Read Buka Helaga (Hiri Motu) 1993 LUKA 6 Bible Online

LUKA 6 - Buka Helaga (Hiri Motu) 1993 bible

LUKA 6

¹Sabati Dina ta dekenai, Iesu be uiti uma ta dekenai ia raka hanaia, vadaeni ena diba tahua taudia ese uiti kwarana idia kokia, edia imana dekenai idia dahua sisina, bona idia raka noho neganai idia ania noho.

²To Farisea taudia haida ese idia nanadaia idia dekenai, idia gwau, “Umui be dahaka dainai mai taravatu karana Sabati Dina dekenai umui karaia?”

³Iesu ese ia haere henia idia dekenai, ia gwau, “Davida ena sivaraina umui duahia lasi, a? Ia bona iena turana danu idia hitolo neganai, edena bamona idia karaia?

⁴Ia ese Dirava ena Ruma dekenai ia raka vareai, aniani helagana ia abia, ia ania, bona iena turana dekenai danu ia henia. To unai aniani be ia helaga momokani, hahelagaia taudia sibona edia.”

⁵Ma ia hamaoroa idia dekenai, ia gwau, “Taunimanima ena Natuna be Sabati Dina ena biaguna.”

⁶Ma Sabati Dina ta neganai, Iesu be dubu dekenai ia vareai, ia hadibaia. Unuseni be tau ta, iena imana idibana kahana ia dika.

⁷Vadaeni taravatu hadibaia taudia bona Farisea taudia ese idia itaia noho Iesu dekenai, Sabati Dina dekenai do ia hanamoa o, vadaeni do idia samania gwauraia.

⁸Ia be edia laloa ia diba, vadaeni imana dika tauna dekenai ia hamaoroa, ia gwau, “Oi toreisi, edia huanai oi gini.” Vadaeni ia toreisi.

⁹Iesu ese ia nanadaia idia dekenai, ia gwau, “Lau nanadaia umui dekenai, iseda taravatu dekenai, edena be ia namo, Sabati Dina dekenai taunimanima do ita hanamoa, o do ita hadikaia? Do ita hamauria, o do ita alaia?”

¹⁰Iesu ese idia ta ta ibounai dekenai ia itaia, vadaeni inai tau dekenai ia hereva henia, ia gwau, “Oiemu imana oi atoa maoromaoro.” Ia atoa maoromaoro, vadaeni iena imana ia namo, ena imana lauri kahana hegeregerena.

¹¹To idia be idia badu dikadika, idia hereva hebou, dahaka do idia karaia Iesu dekenai.

¹²Unai neganai, Iesu be ororo dekenai ia daekau, ia guriguri totona. Hanuaboi ia ese Dirava dekenai ia guriguri ia lao daba rere.

¹³Dabai ia ese iena diba tahua taudia ia boiria, ibounai 12 ia abia hidi, idia dekenai ia gwauraia, Aposetolo. Edia ladana be inai:

¹⁴Simona, ena ladana ta Iesu ia atoa Petero, mai ena tadina Andrea danu, bona Ioane, Iamesi, Filipo bona Batolomeo,

¹⁵Mataio bona Toma, Iamesi Alepeo bona Simona, Roma taudia idia lulua gwauraia orea tauna ta,

¹⁶Iuda Iamesi, bona Iuda Iskariote, ia be Iesu ena mase dala ia karaia tauna.

¹⁷Idia danu Iesu ia raka diho, bona palaka gabuna dekenai Iesu ia gini, mai ena diba tahua taudia danu, bona taunimanima momo herea, Iudea dekena amo bona Ierusalema dekena amo bona Turo bona Sidono edia kone gabu dekena amo, Iesu ena hereva kamonai totona bona edia gorere do ia hamauria totona idia lao.

¹⁸Bona lauma dikadia ese idia abia taudia danu be Iesu ese ia hanamoa lou.

¹⁹Vadaeni taunimanima ibounai idia ura Iesu dekenai edia imana idia atoa, badina siahu be ia dekena amo ia mai, bona ibounai be ia ese ia hanamoa.

²⁰Vadaeni Iesu ese iena diba tahua taudia dekenai ia itaia, ia gwau: “Ogogami taudia be umui namo, badina Dirava ena Basileia be umui emui.

²¹Harihari umui hitolo taudia be umui namo, badina be emui bogana do idia kunu. Harihari umui taitai taudia be umui namo, badina umui be do umui kiri.

²²“Taunimanima ese do idia badu henia umui dekenai, do idia ura henia lasi umui dekenai, edia uduna dekenai umui do idia hadikaia, emui ladana do idia hadikaia, Taunimanima ena Natuna dainai, neganai be do umui namo.

²³Unai kara ia vara neganai do umui moale, do umui mavaru mai moale bada herea, emui davana guba dekenai do ia bada, badina edia sene taudia ese peroveta taudia dekenai unai bamona idia karaia.

²⁴“To kohu momo taudia madi umui be dika, badina emui hanamoa be umui abia vadaeni.

²⁵Emui bogana idia kunu taudia madi umui be dika, badina do umui hitolo. Harihari umui kiri taudia madi umui be dika, badina be emui lalona do idia metau, do umui taitai.

²⁶“Taunimanima ibounai ese umui do idia hanamoa neganai, madi umui be dika, badina be edia sene taudia ese peroveta koikoi taudia dekenai unai bamona idia hanamoa.

²⁷“Lau dekenai umui kamonai henia taudia, lau hamaoroa umui dekenai, umui dekenai idia badu taudia do umui lalokau henia, bona umui dekenai idia hadikaia taudia be do umui kara namo henia.

²⁸Edia hereva dekenai umui idia hadikaia taudia be do umui hanamoa, bona umui dekenai idia dagedage taudia be idia totona do umui guriguri.

²⁹Tau ta ese emu vairana idiba kahana bema ia botaia, emu lauri kahana danu do oi henia, ia botaia. Bona bema tau ta ese emu dabua do ia kokia, emu rami danu do oi dogoatao lasi.

³⁰Oi dekenai idia noinoi taudia do oi henia, bona emu gau ia abia kava tauna dekena amo abia lou totona herevana oi karaia lasi.

³¹Umui be umui ura taunimanima ese umui dekenai idia karaia hegeregerena, umui danu inai bamona do umui karaia idia dekenai.

³²“Bema umui idia lalokau henia taudia sibona do umui lalokau henia, umui emui namo be dahaka? Kara dika taudia ese idia dekenai idia lalokau henia taudia be idia lalokau henia danu.

³³Bona umui dekenai idia hanamoa taudia sibona bema umui hanamoa, umui emui namo be dahaka? Kara dika taudia danu unai bamona idia karaia.

³⁴Bema davana do idia karaia taudia sibona dekenai umui henia, umui emui namo be dahaka? Kara dika taudia danu edia turana dekenai idia henia, edia davana do idia abia totona.

³⁵To umui dekenai idia badu taudia do umui lalokau henia, bona idia dekenai durua do umui henia, bona do umui henia kava, ena davana do umui tahua lasi, vadaeni emui davana do ia bada, umui be Dirava Ataiai Momokani ese iena natuna do ia halaoa umui. Badina be Dirava ese ia dekenai idia tanikiu henia lasi taudia bona kerere taudia danu ia bogahisihisi henidia.

³⁶Bogahisihisi kara sibona do umui karaia, emui Tamana bamona, ia be mai ena bogahisihisi.

³⁷“Emui lalona dekenai taunimanima do umui gwauraidia kerere lasi, vadaeni Dirava ese umui do ia gwauraia kerere lasi. Dika ena davana do umui gwauraia lasi, vadaeni Dirava ese emui dika ena davana do ia gwauraia lasi. Dika do umui gwauatao, vadaeni emui dika be Dirava ese do ia gwauatao.

³⁸Taunimanima dekenai do umui henia lao, vadaeni Dirava ese do ia henia umui dekenai. Taunimanima ese emui puse do idia hahonua ela bona do ia bubua danu. Oibe, umui dekenai idia haria gauna be do ia hegeregere momokani, bona do ia hanaia danu. Badina be umui henia lao ena maka hegeregerena, Dirava ese umui dekenai do ia henia lao.”

³⁹Ma Iesu ese parabole ta ia henia idia dekenai, ia gwau, “Matakepulu tauna ta ese matakepulu tauna ma ta do ia hakaua diba o? Idia ruaosi guri dekenai do idia moru lasi, a?

⁴⁰Diba tahua tauna ese ia hadibaia tauna do ia hanaia lasi, to iena sikuli ia karaia haorea murinai, ia be iena hadibaia tauna danu do idia hegeregere diba.

⁴¹“Badina be dahaka au ena momoru emu tadikakana ena matana dekenai oi itaia, to au badana oiemu matana dekenai ia noho, be oi laloa lasi?

⁴²Badina be dahaka oiemu tadikakana oi hamaoroa, oi gwau, ‘Egu turana e, mani au ena momoru oiemu matana dekena amo do lau kokia,’ to au badana oiemu matana dekenai be oi itaia lasi. Koikoi tauna e, au badana oiemu matana dekena amo do oi kokia guna, murinai au ena momoru oiemu tadikakana ena matana dekenai do oi itaia namonamo, vadaeni do oi kokia.

⁴³“Au namona ese huahua dikana do ia havaraia lasi, bona au dikana ese huahua namona do ia havaraia lasi.

⁴⁴Badina be au ta ta edia huahua ese edia toana idia hedinaraia. Au ginigini dekena amo fig idia abia lasi. Ava ginigini dekena amo vain ena huahua idia abia lasi.

⁴⁵Tau namona ena lalona dekenai ia laloa gaudia be namo dainai, kara namodia do ia havaraia. Tau dikana ena lalona dekenai ia laloa gaudia be dika dainai, kara dikadia do ia havaraia. Taunimanima ese edia lalona dekenai idia honu gaudia, be do idia gwauraia, edia uduna dekenai.

⁴⁶“Umui be badina dahaka umui gwauraia lau dekenai, umui gwau, ‘Lohiabada e, Lohiabada e,’ to egu hereva umui karaia lasi?

⁴⁷Lau dekenai do ia mai, egu hereva do ia kamonai, bona karana do ia karaia, tauna ena toana do lau hedinaraia.

⁴⁸Ia be tau ta bamona, iena ruma do ia karaia gwauraia, vadaeni guri ia geia dobu, nadi ena latanai ruma ia haginia. Vadaeni abata ia ginidae neganai, ranu ese ruma ia doria, to ia marere lasi, badina be nadi ena latanai ia haginia.

⁴⁹To egu hereva ia kamonai to karana ia karaia lasi tauna be tau ta bamona, iena ruma be tano kopina dekenai ia haginia, guri ia geia dobu lasi, vadaeni abata ese unai ruma ia doria neganai, ia moru haraga, iena moru be ia dika momokani.”