Read Buka Helaga (Hiri Motu) 1993 DEUTERONOMI 20 Bible Online

DEUTERONOMI 20 - Buka Helaga (Hiri Motu) 1993 bible

DEUTERONOMI 20

¹Ma Mose ia hereva, ia gwau, “Umui dekenai idia tuari henia taudia do umui tuari henidia neganai, sedira hosi bona kariota momo bona tuari taudia momo herea, emui goada idia hereaia, do umui itaia. To idia dekenai do umui gari henia lasi. Lohiabada emui Dirava, Aigupito dekena amo umui ia hamauria Diravana be umui dekenai do ia noho.

²“Tuari be kahirakahira do umui hamatamaia neganai, emui hahelagaia tauna be do ia raka vaira, emui tuari taudia dekenai do ia haroro,

³do ia gwau, ‘Israela taudia e, hari dina umui be do umui tuari momokani. Umui dekenai idia tuari henia taudia dekenai do umui gari lasi, do umui boga auka bona do umui daradara sisina lasi.

⁴Lohiabada emui Dirava ese kwalimu umui dekenai do ia henia.’

⁵“Unai neganai tuari biagudia ese tuari taudia do idia hereva henia, do idia gwau, ‘Bema umui ta ese ruma matamata ta ia haginia vadaeni, to do ia kehoa lasi, ia be iena ruma dekenai do ia giroa lou, tuari dekenai do ia mase garina, bona idau tauna ta ese iena ruma do ia kehoa garina.

⁶“ ‘Bema umui ta ese vain uma ta ia hadoa vadaeni, to vain huahua do ia utua lasi, ia be iena ruma dekenai do ia giroa lou, tuari dekenai do ia mase garina, bona idau tauna ta ese iena vain anina do ia utua garina.

⁷Sedira umui ta ese kekeni ta dekenai ia maoheni, to ia be do headava lasi. Ia be iena ruma dekenai do ia giroa lou, tuari dekenai do ia mase garina, bona idau tauna ta ese iena kekeni do ia adavaia garina.’

⁸“Ma tuari biagudia ese edia tuari taudia do idia hereva henia do idia gwau, ‘Bema tau ta be tuari totona ia gari bada neganai, ia ese iena ruma dekenai do ia giroa lou, ia ese iena bamona tuari taudia edia lalona do ia hamanokaia garina.’

⁹“Tuari biagudia ese edia hereva idia haorea murinai, idia ese tuari taudia edia orea ta ta edia kapena bona gunalaia taudia do idia abia hidi.”

¹⁰Ma Mose ia gwau, “Bema umui ese hanua ta do umui tuari henia gwauraia neganai, unai gabu taudia dekenai maino hereva do umui gwauraia guna.

¹¹Bema hanua taudia ese emui maino hereva idia abia dae, bona edia magu iduara idia kehoa neganai, hanua taudia ibounai be emui hesiai taudia do idia lao, bona emui hesiai gaukara do idia karaia.

¹²“To bema emui maino hereva idia abia dae lasi, bona bema idia ura tuari, umui ese edia hanua do umui koua hagegea,

¹³ela bona Lohiabada emui Dirava ese unai hanua umui dekenai do ia henia. Vadaeni edia tatau ibounai do umui alaia mase.

¹⁴To hahine, mai edia natudia do umui abia mauri, bona boromakau bona hanua rumadia mai edia kohu danu do umui abia, emui. Umui idia tuari henia taudia edia kohu, Lohiabada emui Dirava ese umui dekenai ia henia gaudia do umui abia, mai moale danu.

¹⁵“Unai bamona do umui karaia, unai do umui noho tano ena murimurinai hanuadia dekenai. Idia be emui tano dekena amo daudau idia noho.

¹⁶“To Lohiabada emui Dirava ese umui dekenai do ia henia tano lalonai idia noho hanua umui tuari henia neganai, taunimanima ibounai bona mauri gaudia ibounai do umui alaia mase.

¹⁷Lohiabada ese ia oda hegeregerena, inai bese taudia do umui alaia ore momokani: Hiti taudia, Amoro taudia, Kanana taudia, Perisi taudia, Hivi taudia, bona Iebusu taudia.

¹⁸Inai taudia do umui alaia ore, vadaeni idia ese edia dirava idia tomadiho henia neganai, edia kara bodagadia be umui dekenai do idia hadibaia lasi. Bona unai dainai umui ese Lohiabada emui Dirava dekenai do umui kara dika lasi.

¹⁹“Bema hanua ta umui tuari henia, bona bema umui koua hagegea nega daudau neganai, inai gabu ena huahua audia ira dekenai do umui utua lasi. Unai au edia huahua do umui ania, bona au do umui hadikaia lasi, badina unai au be taunimanima lasi, idia ese umui idia tuari henia lasi.

²⁰To mai edia huahua lasi audia do umui utua diba, vadaeni hanua magu hamakohia audia dekenai do umui gaukaralaia, ela bona unai hanua, umui ia tuari henia hanua do umui halusia.”