Read Buka Helaga (Hiri Motu) 1993 LUKA 9 Bible Online

LUKA 9 - Buka Helaga (Hiri Motu) 1993 bible

LUKA 9

¹Iesu ese iena diba tahua taudia ia boiridia, bona siahu ia henia, lauma dika lulua oho bona gorere taudia hanamoa ena siahuna.

²Vadaeni ia siaidia, Dirava ena Basileia do idia harorolaia, bona gorere taudia do idia hanamodia.

³Bona ia hamaorodia, ia gwau, “Laolao ena kohu umui abia lao lasi, itotohi lasi, pusepuse lasi, aniani lasi, moni lasi. Bona dabua danu rua umui abia lao lasi.

⁴Umui daekau ruma dekenai do umui noho, ia lao bona do umui raka siri negana.

⁵To umui do idia abia dae lasi taudia, be edia hanua do umui rakatania neganai, emui aena dekena amo kahu do umui kokia negea, idia dekenai sisiba goada henia totona.”

⁶Unai dainai, idia be idia raka lao, hanua momo edia lalonai Sivarai Namona idia harorolaia, bona gorere taudia idia hanamoa.

⁷Heroda tau badana ese Iesu ena kara sivaraina ia kamonai, vadaeni iena kudouna dekenai ia gari, badina be taunimanima haida idia gwau Ioane be mase dekena amo ia toreisi lou vadaeni.

⁸Ma haida idia gwau Elia ia hedinarai vadaeni. Ma haida idia gwau peroveta tauna gunana ta ia toreisi lou vadaeni.

⁹To Heroda ia gwau, “Ioane ena kwarana lau utua oho, to inai iena sivarai lau kamonaia tauna be daika?” Bona ia ura bada Iesu ia itaia.

¹⁰Aposetolo taudia idia giroa lou, edia gaukara ibounai Iesu dekenai idia hamaoroa. Vadaeni ia ese ia hakaudia siri, taunimanima idia noho lasi gabuna ta, Betesaida ena kahana dekenai, unuseni idia lao.

¹¹To taunimanima momo ese idia diba, vadaeni Iesu ena murina dekenai idia raka lao. Vadaeni ia ese idia ia abia dae, Dirava ena Basileia herevana ia haroro henia idia dekenai, bona gorere hanamoa ura taudia ia hanamoa.

¹²Adorahi neganai, diba tahua taudia 12 Iesu dekenai idia lao, idia gwau, “Inai taunimanima momo oi siaia, hanua edia lalonai bona uma gabu kahana kahana dekenai edia aniani do idia tahua, bona unuseni do idia mahuta, badina ita be taunimanima idia noho lasi tano dekenai.”

¹³To Iesu ese ia hamaorodia, ia gwau, “Umui ese edia aniani do umui henia.” Idia gwau, “Iseda aniani gaudia be 5 sibona, bona gwarume rua. Oi ura aniani do ai hoia inai taunimanima momo edia?”

¹⁴Badina tatau be 5000 bamona. Vadaeni Iesu ese iena diba tahua taudia dekenai ia hamaoroa, ia gwau, “Do umui hereva henia idia dekenai, 50, 50 dekena amo orea ta ta dekenai do idia helai diho.”

¹⁵Unai bamona idia karaia, vadaeni ibounai idia helai diho.

¹⁶Vadaeni Iesu ese aniani gaudia 5 bona gwarume rua ia abia, guba dekenai iena matana ia negea, unai aniani ia hanamoa. Vadaeni ia makohia sisina sisina, diba tahua taudia dekenai ia henia, do idia henia unai taunimanima ta ta dekenai.

¹⁷Ibounai idia aniani, edia bogana idia kunu. Vadaeni aniani ena orena idia haboua, bosea 12 idia hahonua.

¹⁸Nega ta Iesu sibona ia guriguri, iena diba tahua taudia be ia danu idia noho. Vadaeni idia dekenai ia nanadaia, ia gwau, “Taunimanima be dahaka idia gwau, lau be daika?”

¹⁹Idia haere, idia gwau, “Haida idia gwau, oi be Ioane Bapatiso, to haida idia gwau oi be Elia, ma haida idia gwau peroveta tauna gunana ta ia toreisi lou vadaeni.”

²⁰Ma ia nanadaia idia dekenai, ia gwau, “To umui be dahaka umui gwau, lau be daika?” Petero ese ia haere henia, ia gwau, “Oi be Dirava ena Keriso.”

²¹Vadaeni taravatu ia henia idia dekenai, ia gwau, “Tau ta dekenai inai hereva do umui hamaoroa lasi,

²²hereva be inai: Taunimanima ena Natuna be hisihisi momo do ia abia, hanua tau badadia, bona dubu biagudia bona taravatu hadibaia taudia ese do idia ura henia lasi, bona do idia alaia mase. To dina toi murinai ma do ia toreisi lou.”

²³Iesu ese idia ibounai dekenai ia hereva henia, ia gwau, “Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.

²⁴Badina be iena mauri ia dogoatao tauna, be iena mauri do ia abia lasi, to lau totona iena mauri do ia negea tauna, be iena mauri do ia abia.

²⁵Tau ta tanobada ibounai do ia abia, to sibona ena mauri do ia halusia, iena namo be dahaka?

²⁶Tau ta ese bema lau totona, o egu hereva totona do ia hemarai, Taunimanima ena Natuna ese ia totona do ia hemarai, ia be iena hairaina dekenai, bona iena Tamana ena hairaina dekenai, bona aneru helagadia edia hairaina dekenai do ia mai neganai.

²⁷Momokani lau hamaoroa umui dekenai, haida iniseni idia gini noho, be do idia mase lasi ia lao bona Dirava Basileia do idia itaia.”

²⁸Inai hereva idia ore murinai, dina 8 idia lao vadaeni, Iesu ese Petero bona Ioane bona Iamesi ia abia hidi, ororo dekenai idia ia hakaua daekau, guriguri totona.

²⁹Ia guriguri noho neganai, iena vairana ia idau vadaeni, bona iena dabua ia diaridiari, ia kurokuro momokani.

³⁰Vadaeni tatau rua ia danu idia herevahereva, Mose bona Elia.

³¹Mai edia hairaina danu idia hedinarai, bona Iesu be Ierusalema dekenai do ia mase, Dirava ena ura hegeregerena sivaraina idia herevalaia.

³²Petero bona iena turana idia mahuta mase, vadaeni mahuta dekena amo edia matana idia kehoa neganai, Iesu ena hairaina idia itaia, bona ia danu idia gini hebou tatau ruaosi idia itaia.

³³Idia ruaosi Iesu dekena amo idia raka siri hamatamaia, vadaeni Petero ese Iesu dekenai ia hereva, ia gwau, “Aiemai biaguna e, namo herea ita be iniseni ita noho, mani palai ruma toi do ai karaia, ta oiemu, ta Mose ena, ta Elia ena.” Ia hereva kava, edena bamona do ia hereva, be ia diba lasi.

³⁴Ia do ia hereva noho neganai, ori ta ese idia ia koua, vadaeni idia be ori ena lalonai idia vareai, bona idia gari dikadika.

³⁵Vadaeni gado ta ori ena lalona dekena amo ia mai, ia gwau, “Inai be lauegu Natuna, lau abia hidi tauna, iena hereva do umui kamonai.”

³⁶Inai hereva ia doko neganai, Iesu sibona idia itaia. To unai idia itaia gaudia, be idia herevalaia lasi, bona tau ta dekenai idia hamaoroa lasi.

³⁷Dina ta murinai, idia be ororo dekena amo idia diho neganai, taunimanima momo danu idia hedavari.

³⁸Vadaeni taunimanima momo edia huanai dekena amo tau ta ia boiboi, ia gwau, “Hadibaia tauna e, lau noinoi oi dekenai, mani oi mai, lauegu natuna oi itaia. Inai be egu natuna tamona sibona ia vara.

³⁹Nega haida lauma dikana ese ia abia, vadaeni ia boiboi kava, bona iena tauanina ia auka masemase, vadaeni iena uduna dekena amo kanudi momo ia diho. Inai gorere ia rakatania lasi, ela bona iena kopina ia bero momo.

⁴⁰Emu diba tahua taudia dekenai lau noinoi, lauma dikana do idia lulua murimuri dekenai, to idia be hegeregere lasi.”

⁴¹Iesu ia haere, ia gwau, “Inai nega noho taudia be dahaka abidadama lasi taudia! Inai nega noho taudia be dahaka kamonai lasi taudia! Lau be umui dekenai do lau noho ela bona edena neganai? Lau naria ela bona edena negai umui ese diba abia totona? Oiemu natuna oi mailaia.”

⁴²Mero ia raka kahirakahira neganai, lauma dikana ese tano dekenai ia hamorua, vadaeni iena tauanina ia auka masemase. Iesu ese lauma dikana ia gwau henia, bona mero ia hanamoa, vadaeni iena tamana dekenai ia henia lou.

⁴³Ibounai be Dirava ena siahu dekenai idia hoa bada herea. Idia ibounai Iesu ena kara dekenai idia hoa noho neganai, Iesu ese iena diba tahua taudia dekenai ia hamaoroa, ia gwau,

⁴⁴“Inai hereva emui taiana dekenai do idia vareai, be do umui laloa noho: Taunimanima ena Natuna be do idia samania, bona taunimanima edia imana dekenai do idia henia.”

⁴⁵To unai hereva gauna idia diba namonamo lasi, idia dekenai be ia hunia, ena anina idia davaria lasi. Bona Iesu dekenai nanadaia be idia gari.

⁴⁶Idia sibona idia hepapahuahu, daika be do ia bada.

⁴⁷To Iesu be edia laloa ia diba, vadaeni mero maragi ta ia boiria ia dekenai.

⁴⁸Vadaeni ia hamaoroa idia dekenai, ia gwau, “Lauegu ladana dainai, inai mero maragi ia abia dae tauna ese lau danu ia abia dae. Bona lau ia abia dae tauna ese lau ia siaia Diravana danu ia abia dae. Badina be umui emui huana dekenai ia maragi momokani tauna, ia be badana.”

⁴⁹Ioane ese ia hamaoroa ia dekenai, ia gwau, “Aiemai biaguna e, ai be tau ta ai itaia, oiemu ladana dekenai lauma dikadia ia lulua murimuri dekenai, vadaeni ai koua, badina ia be iseda orea tauna lasi.”

⁵⁰Iesu ia gwau, “Do umui koua lasi, badina be umui dekenai ia hadikaia lasi tauna, be ia durua henia umui dekenai.”

⁵¹Iesu do ia abia isi guba dekenai ena dina ia kahirakahira neganai, ia be Ierusalema dekenai ia raka lao, mai haheauka danu.

⁵²Vadaeni ia ese iena hesiai taudia ia siaia guna. Idia ese Samaria hanua dekenai idia ginidae, iena gabu do idia karaia hegaegae gwauraia.

⁵³To Iesu be Ierusalema dekenai ia raka lao dainai, idia abia dae lasi edia ruma dekenai.

⁵⁴Iena diba tahua taudia, Iamesi bona Ioane, unai kara idia itaia, vadaeni idia gwau, “Lohiabada e, oi ura lahi guba dekena amo do ai gwauraia, do ia diho, idia do ia hadikaia ore, a?”

⁵⁵To Iesu ese iena vairana ia giroa, idia ruaosi ia gwau henia.

⁵⁶Vadaeni hanua idauna ta dekenai idia lao.

⁵⁷Idia be dala dekenai idia lao noho neganai, tau ta ese Iesu ia hereva henia, ia gwau, “Lau be emu laolao ibounai do ita lao.”

⁵⁸To Iesu ia gwau, “Uda sisia be mai edia nadi matuna, bona ataiai manu be mai edia ruma, to Taunimanima ena Natuna be iena kwarana atoa gabuna lasi.”

⁵⁹Ma ta danu ia hamaoroa, ia gwau, “Lauegu murinai oi raka.” To unai tau ia gwau, “Lohiabada e, mani emu kara egu tamana do lau lao guria guna.”

⁶⁰To Iesu ia gwau, “Mase taudia sibona edia mase do idia guria, to oi be oi lao, Dirava ena Basileia do oi harorolaia.”

⁶¹Ma ta ia gwau, “Lohiabada e, lau be oiemu murinai do lau raka, to mani egu ruma taudia dekenai do lau lao, bamahuta karaia guna.”

⁶²To Iesu ia gwau, “Tau ta ese tano makohia gauna iena imana dekenai bema ia dogoatao vadaeni, to iena matana do ia negea murina kahana dekenai, ia be Dirava ena Basileia do ia abia diba lasi.”