Read Buka Helaga (Hiri Motu) 1993 DEUTERONOMI 17 Bible Online

DEUTERONOMI 17 - Buka Helaga (Hiri Motu) 1993 bible

DEUTERONOMI 17

¹“Boromakau ta o mamoe ta mai ena bero o toto, o mai ena dika ta do umui alaia lasi, Lohiabada emui Dirava ena boubou gauna totona, badina inai kara dekenai Lohiabada ia badu henia noho.

²“Bema Lohiabada emui Dirava ese umui ia henia hanua ta lalonai tau ta o hahine ta umui davaria, ia ese Lohiabada dekenai ia kara dika,

³bona iena Taravatu ia utua vadaeni, ia ese idau dirava ia tomadiho henia, bona edia hesiai gaukara ia karaia, o bema dina, hua o hisiu dekenai ia tomadiho.

⁴Inai bamona sivarai umui kamonai neganai, do umui tahua namonamo. Bema umui davaria unai kara ia vara momokani vadaeni Israela dekenai,

⁵unai tau o hahine be hanua ena murimurinai do umui hakaua lao, bona nadi dekenai do umui hodoa mase.

⁶“Do umui alaia mase diba bema tau rua o tau haida ese idia samania. To bema tau tamona sibona ese ia samania neganai, unai tau o hahine do umui alaia lasi.

⁷Samania taudia ese nadi ginigunadia do idia negea. Unai murinai taunimanima ibounai ese do idia hodoa. Inai bamona dala dekenai inai bamona kara dika do umui haorea momokani.

⁸“Sedira hepapahuahu haida be auka herea, bona hanua kota biagudia ese kota hereva idia gwauraia diba lasi, hegeregere daika ese tau ta ia alaia, o daika ena samani be momokani, o daika ese heatu ia hamatamaia. Inai bamona daradara ia vara neganai, Lohiabada emui Dirava ia abia hidi tomadiho gabuna dekenai do umui lao.

⁹Bona emui hepapahuahu totona, Levi hahelagaia taudia edia vairanai, bona tomadiho gabuna ena kota biaguna ena vairanai do umui gini, idia ese emui hepapahuahu do idia hamaoromaoroa.

¹⁰Idia ese kota hereva do idia gwauraia, bona edia hereva ibounai hegeregerena do umui karaia.

¹¹Edia kota hereva do umui abia dae momokani, bona edia hadibaia hereva ta ta ibounai do umui badinaia namonamo.

¹²“Bema tau ta ese Dirava ena tomadiho gabuna ena kota biaguna, o ena hahelagaia tauna ia kamonai henia lasi neganai, unai tau be do umui alaia mase. Inai dala dekena amo unai bamona dika be Israela dekena amo do umui haorea momokani.

¹³Bona taunimanima ibounai be inai sivarai do idia kamonai, vadaeni do idia gari, bona gabeai unai bamona kara be tau ta ese do idia karaia lou lasi.

¹⁴“Lohiabada, emui Dirava, ese umui dekenai do ia henia tano lalonai do umui ginidae, bona do umui abia, emui tano korikori, bona unuseni do umui noho. Unai neganai do umui ura emui king ta do umui haginia, umui emui tano kahirakahira idia noho besedia be mai edia king bamona.

¹⁵Lohiabada, emui Dirava ese ia abia hidi tauna sibona be emui king do umui halaoa. Emui bese Israela tauna ta do umui abia, emui king do umui halaoa, idau bese tauna lasi.

¹⁶Emui king ese hosi momo do ia abia lasi, bona ia ese taunimanima Aigupito dekenai do ia siaia lasi, hosi ma haida do idia hoia totona. Badina be Lohiabada ese ia hereva vadaeni, iena bese taudia be Aigupito dekenai do idia giroa lou lasi.

¹⁷“King danu ese adavana momo do ia abia lasi, idia ese Lohiabada dekena amo iena lalona do idia veria garina. King ese danu siliva bona golo momo do ia haboua lasi.

¹⁸“Iena basileia dekenai king dagi ia abia neganai, king ese Dirava ena Taravatu bona hadibaia hereva ena buka ta, hahelagaia taudia, Levi taudia dekena amo ia abia gauna, be ia sibona do ia torea hanai, buka ta dekenai.

¹⁹Inai buka be ia dekenai do ia noho, bona ia ese iena mauri dinadia ibounai lalonai do ia duahia. Unai dekena amo, king be Lohiabada matauraia kara dekenai do ia manada, bona buka ena taravatu bona oda ibounai do ia kamonai henia, bona karaia momokani.

²⁰Unai bamona ia karaia neganai, king be do ia hekokoroku lasi, do ia laloa lasi, ia ese iena varavara Israela taudia ia hereaia. Bona ia ese danu Taravatu dekena amo do ia raka siri lasi, idiba kahanai o lauri kahanai. Unai bamona ia karaia neganai, ia ese king dagi do ia dogoatao lagani momo, bona iena tubudia ese Israela do idia gunalaia uru momo lalonai.”