Read Buka Helaga (Hiri Motu) 1993 LUKA 23 Bible Online

LUKA 23 - Buka Helaga (Hiri Motu) 1993 bible

LUKA 23

¹Vadaeni hebou taudia ibounai idia toreisi, Pilato dekenai Iesu idia hakaua lao.

²Ia dekenai idia samania hamatamaia, idia gwau, “Inai tau ai davaria, aiemai bese taudia dekenai ia hereva henia mai goada danu, Kaisara ena takisi moni henia totona ia gwauatao, bona sibona ia gwauraia ia be Keriso, king ta.”

³Vadaeni Pilato ese ia nanadaia, ia gwau, “Oi be Iuda taudia edia King, a?” Iesu ia haere, ia gwau, “Oi hereva maoro unai.”

⁴Pilato ese dubu biagudia bona unai taunimanima momo dekenai ia hamaoroa, ia gwau, “Kerere ta lau davaria lasi inai tau dekenai.”

⁵To idia be idia hereva goadagoada, idia gwau, “Ia ese iena hadibaia herevadia dekenai Iudea noho taudia ibounai ia hadikadia, Galilea dekena amo ia hamatamaia, ia mai bona inai hanua dekenai.”

⁶Pilato ese inai hereva ia kamonaia, vadaeni ia henanadaia, ia gwau, “Inai Iesu be Galilea tauna, a?”

⁷Vadaeni ia diba ia be Heroda ena kahana tauna dainai, ia ese Heroda dekenai ia siaia lao, badina unai neganai Heroda be Ierusalema dekenai ia noho.

⁸Heroda ese Iesu ia itaia, vadaeni ia moale bada, badina be nega daudau Iesu ena sivarai ia kamonai, vadaeni ia ura be do ia itaia, bona Iesu ese toa ta do ia karaia, vadaeni do ia itaia.

⁹Vadaeni ia dekenai hereva momo ia nanadaia, to Iesu be ia haere lasi.

¹⁰Dubu biagudia bona taravatu hadibaia taudia be unuseni idia gini, idia ese Iesu idia samania mai goada danu.

¹¹Vadaeni Heroda mai ena tuari taudia danu ese Iesu idia kirikirilaia, idia hevaseha henia, dabua namo herea ta iena tauanina dekenai idia atoa, vadaeni Pilato dekenai idia siaia lou.

¹²Unai neganai Pilato bona Heroda be idia maino karaia vadaeni, badina be guna idia ruaosi ta ta dekenai idia badu henia.

¹³Vadaeni Pilato ese dubu biagudia bona hanua lohia taudia ia boiridia,

¹⁴ia hamaorodia, ia gwau, “Inai tau umui mailaia, umui gwau hanua dekenai ia ese taunimanima ia hakaua kerere, be lau ese umui emui samania hereva lau tahua, to iena kerere ta lau davaria lasi.

¹⁵Heroda danu ese Iesu ena kerere ta ia davaria lasi, unai dainai ia siaia lou ita dekenai. Inai dainai, ia ese ena davana be mase kererena ta ia karaia lasi.

¹⁶Namo, lau botaia, vadaeni do lau ruhaia ia lao.”

¹⁷Badina be nega ibounai, Pilato ena kara be unai aria neganai, dibura ruma dekenai idia noho tauna ta do ia ruhaia murimuri dekenai.

¹⁸To taunimanima ibounai idia boiboi, idia gwau, “Inai tau alaia. To Baraba be do oi ruhaia, bona henia ai dekenai.”

¹⁹Baraba be hanua badana lalonai heatu ia havaraia, bona taunimanima ia alaia dainai, dibura ruma dekenai idia koua.

²⁰Pilato ese ma ia hereva henia lou idia dekenai, ia gwau ia ura be Iesu do ia ruhaia ia lao.

²¹To idia ma idia boiboi, idia gwau, “Oi hasatauroa, oi hasatauroa!”

²²Nega ihatoina ma ia hereva lou idia dekenai, ia gwau, “Inai tau ena dika be dahaka? Lau be mase ena badina ta ia dekenai lau davaria lasi. Lau ese do lau botaia, vadaeni do lau ruhaia.”

²³To idia be mai goada danu idia boiboi, idia gwau, “Oi hasatauroa!” Vadaeni idia edia hereva ia kwalimu.

²⁴Vadaeni Pilato ese idia edia ura hegeregerena ia karaia.

²⁵Inai Baraba, heatu bona alaia dainai dibura ruma dekenai ia noho tauna, be ia siaia murimuri dekenai, idia edia noinoi hegeregerena. To Iesu be ia henia idia dekenai, edia ura do idia karaia.

²⁶Idia ese Iesu idia hakaua murimuri dekenai, vadaeni Simona, Kurene tauna ta, gunika dekena amo ia mai neganai idia dogoatao, satauro be iena pagana dekenai idia atoa, Iesu ena murinai do ia huaia.

²⁷Taunimanima momo herea be Iesu ena murinai idia raka, bona hahine haida idia raka lao neganai, idia taitai noho.

²⁸Vadaeni Iesu ese iena vairana ia giroa, idia dekenai ia hereva, ia gwau, “Ierusalema hahine e, lau dekenai do umui taitai lasi, to umui sibona dekenai umui taitai, bona emui natuna dekenai do umui taitai.

²⁹Badina be negana do ia mai, taunimanima do idia gwau, natuna lasi hahine bona natuna maragi havaraia diba lasi hahine be idia namo!

³⁰Unai neganai ororo badadia dekenai do idia hereva henia, do idia gwau, ‘Aiemai latanai umui moru!’ bona ororo maragidia dekenai do idia hamaoroa, do idia gwau, ‘Ai do umui hunia!’

³¹Badina bema au be mai mauri danu neganai inai bamona kara idia karaia, be au mai kakoro danu neganai be edena bamona do idia karaia?”

³²Dika karaia taudia rua be Iesu danu idia hakaua murimuri dekenai, do idia hasatauroa nega tamona.

³³Gabu ta dekenai idia ginidae, ena ladana be Kwara Koukouna. Unuseni Iesu idia hasatauroa. Inai dika karaia taudia danu, ta Iesu ena idiba kahana dekenai, ma ta ena lauri kahana dekenai, idia hasatauroa.

³⁴Vadaeni Iesu ia guriguri, ia gwau, “Egu Tamana e, inai taudia edia dika mani oi gwauatao, badina idia diba lasi dekenai inai bamona idia karaia noho.” Vadaeni iena dabua idia haria karaia, laki gadara dekena amo edia ahuna ta ta idia abia.

³⁵Hanua taudia be idia gini, Iesu idia itaia noho. Bona hanua lohia taudia ese idia kirikirilaia ia dekenai, idia gwau, “Ia be idau taudia ia hamauria, bema ia be Dirava ena Keriso, Dirava ena abia hidi tauna, ia be sibona do ia hamauria!”

³⁶Tuari taudia ese Iesu idia hevaseha henia, idia raka kahirakahira, uaina ena mamina ia namo lasi idia henia daekau ia dekenai, idia gwau,

³⁷“Bema inai be momokani oi be Iuda taudia edia king, oi sibona do oi hamauria be namo!”

³⁸Revareva ta danu idia torea, iena atai dekenai idia atoa, idia torea, “Iuda taudia edia King.”

³⁹Vadaeni ia danu idia hasatauroa tauna ta ese ia dekenai ia hevaseha, ia gwau, “Oi be Keriso, a? Oi sibona oi hamauria, bona ai danu oi hamauria!”

⁴⁰To iena turana ese ia gwau henia, ia gwau, “Dirava dekenai oi gari lasi, a? Oi be do oi mase, ia hegeregerena.

⁴¹Gau tamona, ita ruaosi do ita mase iseda kara dika davana, to inai tau be mai ena kerere lasi.”

⁴²Vadaeni ia gwau, “Iesu e, oiemu Basileia do oi abia neganai, do oi laloa lau!”

⁴³Iesu ia gwau, “Momokani lau hamaoroa oi dekenai, hari dina ita ruaosi Paradaiso dekenai do ita ginidae.”

⁴⁴Unai be dina tubua neganai, vadaeni unai nega dekena amo ia lao adorahi neganai, tano ibounai ia dibura.

⁴⁵Dibura ese dina ia koua, vadaeni Dubu Helaga ena iduara koua dabua helagana badana be huana dekena amo sibona ia darea kahana rua.

⁴⁶Vadaeni Iesu ia boiboi, ia gwau, “Egu Tamana e, egu lauma be oiemu imana dekenai lau atoa inai.” Unai bamona ia hereva, vadaeni ia mase.

⁴⁷Tuari biaguna ese unai kara ia itaia, vadaeni ia ese Dirava ia hanamoa, ia gwau, “Inai tau be kara maoromaoro tauna!”

⁴⁸Idia itaia noho taudia momo herea ese unai gaudia idia vara idia itaia, vadaeni lalohisihisi dainai, edia kemena idia botaia, bona hanua dekenai idia giroa lou.

⁴⁹Iesu ena turana, bona Galilea dekena amo iena murinai idia raka hahinedia be idau gabu dekenai idia gini, idia itaia noho.

⁵⁰Kaunsolo tauna ta, ena ladana be Iosepa, kara maoromaoro tauna, ia noho.

⁵¹Ia be kaunsolo edia hereva hebou dekenai bona edia kara dekenai ia vareai lasi. Ia be Iudea ena hanua ta, ena ladana be Arimatea, tauna. Ia danu Dirava ena Basileia ia naria noho.

⁵²Vadaeni ia lao Pilato dekenai, Iesu ena tauanina ia noia.

⁵³Vadaeni Iosepa ese Iesu ena tauanina ia abia diho, dabua aukana dekenai ia kumia, nadi gabuna idia geia ena matuna lalonai idia atoa. Unai nadi ena matuna be matamata, ena lalona dekenai tau ta idia do guria lasi.

⁵⁴Unai be Paraide, Sabati totona karaia hegaegae ena dina bona Sabati Dina be kahirakahira vadaeni.

⁵⁵Vadaeni Galilea dekena amo Iesu ena murinai idia raka hahinedia be Iosepa ena murinai idia lao, nadi ena matuna idia itaia, bona Iesu ena tauanina unuseni idia guria, be idia itaia danu.

⁵⁶Vadaeni idia giroa lao, muramura mai bonana, bona dahua muramurana idia abia hegaegae. To Sabati neganai idia laga-ani, taravatu ena hereva hegeregerena.