese ia do idia dogoatao totona idia lao taudia, dubu biagudia bona Dubu Helaga ena gima taudia bona hanua tau badadia, dekenai ia hereva henia, ia gwau, “Umui be henaoa tauna ta do umui dogoatao totona bamona umui mai, mai emui kaia, bona mai emui io, a?

⁵³Dina ibounai ita be Dubu Helaga lalonai ita gini hebou, to edena bamona lau umui dogoatao lasi? To inai be umui emui nega, dibura ena siahu negana.”

⁵⁴Vadaeni idia ese Iesu idia dogoatao, Hahelagaia Tauna Badana ena ruma dekenai idia hakaua vareai. Petero danu Iesu ena murina dekenai ia raka, to sisina ia daudau.

⁵⁵Haida ese magu lalonai lahi idia karaia, vadaeni idia helai hagegea. Petero danu idia edia badinai ia helai.

⁵⁶Vadaeni hesiai hahine ta ese lahi ena diari dekenai Petero ia itaia, vadaeni ia gwau, “Inai tau be Iesu ena turana ta.”

⁵⁷To Petero ese iena hereva dekenai Iesu ia hunia, ia gwau, “Hahine e, lau be lau diba lasi ia.”

⁵⁸Nega ia daudau lasi, tau ta ese ma Petero ia itaia, ia gwau, “Oi danu idia edia turana ta.” To Petero ia gwau, “Tau e, lau be lasi.”

⁵⁹Hora ta ia lao, vadaeni ta ma ia hereva goadagoada, ia gwau, “Momokani, inai tau be Iesu ena turana ta, badina be ia danu Galilea tauna.”

⁶⁰To Petero ia gwau, “Tau e, oiemu hereva ena anina lau diba lasi.” Vadaeni ia hereva neganai, maoromaoro kokoroku ia boiboi.

⁶¹Vadaeni Lohiabada ese iena matana ia giroa Petero dekenai, ia itaia noho. Unai neganai, Petero ese Lohiabada ena hereva ia laloa, ia gwau, “Kokoroku do ia boiboi lasi, nega toi oiemu hereva dekenai do oi hunia lau.”

⁶²Vadaeni Petero ia raka murimuri dekenai, ia tai dikadika.

⁶³Iesu idia dogoatao taudia ese idia kirikirilaia, bona idia botaia.

⁶⁴Iena matana danu dabua dekenai idia koua, iena vairana idia botaia, idia nanadaia, idia gwau, “Oi ia botaia tauna be daika?”

⁶⁵Bona hereva dika momo idia gwauraia ia dekenai.

⁶⁶Daba rere neganai, hanua tau badadia idia haboua, dubu biagudia bona taravatu hadibaia taudia danu, vadaeni kaunsolo taudia edia vairana dekenai Iesu idia hakaua lao. Idia gwau,

⁶⁷“Oi hamaoroa ai dekenai, oi be Keriso o?” Iesu ia gwau, “Bema umui lau hamaoroa, umui be do umui kamonai lasi.

⁶⁸Bona bema umui lau nanadaia, umui be do umui haere lasi.

⁶⁹To harihari ia lao, Taunimanima ena Natuna be Dirava ena siahu idibana kahana dekenai do ia helai.”

⁷⁰Vadaeni ibounai idia gwau, “Be, oi be Dirava ena Natuna, a?” Ia gwau, “Umui gwauraia maoro unai.”

⁷¹Idia gwau, “Dahaka dainai samania hereva ma ita tahua? Ia sibona ena uduna dekenai ia hereva gauna ita kamonai vadaeni!”