Read Buka Helaga (Hiri Motu) 1993 LUKA 4 Bible Online

LUKA 4 - Buka Helaga (Hiri Motu) 1993 bible

LUKA 4

¹Iesu Ioridane Sinavai dekena amo ia giroa lou neganai, Lauma Helaga ese ia hahonua, vadaeni Lauma Helaga ese taunimanima idia noho lasi tano dekenai ia hakaua lao,

²Unuseni dina 40 lalonai Satani ese Iesu ia dibagania. Unai dina ibounai Iesu be ia aniani lasi, vadaeni ia hitolo.

³Vadaeni Satani ese ia dekenai ia hereva, ia gwau, “Oi be Dirava ena Natuna sedira, inai nadi dekenai oi hereva henia, aniani gauna dekenai oi halaoa.”

⁴To Iesu ia haere, ia gwau, “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi.’ ”

⁵Vadaeni Satani ese Iesu ia hakaua daekau, bona nega sisina lalonai tanobada ena basileia ibounai Iesu dekenai ia hedinaraia.

⁶Satani ia gwau, “Oi dekenai siahu do lau henia, inai gau ibounai do oi naria, vadaeni ladana bada do oi abia. Inai gau ibounai be lauegu, bona lau ura henia tauna dekenai do lau henia diba.

⁷Unai dainai, bema oi tomadiho henia lau dekenai, inai gau ibounai be do oi abia oiemu.”

⁸Iesu ia haere, ia gwau, “Buka Helaga ia torea vadaeni inai bamona, ‘Lohiabada oiemu Dirava dekenai do oi tomadiho henia, ia sibona ena ura do oi karaia.’ ”

⁹Vadaeni Satani ese Ierusalema dekenai Iesu ia hakaua lao, Dubu Helaga ena atai dekenai ia haginia, ia gwau, “Oi be Dirava ena Natuna sedira, inai Dubu dekena amo do oi paudobi.

¹⁰Badina be Buka Helaga ia torea vadaeni, ia gwau: ‘Dirava ese iena aneru do ia hamaorodia, oi do idia naria.’

¹¹Ma Buka Helaga ia gwau: ‘Aneru ese edia imana dekenai oi do idia abia isi, oiemu aena nadi dekenai do oi botaia garina.’ ”

¹²Iesu ia haere, ia gwau, “Danu Buka Helaga ia torea vadaeni, ia gwau: ‘Lohiabada oiemu Dirava dekenai oi dibagania lasi.’ ”

¹³Satani ena dibagani ibounai ia haorea, vadaeni ia rakatania, ela bona ma nega ta.

¹⁴Iesu be Lauma Helaga ena siahu dekenai ia giroa lou Galilea dekenai, vadaeni iena kara sivaraina be unai tano kahana ibounai dekenai idia gwauraia loaloa.

¹⁵Idia edia dubu lalonai ia hadibaia karaia, bona idia ibounai ese Iesu idia hanamoa.

¹⁶Vadaeni Iesu be Nasareta, ia tubu daekau gabuna, dekenai ia lao, bona hanaihanai iena kara, Sabati Dina dekenai dubu lalonai ia raka vareai. Vadaeni Buka Helaga duahia totona ia toreisi.

¹⁷Idia ese Isaia, peroveta tauna, ena Buka idia henia. Vadaeni ia kehoa, inai bamona ia torea gabuna dekena amo ia duahia, ia gwau:

¹⁸“Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia. Lau ia siaia vadaeni, idia guia taudia do lau ruhaia totona, bona matakepulu taudia edia matana kehoa hereva do lau gwauraia, bona mai edia bero taudia dekenai mauri do lau henia.

¹⁹Ma danu Lohiabada ese iena taunimanima do ia hamauria, ena nega do lau harorolaia.”

²⁰Vadaeni Iesu ese Buka ia koua, ia naria tauna dekenai ia henia lou, vadaeni ia helai diho. Taunimanima ibounai dubu lalonai Iesu dekenai idia itaia noho.

²¹Ia ese ia haroro hamatamaia, ia gwau, “Inai umui kamonaia herevana, be hari dina ia momokani vadaeni.”

²²Vadaeni ibounai ese ia dekenai idia hanamoa, hereva namodia iena uduna dekena amo idia kamonai dainai, bona idia hoa, idia gwau, “Inai be Iosepa ena natuna lasi, a?”

²³Vadaeni Iesu ese idia ia hamaoroa, ia gwau, “Inai hereva be momokani lau dekenai do umui gwauraia, do umui gwau, ‘Dogeta tauna e, oi sibona do oi hamauria, Kaperanauma dekenai oi karaia edia sivaraina ai kamonai, be iniseni, oiemu hanua korikori dekenai danu do oi karaia.’ ”

²⁴Ma Iesu ia gwau, “Momokani lau hamaoroa umui dekenai, peroveta tauna be iena hanua korikori taudia ese do idia abia dae lasi.

²⁵Danu lau hamaoroa umui dekenai, Elia ena nega dekenai, vabu momo herea Israela dekenai idia noho, unai neganai lagani toi bona hua 6 medu ia diho lasi, tanobada ibounai hitolo ena nega be ia bada.

²⁶To Dirava ese Elia ia siaia lao lasi Israela ena vabu ta dekenai. Idau tano hanua, ladana Sarepata, Sidono ena kahana hanua, ena vabu ta dekenai ia siaia lao.

²⁷Bona Elisaia, peroveta tauna, ena neganai, lepera taudia momo Israela dekenai idia noho, to ta ia hanamoa lasi, Namana, Suria tauna sibona.”

²⁸Dubu dekenai idia haboua taudia ibounai ese inai hereva idia kamonai, idia badu dikadika.

²⁹Idia toreisi, hanua dekena amo Iesu idia doria murimuri dekenai, edia hanua idia haginia ororo dekenai idia veria lao, ororo dekena amo do idia negea diho gwauraia.

³⁰To ia be edia huana dekena amo ia raka siri.

³¹Iesu be Kaperanauma, Galilea ena hanua ta, dekenai ia ginidae, vadaeni Sabati Dina neganai ia hadibaia karaia.

³²Idia be iena hadibaia hereva dekenai idia hoa, badina be ia hereva mai siahu danu.

³³Dubu lalonai lauma dika ese ia abia tauna ta ia noho. Ia be ia boiboi bada herea, ia gwau,

³⁴“Iesu Nasareta tauna e, ai dekenai dahaka oi karaia? Ai do oi alaia totona oi mai, a? Lau diba oi be Dirava ena Helaga Tauna.”

³⁵Vadaeni Iesu ese ia gwau henia, ia gwau, “Oi hereva lasi, ia dekena amo oi lao murimuri dekenai.” Vadaeni lauma dika ese unai tau tano dekenai ia negea diho idia edia vairanai, vadaeni ia dekena amo ia rakatania lao. Unai tau be bero ta ia davaria lasi.

³⁶Vadaeni ibounai idia hoa, idia ta ta dekenai idia hereva, idia gwau, “Inai be dahaka hereva? Ia be mai siahu, bona mai goada danu lauma dikadia ia hereva henia, bona idia rakatania lao.”

³⁷Unai tano ena kahana ibounai dekenai Iesu ena sivarai idia gwauraia loaloa.

³⁸Dubu dekena amo idia diho, vadaeni Simona ena ruma dekenai idia daekau. Simona ena adavana ena sinana ia gorere, iena tauanina ia siahu, vadaeni idia ese Iesu idia hamaoroa.

³⁹Ia be ia lao, hahine ena badibadinai ia gini, gorere dekenai ia gwau henia, vadaeni gorere ia doko, hahine be maoromaoro ia toreisi, idia edia hesiai gaukara ia karaia.

⁴⁰Dina be kahirakahira ia diho neganai, idia ese gorere idauidau taudia ibounai Iesu dekenai idia abia lao. Vadaeni iena imana idia ta ta edia latanai ia atoa, ibounai ia hamauridia.

⁴¹Lauma dikadia danu taunimanima momo dekena amo ia lulua murimuri dekenai, vadaeni lauma dikadia idia boiboi, idia gwau, “Oi be Dirava ena Natuna.” To Iesu ia gwau henia idia dekenai, bona ia hamaorodia, do idia hereva lasi, badina be idia diba ia be Keriso.

⁴²Daba ia rere neganai, Iesu ia toreisi, taunimanima idia noho lasi gabuna dekenai ia lao, to taunimanima ese idia tahua, idia davaria, vadaeni idia ura dogoatao, idia do ia rakatania lasi idia gwau.

⁴³To ia hereva henia idia dekenai, ia gwau, “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.”

⁴⁴Vadaeni Iudea dubu edia lalonai ia haroro.