Read Buka Helaga (Hiri Motu) 1993 LUKA 5 Bible Online

LUKA 5 - Buka Helaga (Hiri Motu) 1993 bible

LUKA 5

¹Dina ta Genesareta gohu kone dekenai Iesu ia gini neganai taunimanima momo ia dekenai idia gini hagegea, Dirava ena hereva kamonai totona.

²Ia ese vanagi rua ia itaia, kone ena badinai idia gini noho. Vanagi taudia be kone dekenai edia reke idia hanamoa.

³Vadaeni Iesu ese Simona ena vanagi dekenai ia guia. Ia ese Simona ia hamaoroa vanagi be sisina do ia doria lao kone dekena amo. Vadaeni vanagi dekenai ia helai diho, taunimanima momo dekenai ia hadibaia.

⁴Iena hereva ia hadokoa, vadaeni ia ese Simona dekenai ia hamaoroa, ia gwau, “Dobu kahana dekenai ita lao, emui reke do umui atoa diho, gwarume do umui abia totona.”

⁵To Simona ia haere, ia gwau, “Egu biaguna e, ai be hanuaboi lalonai ai hekwarahi mase ia mai daba ia rere, gwarume ta ai abia lasi, to oiemu hereva dainai reke be do ai atoa diho.”

⁶Vadaeni idia atoa diho, gwarume momo herea idia abia. Edia reke be kahirakahira ia darea.

⁷Vadaeni idia boiboi, edia turana vanagi ta dekena amo do idia mai durua henia totona. Idia mai, vadaeni vanagi ruaosi idia honu, kahirakahira idia mutu.

⁸Simona Petero ese unai kara ia itaia, vadaeni Iesu ena aena badinai ia tui diho, ia gwau, “Lohiabada e, lau dekena amo do oi raka siri, badina lau be dika tauna.”

⁹Badina be ia bona iena turana ibounai idia hoa dikadika, unai gwarume idia abia dainai.

¹⁰Simona bona idia haoda hebou taudia danu, Iamesi bona Ioane, Sebedeo ena natuna, idia hoa. Vadaeni Iesu ese Simona dekenai ia hamaoroa, ia gwau, “Oi gari lasi, inai murinai be do oi haoda, taunimanima do oi abia.”

¹¹Unai haoda taudia ese vanagi ruaosi be kone badinai idia atoa, vadaeni gau ibounai idia rakatania, Iesu ena murina dekenai idia raka.

¹²Nega ta Iesu be hanua ta lalonai ia noho, bona unuseni be tau ta, iena kopina ibounai be lepera sibona. Ia ese Iesu ia itaia neganai, iena kwarana ia atoa diho Iesu ena vairanai, ia noinoi, ia gwau, “Lohiabada e, bema oi ura, lau do oi hagoevaia diba.”

¹³Iesu ese iena imana ia atoa, iena kopina dekenai ia dogoatao, ia gwau, “Lau ura, harihari oi goeva.” Vadaeni nega tamona lepera tauna ia goeva.

¹⁴Vadaeni Iesu ese taravatu ia henia, tau ta do ia hamaoroa lasi. Ma ia gwau, “Oi lao, dubu ena hahelagaia tauna ese oi do ia itaia, bona hagoevaia gaudia, Mose ese ia gwauraia hegeregerena, do oi henia. Vadaeni taunimanima do idia diba oiemu lepera gorere ia ore.”

¹⁵To Iesu ena kara sivaraina idia gwauraia loaloa, vadaeni taunimanima momo herea idia haboua, Iesu ena hereva kamonaia totona, bona edia gorere do ia hanamoa totona.

¹⁶To ia be ia raka siri, taunimanima idia noho lasi tano dekenai ia lao guriguri.

¹⁷Dina ta, Iesu ia hadibaia karaia neganai, Farisea taudia bona taravatu hadibaia taudia be Iesu kahirakahira idia helai. Idia be Galilea ena hanua ibounai, Iudea bona Ierusalema dekena amo. Vadaeni Iesu ese Lohiabada ena siahu dekenai gorere taudia ia hanamoa.

¹⁸Tau haida ese raka diba lasi tauna geda dekenai ia hekure noho neganai, idia huaia lao, ruma dekenai vareai dalana idia tahua, Iesu ena vairana dekenai gorere tauna idia atoa gwauraia.

¹⁹To taunimanima momo herea dainai, vareai dalana ta idia davaria lasi, vadaeni raka diba lasi tauna mai geda danu idia abia daekau, ruma ena guhi dekenai matu idia karaia, vadaeni idia atoa diho Iesu ena vairana dekenai, taunimanima momo edia huanai.

²⁰Ia ese edia abidadama ia itaia, vadaeni ia gwau, “Tau e, oiemu dika lau gwauatao vadaeni.”

²¹Taravatu hadibaia taudia bona Farisea taudia be sibona ta ta idia hereva, idia gwau, “Inai Dirava ia hadikaia tauna be daika? Daika be dika ia gwauatao diba? Dirava sibona.”

²²To Iesu be edia laloa ia diba, vadaeni ia gwau, “Badina be dahaka emui lalona dekenai unai bamona umui laloa?

²³Edena be ia haraga, do lau gwau, ‘Oiemu dika ia gwauatao vadaeni,’ o do lau gwau, ‘Oi toreisi, oi raka?’

²⁴To umui do lau hadibaia Taunimanima ena Natuna be mai ena siahu, dika do ia gwauatao tanobada dekenai.” Vadaeni ia ese raka diba lasi tauna ia hamaoroa, ia gwau, “Lau hereva henia oi dekenai, oi toreisi, oiemu geda oi lokua, oiemu ruma dekenai oi lao.”

²⁵Vadaeni nega tamona ia be idia edia vairana dekenai ia toreisi, iena geda ia lokua, iena ruma dekenai ia raka lao, Dirava dekenai ia hanamoa.

²⁶Vadaeni ibounai idia hoa bada, bona mai gari danu Dirava dekenai idia hanamoa, idia gwau, “Hoa karadia hari dina ita itaia momokani.”

²⁷Iesu be ia raka murimuri dekenai, vadaeni takisi gogoa tauna ta, ena ladana be Levi, takisi ruma dekenai ia helai neganai Iesu ese ia itaia. Vadaeni Iesu ia boiria, ia gwau, “Lauegu murina dekenai oi raka.”

²⁸Vadaeni iena gau ibounai ia rakatania, ia toreisi, Iesu ena murinai ia raka.

²⁹Vadaeni Levi ese aria badana ta iena ruma dekenai ia karaia Iesu ena. Takisi gogoa taudia momo mai edia turana, idia danu idia helai aniani totona.

³⁰To Farisea taudia bona taravatu hadibaia taudia ese idia dekenai idia maumau, Iesu ena diba tahua taudia dekenai idia nanadaia, idia gwau, “Dahaka dainai takisi gogoa taudia bona kara dika taudia danu umui aniani hebou?”

³¹Iesu ese ia haere idia dekenai, ia gwau, “Goada taudia be dogeta tauna do idia tahua lasi, to gorere taudia sibona.

³²Lau danu kara maoromaoro taudia boiria totona lau mai lasi, to kara dika taudia edia lalona do idia giroa totona lau mai.”

³³Taunimanima haida ese Iesu idia nanadaia, idia gwau, “Badina be dahaka Ioane ena diba tahua taudia ese aniani lasi taravatu idia badinaia momo, idia guriguri nega momo danu, bona Farisea taudia edia diba tahua taudia danu, to oiemu diba tahua taudia be idia aniani bona idia inuinu noho?”

³⁴Vadaeni Iesu ese ia haere henia idia dekenai, ia gwau, “Headava matamata tauna be iena turana dekenai ia noho neganai, bema umui hamaorodia aniani lasi taravatu do idia badinaia, do idia kamonai o?

³⁵To negana do ia ginidae, headava matamata tauna be idia dekena amo do ia raka siri, unai neganai aniani lasi ena taravatu do idia badinaia.”

³⁶Inai parabole danu ia hamaorodia, ia gwau, “Dabua matamata ena kahana sisina do idia makohia lasi, dabua gunana ena matuna do idia koua totona. Unai bamona bema idia karaia, matamatana do ia makohia, bona ena kahana sisina gunana danu do idia hegeregere lasi.

³⁷Bona tau ta ese uaina matamata be kopina gunana dekenai do ia udaia lasi. Unai bamona bema ia karaia, uaina ese kopina do ia makohia, vadaeni uaina do ia bubua negea bona kopina danu do ia dika.

³⁸To uaina matamata be kopina matamata dekenai do idia udaia, vadaeni ruaosi do idia namo.

³⁹To uaina gunana ia inua manada tauna be matamatana do ia ura henia lasi, badina be ia ese do ia gwau, ‘Gunana be ia namo herea.’ ”