Read Buka Helaga (Hiri Motu) 1993 DEUTERONOMI 14 Bible Online

DEUTERONOMI 14 - Buka Helaga (Hiri Motu) 1993 bible

DEUTERONOMI 14

¹Ma Mose ia hereva, ia gwau, “Umui be Lohiabada emui Dirava ena bese taudia. Unai dainai mase taudia totona umui taitai neganai, emui kopina do umui utua lasi, bona emui baguna dekenai huina be mase taitai totona do umui kakasia lasi.

²Badina umui be Lohiabada emui Dirava ena bese helagana. Lohiabada ese tanobada dekenai idia noho taudia ibounai dekena amo umui ia abia hidi, iena bese korikori do umui lao totona.

³“Lohiabada ese ia gwauraia miro gaudia ta do umui ania lasi.

⁴Do umui ania diba gaudia be inai: Boromakau, mamoe, nanigosi,

⁵dia badana, dia maragina, bona uda dekenai noho dia, uda ena nanigosi, ororo ena dia, tano palaka ena dia, bona ororo ena mamoe.

⁶Edia imana bona aena palapala be auka bona parara, bona aniani idia hadonoa, ma gabeai idia mumuta murimuri dekenai, ma idia ania lou gaudia ibounai umui ania diba.

⁷Mauri gaudia, bema edia aniani idia mumuta, ma idia ania lou, to edia imana bona aena palapala idia parara lasi gaudia, be do umui ania lasi. Gaudia be inai: Kamelo, hea, bona nadi dekenai idia noho rabito. Idia be miro umui dekenai, badina be, edia aniani idia ania lou, to edia imana bona aena palapala be idia parara lasi.

⁸“Boroma danu do umui ania lasi. Idia be miro umui dekenai. Edia imana bona aena palapala idia parara, to edia aniani idia ania lou lasi. Edia vamu do umui ania lasi, bona edia mase gaudia do umui dogoatao lasi.

⁹“Gwarume gaudia mai edia taiana bona mai edia unana do umui ania diba.

¹⁰To mai taiana lasi bona unana lasi gaudia do umui ania lasi, idia be miro umui dekenai.

¹¹“Manu goevadia ibounai do umui ania diba.

¹²To inai manu do umui ania lasi: Ugava badana, davara ugava, bona ugava maragina.

¹³Bona bogibada kakakakana, bona bogibada koremana, bona bogibada bamona manudia.

¹⁴Bona galo idauidau ibounai,

¹⁵bona kokokoko, bona hanuaboi bogibada, bona davara bogibada, bona bogibada idauidau ibounai.

¹⁶Bona baimumu maragina, davara galo, bona baimumu badana.

¹⁷Bona kanage, bona taunimanima noho lasi tano ena baimumu, bona baimumu kurokurona.

¹⁸Bona noko, bona noko bamona manudia, bona mariboi bamona manudia.

¹⁹“Manumanu ibounai, mai edia hanina, bona tano dekenai momo herea idia rau hebou gaudia be do umui ania lasi.

²⁰To manumanu mai edia hanina, goeva gaudia, do umui ania diba.

²¹“Sibona ia mase kava mauri gauna ta do umui ania lasi. Idau bese taudia, emui huanai idia noho taudia dekenai umui henia diba, idia ese unai mase kava gauna idia ania diba. O idau bese taudia dekenai unai mase kava gauna umui hoia lao diba. To umui be Lohiabada, emui Dirava ena, umui be iena bese helagana. “Nanigosi ena natuna ena vamu be iena sinana ena rata lalonai do umui nadua lasi.”

²²“Lagani ta ta ibounai dekenai emui uma ena anina do umui haria karoa 10, vadaeni karoa ta be do umui hahelagaia.

²³Unai neganai Lohiabada emui Dirava ese ia abia hidi do umui tomadiho henia gabuna dekenai do umui lao. Unuseni, Lohiabada ena vairanai, umui hahelagaia karoa ta gauna, uiti, uaina, bona olive dehoro, bona emui boromakau vara guna, bona emui mamoe vara guna danu do umui ania. Inai bamona do umui karaia nega ibounai, umui ese Lohiabada emui Dirava do umui matauraia totona.

²⁴“Sedira oiemu ruma dekena amo Lohiabada tomadiho gabuna be daudau herea dainai oi ese unai karoa namba 10, karoa helagana, Lohiabada ese oi ia hanamoa gauna, oi abia lao diba lasi.

²⁵Unai neganai unai karoa helagana do oi hoia, moni davana. Vadaeni unai moni be oiemu imana dekenai do oi abia, Lohiabada, oiemu Dirava ese ia abia hidi tomadiho gabuna dekenai do oi lao.

²⁶Unai gabu dekenai unai moni dekenai oi ura gaudia do oi hoia: Boromakau, mamoe, uaina o inua gauna aukana ta. Bona unuseni, Lohiabada oiemu Dirava ia abia hidi tomadiho gabuna dekenai, oi bona oiemu ruma taudia ibounai ese do umui aniani, mai moale danu.

²⁷“Levi taudia danu emui hanua dekenai idia noho, be do umui durua noho, badina idia be kohu lasi bona tano lasi.

²⁸“Lagani toi toi dekena amo, emui uma anina ena karoa namba 10, karoa helagana be do umui mailaia, emui hanua ena aniani sitoa lalonai do umui haboua.

²⁹Inai aniani be Levi taudia totona, badina idia be kohu bona tano lasi. Ma inai aniani danu be idau bese taudia totona, tamana bona sinana lasi maragidia totona, bona vabu totona. Idia be do idia mai, inai aniani do idia ania, bona do idia boga kunu. Unai bamona umui karaia neganai, Lohiabada, emui Dirava ese umui do ia hanamoa, emui kara ibounai lalonai.”